64
1 Ûtakîîgua watembûra îgûrû na ûkeendama nthî,kaingo irîma biinaina mbere yaku!
2 Ta bûra mwanki ûbîîthagia tûcang'i
na ûgatûma rûûyî rûtherûka,
îndama ûtûme riîtwa rîaku rîmenyeka kîrî anthû baaku,
na ûtûme mîgongo iinaina mbere yaku!
3 N'ûntû rîra waarûthire mantû ma kûmakania mara tûteerîgîîrîîte,
wendamire, na irîma biainaina mbere yaku.
4 Kuuma tene, karaaya mûno gûtirî we eegua,
gûtirî gûtû kwegua,
gûtirî riitho rîona Ngai ûngî tatiga woû,
ûra ûrûthaga mantû n'ûntû bwa bara bamwetagîîra.
5 N'ûûyaga gûteethia bara barûthaga bûra kûbatîîrue bakeneete,
bara baririkanaga njîra ciaku.
Îndî rîra twathiire na mbere kûbabîtîria,
n'wathûûrire.
N'ata îndî tûûmba kwonokua?
6 Twinthe tûkari ta muntû arî na mûgiro,
na ngûgî cietû cionthe ira ciagîrîîte ikari ta ntaame cia rûko.
Twinthe twaûma ta îthangû,
na meeyia meetû matûciata ta kîbuubani.
7 Gûtirî we eetaga riîtwa rîaku,
kana eerutanîria akûgwata,
n'ûntû n'ûtuithîîte ûthiû bwaku,
na n'ûtûtiganîrîtie n'ûntû bwa meeyia meetû.
8 Îndî woû Mwathani, ûrî Baaba wetû.
Tiû tûrî yûmba, naawe ûrî mûûmbi,
twinthe tûrî ngûgî ya njara ciaku.
9 Itû Mwathani, ûtikaathûûre nkûrûki ya kîthimi,
ûtikaaririkane meeyia meetû tene na tene.
Itû twakwereka tûraithe,
n'ûntû twinthe tûrî antû baaku.
10 Taûni ciaku ira ntheru n'ituîkîîte rwanda,
kinya Sayuuni i rwanda, Njerusaremu n'îganjo.
11 Nyomba yetû ya Ngai, întheru na îrî mwago, kûra ba baaba baagûkumagîria,
n'îbîîthîîtue na mwanki,
na bionthe bira biarî bithongi i bienyangiirue.
12 Îî Mwathani, nyuma ya mama monthe rî, gûgatûkirîra woogu?
Ûgaakira na ûtûkaanûkie nkûrûki ya kîthimi?