Ntugû ya Mwathani ya kwîrîîria kîrî mîgongo
63
1 N'ûû ûyû aumîîte Endomu,aumîîte Bosira, arî na nguo irî na marooro matuune?
N'ûû ûyû, eekîrîtwe ûkumio,
athiîte na inya ya ûnene bwake?
“I niû Mwathani nkwaria na wagîru,
ndî na inya ya kwonokia.”
2 I kî n'ûntû nguo ciaku irî ntuune,
ciakara ta cia muntû ûra akinyangaga ncabiibû?
3 “Ndaakinyangire kîbibi gîa ncabiibû ndî ninka,
kuuma mîgongooni gûtirî we twarî n'we.
Ndaacikinyangire ndî na mûthûûro,
ndaacikinyangîîre nthî na mûthûûro,
na nguo yakwa n'îîkîrîtwe marooro i nthakame yao,
naani i migwatithîîte nguoni ciakwa cionthe.
4 N'ûntû ntugû ya kwîrîîria n'yarî nkorooni yakwa,
na mwanka wao ûra ndaabûkûûrire ûgûkinya.
5 Ndaaraitha, îndî gûtirî wa gûnteethia,
Ndaarigara n'ûntû gûtaarî muntû wa gûnteethia,
kwoogu, njara yakwa ningwa n'yandeteere wonokio,
mûthûûro wakwa nuu wanteethiirie.
6 Ndaakinyanga mîîrîga ya antû na mûthûûro,
ndabatogoonia ndî na marûrû,
na ndaatûûra nthakame yao nthî.”
Gûkumia na Kûromba
7 Nkaagweta wendo bûra bûtathiraga bwa Mwathani,
mantû mara agaakumîrua,
n'ûntû bwa monthe mara atûrûthîrîte.
Na wingî bwa mantû meega mara arûthîrîte
mûciî wa Isiraeri,
n'ûntû bwa wendo na kîao gîake kiingî.
8 N'ûntû augire, “Ûmma bo n'antû baakwa,
nthaka ira itakîîmbenia,”
na kwoogu aatuîka Mwonokia wao.
9 Kînyamaaraani kîao kîonthe kinya we n'anyamaariirue,
na mûraîka ûra akaraga mbere yake aboonokia.
N'ûntû bwa wendo na kîao gîake, aboonokia,
abaûkîîria na abakamata
ntugû cionthe cia tene.
10 Îndî amwe na ûgu baûmiirie biongo,
baathûûria Kîrundu Ûmûtheru wake.
Kwoogu aagarûka na aatuîka mûnthû wao
nwe wengwa aarûa nabo.
11 Rîru antû baake baaririkana
ntugû cia tene, cia Musa, na antû baake, aûria,
arîkû we ûra aabûreetire gûkûrûkîîra îriani,
amwe na mûrîîthi wa ng'ondu ciake?
Arîkû we ûra eekîîre Kîrundu Ûmûtheru wake gatîgatî kaao,
12 ûra aatûmire inya ya mwago wake,
yîîgua îrî njaraani ya ûrîo ya Musa,
ûra aagaûkaniirie rûûyî mbere yao,
kaingo eecereria ûkumio bwa gûtûûra tene na tene,
13 ûra aabatongoreerie ndiani?
Ta mbaraathi rwanda,
bataataratara.
14 Ta ng'ombe îra îîndamaga kîbondeeni,
baanenkerwa kûnogoka i Kîrundu wa Mwathani.
Ûûgû i bu watongoriirie antû baaku,
kaingo wîrûthîra riîtwa rîrî mwago.
15 Raitha kuuma îgûrû,
kuuma gîtîîni gîaku gîa gîtîîyo, kîîtheru na kîa mwago.
Kîrîkû kîao gîaku na inya?
Wendo bwaku na kîao bitirî kîrî tiû.
16 Îndî woû i woû Baaba wetû,
wana wegua Îburaîmu atitwiyî
kana Isiraeri îtûmenya,
woû, Mwathani, ûrî Baaba wetû,
Mûkûûri wetû kuuma tene i rîo riîtwa rîaku.
17 Woû Mwathani, i kî n'ûntû ûtûrekeereetie tûthi kûraaya na njîra ciaku,
watûma twîgua tûrî na nkoro imbûmo kinya tûtagûkuthûke?
Tûcookere n'ûntû tûrî aruti ngûgî baaku,
mîîrîga îra ya rûgai rwaku.
18 Gwa kagiita gaakai antû baaku beegwatîra bantû aaku aatheru,
îndî îîndî anthû beetû ibakinyangîîte nyomba yaku.
19 Tûrî baaku kuuma tene
îndî bo ûtaabaatha,
bateetwa na riîtwa rîaku.