Mûthaka
7
1 N'ata ûkinyaga bwega gwîkîrîîte iraatû,woû mwarî wa mûnene!
Biero biaku ibiithongi, bithûrûmbeene ta maiga ma goro,
ngûgî ya mûbundi ûrî waara.
2 Mûkou waku ûkari na mbakûri
ya kuunganîria ndibei.
Nda yaku îkari ta kîthûmba gîa ngano
kiirigîrîîtwe i maûa.
3 Nyonto ciaku ikari ta tûkûrûngû twîrî,
nkûrûngû cia maatha.
4 Nkingo yaku îkari ta kîbayo gîakîîtwe na mûguongo.
Meetho maaku makari ta maria ma Esiboni,
mara marî akubî na Bathirabimu.
Nyiûrû yaku îkari ta kîbayo kîa Rebanoni,
kîraithîîte bwa Ndamasiki.
5 Kîongo gîaku gîkari ta karîma ga Karimeri,
na ntundu ciaku iciinyorooku na iciinjirû,
wana mûnene nwa aûmbwe n'ûthongi bwa cio.
6 N'ata ûrî mûthongi, mwendwa wakwa, na ûrî wa gûkenia,
mwendwa wakwa, ûûyûri ikeno teke!
7 Ûrendûkîîte ta mûrûgûyû,
na nyonto ciaku ikari ta magaro maau.
8 Ndauga ngaatwa mûrûgûyû ûyu
na ngwate magaro maau.
Nyonto ciaku irookara ta magaro ma ncabiibû,
na mûruke waku rîra ûkîbeeba ta matunda.
9 Kanyua gaaku karookara ta ndibei îra mbega mûno,
îra înyûûrûkaga mpoora îgûrû rîa mîromo na magego.
Mwarî
10 Ndî wa mwendwa wakwa
na wîrirîria bwake i kîrî niû.
11 Ncû, mwendwa wakwa, tûthi kîthakaani
tûraare naagu maûani ma kîthaka.a
12 Ga tûraûke rûkîîrî tûthi mîndaani ya mîcabiibû,
twone kana ncabiibû nîraîte,
kana marao maacio imagûtumûka,
na kana mîkûkûmanga nîraîte.
Na naagu i noo ngaakwera wendo bwakwa.
13 Matunda ma wendo i ma kûruta mûruke ûmwega,
na matunda mara meega marî mûrangooni wetû,
matunda maimbia na maakûrû,
mara ntûûraga nkwaigîrîîte mwendwa wakwa.