Ûkumio bwa Sayuuni bûra bûkaaya
60
1 “Ûkîîra, ûtharare,n'ûntû werû bwaku bûkûûya,
Na ûkumio bwa Mwathani bûkuumîîra îgûrû rîaku.
2 Raitha, mwindu ûgaakunîka nthîgûrû,
na mwindu ûmûnene ûgaakunîka mîîrîga ya antû.
Îndî Mwathani agaûkîîra îgûrû rîaku,
na mwago wake ûkoonekana îgûrû rîaku.
3 Na mîgongo îkaaya kîrî werû bwaku,
na anene baaye kîrî werû bwa gûkea gwaku.
4 Ûkîîria meetho maaku, ûraithe nteere cionthe,
bonthe beethîranaga, bakaaya kîrî woû.
Nthaka ciaku ciiyaga kuuma kûraaya.
Na aarî baaku bagaakamatwa na njara.
5 Rîru woona na gwekîrwa werû,
Na nkoro yaku îkaaringa na gûtaambûrûka i gîkeno.
Ûtonga bwa îria bûkaagarûrwa bûûye kîrî woû,
ûtonga bwa mîgongo bûkaaya kîrî woû.
6 Wingî bwa nkamîîra bûgaakunîka nthî yaku,
nkamîîra itarî nkûrû cia Mindiani na Efa.
Bonthe bakaaya kuuma Seba,
bareete thaabu na macoco,
na kuugîîria ûkumio bwa Mwathani.
7 Ûkeethîranîrua Ng'ondu cionthe cia Kendari,
na ntûrûme cia kuuma Nebaiothi igagûtûmîkîra.
Irutîrwe îgûrû ya kîthînjîro gîakwa mbîtîgîîrîîtie,
naani ngaakumithia nyomba na mwago wakwa.
8 I baaû baba bakûburûûka ta îtu,
na ta macea mathiîte ntaraani ciamo?
9 Na mma icîgîîria bikaambeteera,
na meeri cia Tarisisi mbere.
Kaingo ireeta nthaka ciaku kuuma kûraaya,
barî na thaabu ciao na fetha,
n'ûntû bwa gûtîîya Mwathani, Ngai waku,
Ûra Mûtheru wa Isiraeri,
n'ûntû n'agûkumithîîtie.
10 Ageni bagaaka nthingo ciaku,
na anene baao bagagûtûmîkîra,
kinya wegua indaagûcûniirie na mûthûûro,
n'ûntû bwa gûkwendeera ngûkûrekera.
11 Mîîrîga yaku n'yo îgaakaraga îrugûrîîtwe rîonthe,
îtiingawa mûthenya kana ûtugû.
Kaingo antû baûmba gûkûretera ûtonga bwa mîgongo,
na anene baao batongorereetue amwe nabo.
12 N'ûntû mûgongo kana ûnene bûra bûtagîgûtûmîkîra bûkaathira,
bûkaathira kûrû.
13 Mwago wa Rebanoni ûkaaya kîrî woû,
mûerosi na mûthithinda na mûtarakwa îrî amwe.
Kaingo îgemia bantû aakwa ara atheru,
naani ngaakumithia bantû a magûrû maakwa.
14 Na nthaka cia antû bara baakuinyîîrie,
ikaaya kîrî woû na ikwîndamîîre
nabo bonthe bara baakûbûthîîrie
bakeendama mwanka mbayo cia magûrû maaku
nabo bagagwîta, taûni ya Mwathani,
Sayuuni ya Ûra Mûtheru wa Isiraeri.
15 Kinya wegua n'ûtigîîtwe na wamenwa,
gûtarî muntû agûkûrûkîîra gwaku,
ngagûtuîkithia wa gîtîîyo gîa tene na tene,
na gîkeno gîa nciarwa cionthe.
16 Ûkaanyua îria rîa mîgongo,
ûgoonka nyonto cia anene.
Naawe ûkaamenya atî niû, Mwathani, ndî mwonokia waku,
na mûkûûri waku, Mwene Inya wa Njakubu.
17 Bantû a rûthuku nkaareeta thaabu,
na bantû a îthaga nkaareeta fetha.
Na bantû a mûtî, rûthuku,
na bantû a maiga, îthaga.
Kaîrî ngaatûma ûkiri bûtuîka ngabana waku,
na wagîru bûtuîke mûnene waku.
18 Ûgîti bûtiîguîka kaîrî nthîgûrû yaku,
maganjo kana wînyangia itiîgua irî mîankaani yaku.
Îndî ûgeeta nthingo ciaku, wonokio,
na mîîrîga yaku, ûkumio.
19 Riûa rîtiîgua rîrî werû bwaku kaîrî îgiita rîa mûthenya,
kana mweri ûkwaa werû na kûtharara kwa uu.
Îndî Mwathani n'we akeegua arî werû bwaku tene na tene,
na Ngai waku akeegua arî mwago waku.
20 Riûa rîaku rîtiithûa kaîrî,
na mweri waku ûtiithûa kaîrî,
n'ûntû Mwathani wengwa n'we akeegua arî werû bwaku bwa tene na tene,
na ntugû ciaku cia kîeba igaakinya mûthia.
21 Rîru antû baaku bonthe bakeegua barî baagîru,
nabo bakeegwatîra rûgai rwa nthîgûrû înu tene na tene.
I bo rwong'i rûra ndaandire,
ngûgî ya njara ciakwa,
kaingo nkumithua.
22 Ûra mûniini kîrî biû akeegua arî ngiri,
na ûra atarî na inya agaatuîka mûgongo ûrî na inya.
I niû, Mwathani,
nkaarûtha bu na mpwî kagiita kaabu gaakinya.”