RWÎMBO RWA SOROMONI
1
1 Rûrû i rwîmbo rûra rwiyîkeene rwa wendo rwa Soromoni.Mwarî
2 Ncunca kaîrî na kaîrî,
n'ûntû wendo bwaku bûrî na mûrîo nkûrûki ya ûkî.
3 N'ata maguta maaku makûnunka mûrîo,
riîtwa rîaku i rîa gûkenia!
Wana nkîona bûra aarî bonthe bakwendeete!
4 Nthûkia tûthi, tuugie!
Nthûngîria nyomba yaku ya kûmaama,
woû mûnene wakwa.
Aarî ba Njerusaremu
Wana tiû i tûgûkena na tûkagwîrua i woû.
Tûrîkaatha wendo bwaku bûra bûrî mûrîo nkûrûki ya ûkî.
Mwarî
Wana nkîona bûra aarî bonthe bakwendeete!
5 Aarî ba Njerusaremu,
ndî ûmûjirû na ndî ûmûthongi.
Ndî ûmûjirû ta marema ma Kendari.
Kana ta itambaa bia gûcuuria
bia marema ma Soromoni!
6 Tigaani kûngega n'ûntû ndî ûmûjirû,
n'ûntû i njirwîtue i riûa.
Aruayia baamenire
bambîîra nkamenyeere mînda ya mîcabiibû;
ndaaremwa i kûmenyeera mwîrî wakwa.
7 Mbîîra woû mwendwa wakwa,
i kû wirîîte ng'ondu ciaku îmunthî?
I kû ûkaamaamia ng'ondu ciaku kwara,
ntikaaye kûthiûrûûka ngîgûceragia
kîrî acoore baaku?
Mûthaka
8 Wegua ûtiiyî, woû mwarî ûra mûthongi mûno,
thingata mûbwaa wa ng'ondu ciakwa.
Îthi mwanka maremaani ma arîîthi,
na agu noogo ûkaarîîthia tûgondu twaku.
9 Mwendwa wakwa ûthongamîîte ta mbaraathi ya nka
îrî gatîgatî ka mbaraathi cia ndûme cia Faraû.
10 N'ata mpou ciaku irî nthongi,
igîkeengagîrwa i mina!
Nkingo yaku n'înthongi
îgemeetue na mûkathî wa goro.
11 Tûgakûrûthîra mina cia thaabu,
igemeetue na fetha.
Mwarî
12 Mûnene amaami meethaani yake,
mîtaa yakwa yataambia mîruke yayo.
13 Mwendwa wakwa akari ta mûbuko wa manemane
ûmaami gatîgatî ka nyonto ciakwa.
14 Mwendwa wakwa akari ta maûa
mîndaani ya mîcabiibû ya Eni-Gendi.
Mûthaka
15 N'ata ûrî mûthongi, mwendwa wakwa,
ka ûthongamîîte ata î!
Meetho maaku maboorereete ta îcea.
Mwarî
16 N'ata ûrî mûthongi, mwendwa wakwa!
N'ata ûrî wa gûkenia!
Na ûrîrî bwetû bûkeethîrwa bûrî nyaki î ndirimu.
Mûthaka
17 Mîtî ya kûratha ya nyomba yetû îkeethîrwa îrî mîthithinda
na mata namo meegue marî mîtarakwa.