Ntheto îmbega kîrî bara bainyîîrie
61
1 Kîrundu wa Mwathani Mwene Inya arî îgûrû rîakwa,n'ûntû Mwathani n'antûûrîrîîtie maguta
ntûmîîria ntheto îmbega kîrî nkîa.
N'antûmîîte kaingo mboria bara bainyîîrîkîîte nkoro,
ntûmîîria kûthaûrwa kîrî mîgwate, nabo bara bathaîke ntûmwa ya kûthaûrwa kwao.
2 Kuugîîria mwanka wa kwendeerwa i Mwathani
na ntugû ya kwîrîîria kwa Ngai wetû.
Gûkirakiria bonthe bara bakûrîra,
3 na kweyana kîrî bara bakûrîra Sayuuni
kûbacookeria nkoobia ya ûthongi
bantû a muu,
maguta ma gîkeno
bantû a kîrîro,
na nguo ya gûkumia
bantû a kîrundu gîa gûkua nkoro.
Bageetwa mîpuru ya wagîru,
îra yandîîtwe i Mwathani
n'ûntû bwa ûkumio bwake.
4 Bagaacookeeria maganjo ma tene,
na bacookeerie gûntû kûra kwenyangiirue tene.
Bagaacookeeria taûni ira cienyangiirue,
ira ciarî i mbomorange nciarwa inyingî ciakûrûkire.
5 Ageni bakaarîîthia ng'ondu cienu,
ageni bakaaruta ngûgî mîndaani yenu na mîndaani ya mîcabiibû.
6 Îndî biû bûgeetwa athînjîri ba Mwathani,
bûgeetwa aruti ngûgî ba Ngai wetû.
Bûkaarîa ûtonga bwa mîgongo,
na bûgeekumîria ûtonga bwao.
7 Bantû a îgi rîenu,
antû baakwa bûkaagwata maita maîrî,
na bantû a îgi,
bagaakeneera rûgai rwao,
kwoogu nthîgûrû yao bakeegwatîra maita maîrî,
gîkeno kîao ûkeegua kîrî gîa tene na tene.
8 N'ûntû niû Mwathani, i mbendeete kûgiita îgamba na ûmma,
i meneete wamba na ûthûûku.
Naani nkabarea marîi na ûmma,
nkaarîîkanîra nabo kîrîîkanîro gîa tene na tene.
9 Na nciarwa ciao ikaamenyekana kîrî mîgongo,
na rûciaro rwao kîrî mîîrîga ya antû.
Bonthe bara bakaaboonaga bakauga,
atî bo i rûciaro rûûthaarime i Mwathani.
10 I nkenaga mûno n'ûntû bwa Mwathani,
nkoro yakwa îkaagwîrua n'ûntû bwa Ngai wakwa.
N'ûntû n'ambîkîrîte nguo ya wonokio,
n'anguîkîîte na nguo ya wagîru,
ta bûra mûgûrani eekagîra nguo na kîremba kîa maûa,
ta mwiki bûra eekagîra into bia thaabu.
11 N'ûntû ta bûra nthîgûrû yumithagia imera biayo,
na wa ta bûra kamûnda kaumithagia into bira biandirwe ku,
nwabu Mwathani Ngai akaumithia ûmma
na gûkumia mbere ya mîgongo yonthe.