Mûthaka
4
1 N'ata ûrî mûthongi, mwendwa wakwa,ka ûthongamîîte ata!
Meetho maaku imaabooreeru ta macea,
mamu ûkunîkîrîîte na gîtambaa.
Ntundu ciaku îkari ta ndîîthia cia mbûria
ciîndamîîte kuuma kîrîmaani kîa Ngiriandi.
2 Magego maaku i maayerû ta ng'ondu, ciarîîkia kwenjwa,
ira ciarîîkia kûthambua waarîo.
Mabanganîîtue bwega;
gûtarî nwa rîmwe rîkûûra.
3 Mîromo yaku îkari ta rûtaame rûûtuune,
kanyua gaaku i kaathongi!
Mpou ciaku ibuîte; ikari ta inucu bia kûngûmanga
iguîkîîtwe na gîtambaa kîra ûguîkîrîte nakîo ûthiû bwaku.
4 Nkingo yaku îrûngi ta kîbayo kîa Ndaundi,
kîîraaya na kîîthongi,
gîcuurîîtue rong'o ngirib
cia ncamba cia ndûa.
5 Nyonto ciaku ikari ta tûkûrûngû,
ta tûkûrûngû twa maatha tûkîrîa maûani.
6 Rîra gûkaarura,
na irundu biûre,
nkaathi kîrîmaani kîa manemane
na karîmaani ka macoco.
7 Ûrî ûmûthongi mûno,
mwendwa wakwa,
ûrî ûmwega mantûûni monthe.
8 Ncû ûthiiyanie naani kuuma Rebanoni, mwiki wakwa.
Ûthiiyanie naani kuuma Rebanoni.
Kuuma îgûrû rîa kîrîma kîa Amana,
uma kathûmbîriini ga Seniri na Erimoni,
kuuma makurunguuni ma cimba,
na kuuma irîmaani bira bikaraga ngo.
9 N'ûthûkîîtie nkoro yakwa, mwar'wa mûthonua, mwiki wakwa;
n'ûmbîîte nkoro yakwa na îmbeneria rîmwe rîa meetho,
na nkathî îmwe ya mûkathî waku.
10 N'ata wendo bwaku bûrî bwega,
mwar'wa mûthonua, mwendwa wakwa!
N'ata wendo bwaku bûrî bwega nkûrûki ya ndibei,
mûruke wa mîtaa yaku îrî na mûrîo nkûrûki ya mîtaa îra mîega mûno.
11 Mîromo yaku, mwiki wakwa, îrî na mûrîo ta ûkî.
Îî, ûkî na îria birî rûrîmeeni rwaku.
Mûruke wa nguo ciaku ûkari ta wa Thithinda ya Rebanoni.
12 Ûkari ta kamûnda ka witho,
ûtonga bwakwa, mwarî wa mûthonua!
Ûkari ta kîthima kîra gîtaûmba kûnyuîgwa i muntû ûngî,
kîthima gîakwa ninka.
13 Ûkari ta mûnda wa mûkûkûmanga ûmûthongi
ûciere matunda maathongi,
ûrî na maûa na mîtaa îtoonekangaga:
14 Nandi na saburoni,
karamusi na cinamoni,
na mîthemba yonthe ya mîtî îra yuumaga macoco
na manemane na mabirinca
na mîthemba yonthe ya mîtaa îra mîega.c
15 I woû kîthima kîa mûnda wakwa,
kînyaka kîa rûûyî rûûtheru,
rwîndamîîte kuuma Rebanoni.
Mwarî
16 Ûkîîra, ruuo rwa kuuma bwa îgûrû!
Na ûûye woû ruuo rwa kuuma bwa iti.
Buutanaani mûndaani wakwa,
kaingo mûruke ûmwega wa mûnda ûtaamba.
Tiga mwendwa wakwa aaye mûndaani wake
na arîe matunda maau meega.