8
1 Itû ûtakîîgua ûrî mûruayia,ûra wonkire nyonto cia maama!
Rîru ngakwîthîra nja,
ga ngîgûcunca,
na gûtirî we ambûûria.
2 Ngûtongoreeria na ngakwira
mwanka nyomba ya maama,
ûra aanthoomithiirie.
Nkûnenkera ndibei îmbîkîre tûnyamû tûra tûnuunkaga bwega ûkanyua,
ngakûnenkera ûkî bwa kûngûmanga yakwa.
Mwarî
3 Njara yake ya kîmotho yarî ruungu rwa kîongo gîakwa,
na ya ûrîo n'yo nînkumbatîrîtie.
4 Ndabwereka aarî ba Njerusaremu,
bûtikaindûkîrie kana bûûkia wendo
mbere ya kagiita kara kaagîrîîte.
Aarî ba Njerusaremu
5 N'ûû ûyû aumîîte rwanda,
eekirimanîîtie na mwendwa wake?
Mwarî
Ndaagûûkîîrie ruungu rwa mûtunda;
agu noogo nyûkwe aakûmaathîîre,
na noo waciarîîrwe.
6 Ndinga ta mûûni nkorooni yaku,
kana ta mûûni njaraani yaku.
N'ûntû wendo bûrî inya ta gîkuû,
na mwanki wabu ûûmîîte kiongo ta nthiko.
Wendo bwenagia ta mwanki,
ta rûrîrîmbî rûûnene rwa mwanki.
7 Ndûûyî imbingî itiûmba kûbûûtûgia wendo;
kana miuro îbukondoria.
Muntû akageria kûnenkanîra
ûtonga bwake bunthe akîgûra wendo,
aûkania na kûgîa îgi.
Aruagina ba mwarî
8 Rîra kaaraayia kaarî kaniini,
gataarî nwa nyonto.
N'aata tûkîrûtha,
nthaka ikîîya gûgakeethia îkagûra?
9 Ûkaaya kwîgua karî rûthingo
twagaakîra ibayo bia fetha.
Îndî ûkeegua i mûrango,
twamûthiûrûkîîria na mbaaû cia mîthithinda.
Mwarî
10 Ndî rûthingo,
na nyonto ciakwa ikari ta ibayo.
Kwoogu niû ntuîkîîte meethooni ma mwendwa
muntû ûra ûmûreetagîra kûganîrwa.
11 Soromoni n'aarî na mûnda wa mîcabiibû naara Mbaari-Amoni,
ûra aakomborithîîtie arîmi bana noogo.
Wa ûmwe wao aarîaga sekeri ngiri îmwe n'ûntû bwa matunda.
12 Îndî mûnda wakwa wa mîcabiibû n'wakwa wa kûnenkanîra,
kara na sekeri inu ciaku ngiri îmwe cia fetha, woû Soromoni,
na sekeri magana maîrî i cia bara bamenyagîîra mîcabiibû yau.a
Mûthaka
13 Îî mwendwa wakwa, woû ûkaraga mîndaani,
acoore baakwa ibathikîîrîîtie kayû gaaku.
Tiga na niû nkeegue!
Mwarî
14 Ncû na mpwî, mwendwa wakwa!
Biûka ta nkûrûngû,
kana nthia îtarî nkûrû mûno
irîma bia tûtî tûra tûnuunkaga bwega.