Aarî ba Njerusaremu
6
1 I kû mwendwa waku athiire?Woû ûra mûthongi nkûrûki ya aka bara bangî?
I njîra îrîkû mwendwa waku athiire,
kaingo tûgûteethia gûceria.
Mwarî
2 Mwendwa wakwa neendamire mûndaani wake,
tûmîtîîni twake tûra tûnuunkaga bwega,
kûrîîthia ng'ondu ciake mîndaani
na kwîthîrania maûa.
3 Mwendwa wakwa nwakwa, naani ndî wake.
Arîîthagia ng'ondu ciake maûani.
Mûthaka
4 Ûthongamîîte ta taûni ya Tirisa, woû mwendwa wakwa,
ûthongamîîte ta Njerusaremu,
ûrî wa kûrigaria ta njûûrî îwete bendeera!
5 Raitha naara,
n'ûntû meetho maaku imakûmbûûmba.
Ntundu ciaku ikari ta ndîîthia cia mbûri
ciîndamîîte kuuma kîrîmaani kîa Ngiriandi.
6 Magego maaku mathereete ta ng'ondu
ithambîtue warîru.
Mabanganîîtwe bwega;
na gûtarî nwa rîmwe rîkûûra.
7 Mpou ciaku ikari ta inucu bia kûngûmanga
iguîkîîtwe na gîtambaa kîra ûguîkîrîte nakîo ûthiû bwaku.
8 Nwa kwîthîrwe na aka ba mûnene mîrongo îthanthatû,
na aka ba kwaiga mîrongo înaana,
na aarî bikira batatarîka.
9 Îndî amwe na ûgu nthuura îcea rîakwa, ûra ûmwe mwega mûno,
ûra arî mwarî wenka kîrî gina,
na ûmwende mûno!
Aarî bamwonaga bakauga n'ûmûthaarime;
aka ba anene na aka ba kwaiga bakamûkumia bakiugaga,
10 “N'ûû ûyû ûkari ta rûkîîrî,
athongamîîte ta mweri, na athararîîte ta riûa,
nwakûrigaria ta njûûrî îrî na bendeera?”
11 Ndeendamire mûndaani wa mîkoroco,
kwona îra îkuuma kîbondeeni,
na mbona kana mîcabiibû nîkûraa,
kana mîkûkûmanga nîkûraa.
12 Mbere ndîîyûkwa,
wendi bwakwa bwambira nkaarîîni cia ûnene cia antû baakwa.a
Aarî ba Njerusaremu
13 Garûka, garûka, woû mwarî wa Suramu
garûka, garûka, kaingo tûkûraitha!
I kî n'ûntû ûkûndaitha ûûgû,
ûrî gatîgatî ga ikundi biîrî bia aini?