Mwarî
3
1 Ûtugû ndî gîtandaani,indeeriragîria mwendwa wakwa,
îndî ntaamwona.
2 Ndeebîîra, “Ndîûkîîra nthiûrûûke na taûni,
nkîmûceragia barabarani na gûntû kunthe;
ngaaceria mwendwa wakwa.”
Kwoogu ndamûceria gûntû kunthe îndî ntaamwona.
3 Araaria baambona bakîthiûrûkaanga ntûûra,
ndabaûria, “Bûkûmbonera mwendwa wakwa.”
4 Nkîthiyathiyanga aniini,
ndamwona,
ndamûgwata ntaareka athi,
mwanka ndamûreeta mûciî wetû,
ara ndamaathîîrwe.
5 Biû aarî ba Njerusaremu, thiîtiani na nthia na nkûrûngû,
buuge bûtiindûkîria kana bûûkia wendo
mwanka kagiita kara kaagîrîîte.
Aarî ba Njerusaremu
6 N'ûû ûyu aumîîte rwanda,
akunîkîrîîtwe n'îtu rîa ntoogo?
I mbi înu îkûnunka macoco na manemane,
na mîtaa ya mîthemba yonthe?
7 Cûûba! I gîtî gîa Soromoni;
aumagarîîtue n'acikaarî ba ndûa mîrongo îthanthatû
ncamba cia ndûa cia Isiraeri.
8 Bonthe i ncamba ciiyî na imenyereetie kûrûa.
Woora ûmwe wao arî na rûûyiû kauna gaake,
eethuuranîrîte kûrigîîria mûnene
atikaithûkîrwe ûtugû.
9 Mûnene Soromoni n'aarûthithîîtie gîtî
na mîtî ya kuuma Rebanoni.
10 Itugî biakîo biakaandîîtwe na fetha;
nguo ya îgûrû yagemeetue na thaabu.
Ûkarîro bwakîo bûguîkîîtwe na nguo ya ûkûyû,
îgemeetue na wendo n'aarî ba Njerusaremu.
Mwarî
11 Aarî ba Sayuuni,
ncûûni bwone mûnene Soromoni.
Eekîrîîte nthûmbî ya ûnene
îra gina aamwaigîîre kîongo,
ntugû ya mûranû wake,
ntugû yake ya gîkeno.