Îgamba na wonokio
65
1 “I ndeebonaniirie kîrî bara bataambûrithîria,ndoonwa i bara bataancûaga.
Kîrî mûgongo ûra ûteeta riîtwa rîakwa,
ndauga, ‘Ndî aaga, i niû ûyû.’
2 Mûthenya unthe ntaambûrûkîîtie njara ciakwa,
kîrî antû beeyîîtie,
bara bathiiyaga na njîra itarî mbega,
bathingatîîte mathûgaania maao bongwa.
3 Antû banthûûragia rîonthe,
mbere ya ûthiû bwakwa,
bakîrutagîra igongwana tûmîndaani,
na kûbîîthîria macoco ithînjîrooni bia matubaarî.
4 Bara bakaraga gatîgatî ka nthiko,
na kûmaama gatîgatî ka bantû aago a witho,
bara barîîyaga nyama cia ngûrwe,
na bara nyûngû ciao ciîgagua irî na nyama irî na mûgiro.
5 Antû bara baugaga, ‘Kara naara, menya ûûya akubî naani.
N'ûntû niû ndî ûmûtheru mûno nkûrûki yaku!’
Antû ta babu i ntoogo nyiûrûûni ciakwa,
mwanki ûra wankanaga mûthenya unthe.
6 Raitha, kiugo gîkî kîandîkîîtwe mbere yakwa,
‘Ntiikira îndî nkaarîa,
îî, niû nkabarea îrîi rîao ibaraani biao,
7 meeyia meenu na ma baabaagu,’
i bu Mwathani akuuga.
‘N'ûntû ibaabîîthîîrie igongwana irîmaani,
na baandumangîra tûrîmaani,
nkaabathimîra mpîîni ciao,
îkaanûkia rîra rîbabatîîrie n'ûntû bwa ngûgî ciao cia mbere.’ ”
8 Ûûgû i bu Mwathani akuuga,
“Wa ta rîra ndibei yoonekaga kîgarooni gîa ncabiibû
na antû bakauga, ‘Menya bûkîînyangia,
nwa kûrî na kawega ndeeni yakîo,’
nwabu nkaarûtha kîrî aruti ngûgî baakwa,
ntibathiria bonthe.
9 Nkaareeta nciarwa kuuma kîrî Njakubu,
na kuuma Njunda bara bakeegwatîra irîma biakwa.
Antû baakwa bara bathuure bakeegwatîra bio,
na aruti ngûgî baakwa bagaatûûra ku.
10 Saroni îgaatuîka rûriî rwa kûrîîthia ng'ondu,
na Kîbonde gîa Akori nakîo bantû akûmaamia ng'ombe,
n'ûntû antû baakwa baganceria.
11 Îndî biû bara bûtigaga Mwathani
na bûkariganîrua i kîrîma gîakwa kîîtheru,
bûkaarîra Mbaari meetha
na bûkaûyûria mbakûri ndibei yunganîîtue n'ûntû bwa Meni,a
12 Nkabûrekeeria bûûragwe na rûûyiû,
na bwinthe bûgaakuamîîria kaingo bûûragwa,
n'ûntû ndeetanire îndî bûtaambîtîga,
ndaaria îndî bûtaathikîîria.
Bwarûthire ûthûûku mbere yakwa,
na bwathuura bûra bûtankenagia.”
13 Kwoogu, Mwathani Ngai ariuga,
“Aruti ngûgî baakwa bakaarîa,
îndî biû bûkaathi na yûûra.
Aruti ngûgî baakwa bakaanyua,
îndî biû bûkaathi na bûûta.
Aruti ngûgî baakwa bagaakena,
îndî biû bûkaagîa îgi.
14 Aruti ngûgî baakwa bakaina
n'ûntû bwa gîkeno gîa nkoro ciao,
îndî biû bûkaarîra,
n'ûntû bwa kîeba gîa nkoro,
na bûminûke i kwinyîîrîka gwa nkoro.
15 Bûgaatiga riîtwa rîenu
kîrî athuure baakwa rîrî kîrumi.
Mwathani Ngai akabûûraga,
îndî kîrî aruti ngûgî baake akabaa riîtwa rîngî.
16 Woora akeethaarimithia nthîgûrû,
akeethaarimithia woogu kîrî Ngai wa ûmma.
Ûra ûnyunyaga muuma nthîgûrû,
akaathiîtia na Ngai wa ûmma.
N'ûntû mathîîna ma tene makaariganîria,
na maithwe meethooni maakwa.
Îgûrû rîîyerû na nthî înjerû
17 Raitha, nkaûmba
îgûrû rîîyerû na nthî înjerû.
Mantû ma mbere matiiririkanwa,
kana maaya mathûgaaniani.
18 Îndî kenaani na bûgwîrue rîonthe
i bira nkaûmba,
n'ûntû nkaûmba Njerusaremu îtuîke bantû a gîkeno
na antû baayo gîkeno.
19 Ngaakeneera Njerusaremu,
na nkeneere antû baakwa.
Kayû ga kûrîra na kûminûka,
gatiîguîka ku kaîrî.
20 Gûtikooro kwîthîrwa
kûrî na gûkua gwa kagenke ga ntugû inkai,
kana mûkûrû atagîkûra mîanka yake.
Ûra agaakua arî na mîanka îgana,
agaatarwa arî mwana ûmwîthî.
Na ûra atagîkinyithia mîanka îgana,
agaatarwa arî ûmûrume.
21 Bagaaka nyomba na batûûre ku,
bakaanda mînda ya mîcabiibû na barîe matunda maayo.
22 Batiaka nyomba kaîrî antû bangî batûûra ku,
kana baanda antû bangî barîa.
N'ûntû wa ta ntugû cia mûtî,
nwa ta bu ntugû cia antû baakwa.
Antû baakwa bara bathuure bagaatûûra gûkeneera
ngûgî cia njara ciao.
23 Batiitiira muuru ûtheri,
kana bagîa aana na thîîna,
n'ûntû bakeegua barî antû baathaarime i Mwathani,
bo na nciarwa ciao.
24 Mbere baromba nkabacookeria,
wa bakîaragia nkeegua.
25 Ncûûgi na ng'ondu ikaarîa bantû amwe,
na cimba îkaarîa nyaki ta ng'ombe,
îndî tîîri îkeegua îrî irio bia njoka.
Itiigûraria kana ithûûkia
kîrîmaani gîakwa kîonthe kîra kîtheru,”
i bu Mwathani akuuga.