Mûthaka
5
1 Nkûthûngîra kamûndaani gaakwa,mwar'wa mûthonua, mwiki wakwa.
Nkwîthîrania manemane yakwa na mîtaa,
nkûrîa magwa na ûkî bwakwa,
nkûnyua ndibei yakwa na îria rîakwa.
Aarî ba Njerusaremu
Îrîani na bûnyue biû acoore,
mwanka bûtogoone i wendo.
Mwarî
2 Ndaamaami, îndî nwa ndaathûgaanagia,
Mwendwa wakwa nakûringaringa akiugaga,
“Ndugûrîra mwar'wa mûthonua, mwendwa wakwa,
îcea rîakwa, ûra mwega.
Kîongo gîakwa kîrindîîtwe i maame,
na ntundu ciakwa irî na rûûyî rwa kîthitha gîa ûtugû.”
3 Naani ndamwîra, “Iindutire nguo;
i nkaamîkîra kaîrî?
I nthambire magûrû,
i nkamagwatithia tîîri kaîrî?”
4 Mwendwa wakwa aathûûngîîria njara yake karumuuni ka mûrango,
na nkoro yakwa yambîîria kûringa.
5 Ndaûkîîra kûrugûrîra mwendwa wakwa,
njara ciakwa cianyenyeaga ta irî na manemane,
na biara biakwa nabio nthanta cia manemane,
nkîrugûra konji.
6 Ndaarugûrîra mwendwa wakwa,
îndî mwendwa wakwa naarî akûgarûka aathi.
Ndaakua nkoro.
Ndaumagarûka ndaathi kûmûceria îndî ntaamwona;
ndamwîta îndî ataambîtîga,
7 Araaria bambona
bakîthiûrûûka taûni.
Bantura na bantonyanga;
baantharia gîtambaa
akaria babu baakaragia taûni.
8 Ndabwereka biû aarî ba Njerusaremu,
woona bwona mwendwa wakwa,
bûmwîre ûûgû,
bûmwîre i nkûgirîka i wendo.
Aarî ba Njerusaremu
9 N'ata mwendwa waku arî mwega nkûrûki ya bara bangî,
n'ata mwendwa waku arî mûthongi nkûrûki ya bara bangî?
N'ata mwendwa waku arî mûthongi nkûrûki ya bara bangî,
n'ûntû ûtwerekire ûû?
Mwarî
10 Mwendwa wakwa nûmûthongi na arî na inya;
nûmwega nkûrûki ya bangî ngiri îkûmi!
11 Kîongo gîake gîkari ta thaabu îra ntheru mûno;
ntundu ciake ninyorooku,
na ninjirû ta nkûngûrû.
12 Meetho maake makari ta îcea
rûteere rwa muuro,
mathambîîtue na îria,
marûmîîrîîtue ta maiga ma goro.
13 Mpou ciake ikari ta mûnda wa mîtî îra înunkaga bwega
igîtoogaga mîtaa.
Mîromo yake n'yo îkari ta maûa
îkûnyûûrûûka manemane.
14 Njara ciake ikari ta mîraagi ya thaabu,
îgemeetue na maiga ma goro.
Mwîrî wake ûkari ta mûguongo ûmûtenderie,
waagemua na cabire.
15 Magûrû maake makari ta itugî bia maiga maatenderu
biîkîrîtwe ikinyithioni bia thaabu.
Arî mwago ta Rebanoni.
N'wa mwanya ta mîthithinda ya Rebanoni.
16 Kanyua gaake karî mûrîo,
n'ûmwega mantûûni monthe.
Ûûgû i bu mwendwa wakwa akari,
biû aarî ba Njerusaremu.