Isaya aarombera Njerusaremu
62
1 Ntiikira n'ûntû bwa Sayuuni,na n'ûntû bwa Njerusaremu ntiikirîîria,
mwanka wagîru bwa yo bûtharare ta riûa rîkiuma,
na wonokio bwa yo ta taa îgwankana.
2 Na mîgongo îkoona wagîru bwaku,
anene bonthe bakoona mwago waku.
Naawe ûgeetwa riîtwa rîîyerû,
rîra Mwathani agaagwîta na kanyua gaake.
3 Naawe ûkeegua ûrî nthûmbî ya ûthongi njaraani ya Mwathani,
nkoobia ya ûnene njaraani ya Ngai waku.
4 Batigwîta ûmûtiganîrie kaîrî,
kana beeta nthîgûrû yenu Maganjo, îndî ûgeetwa Efusiba,a na nthîgûrû yaku, yîîtwe Beura.b
5 N'ûntû wa ta bûra mûthaka agûraga mwarî,
nwabu ûra aagwakirec agaakûgûra
na wa ta bûra mûgûrani akenagîîra mwiki,
i bu Ngai waku agaagûkeneera.
6 I mbaigîîte akaria nthingooni ciaku, woû Njerusaremu,
batiikira mûthenya kana ûtugû.
Biû bara bwîtaga Mwathani,
bûtikaanogoke.
7 Na bûtikaareke anogoka, mwanka rîra akaarûngîka Njerusaremu,
na amîtuîkithia bantû a gûkumagua i nthîgûrû.
8 Mwathani n'athiîtîîtie na njara yake ya ûrîo,
na njara yake ya inya,
“Ntiinenkera anthû baaku irio biaku kaîrî
bituîka irio biao,
na ageni batiinyua ndibei yaku kaîrî,
îra ûrutîrîte ngûgî.
9 Îndî bara bakaabiketha bakabirîa
na bakumie Mwathani,
na bara bakeethîrania ncabiibû bakaanyuîra ndibei
ome ya nyomba yakwa.”
10 Thûngîraani, thûngîraani na mîîrîga!
Theriani njîra ya antû.
Thondekaani, thondekaani njîra înene!
Rutaani maiga ku.
Ûkîîriani kîbendeera n'ûntû bwa mîîrîga ya antû.
11 Raitha, Mwathani akuugîîria ntûmwa
mwanka mûthia wa nthîgûrû,
“Îraani Njerusaremu, mwarî wa Sayuuni,
‘Raitha, mwonokia waku n'ayîîte!
Raitha, arî na kîewa gîake,
na îrîi rîake arî narîo.’ ”
12 Nabo bageetwa, Antû Baatheru,
bara bakûûrîîtwe i Mwathani.
Naawe ûgeetwa, Mûcerua,
Taûni îtarî Ntiganîrie.