Îgamba na wîrîgîîro
66
1 Ûûgû i bu Mwathani akuuga,“Îgûrû i gîtî gîakwa kîa ûnene,
na nthîgûrû n'ûkinyithio bwa magûrû maakwa.
Îrî kû nyomba îra bûkaambakîra?
Bantû aakwa a kûnogoka akeegua arîkû?
2 Anga ti njara yakwa yaarûthire into bibi bionthe,
na bionthe biethîrwa birî oogo?”
Ûgu i bu Mwathani akûûria.
“Muntû ûra ngaûkîîria i ta ûyû,
i muntû ûra wînyiiagia na eerirîîte nkorooni,
na ainainaga eegua kiugo gîakwa.
3 Îndî ûra athînjaga ncamba,
akari ta muntû ûra aûragaga muntû.
Na ûra arutaga ng'ondu,
akari ta muntû ûra aunaga kurû nkingo.
Ûra arutaga kîewa kîa irio,
akari ta ûra ûreetaga nthakame ya ngûrwe.
Na ûra ûbîîthagia macoco ma mûririkana,
akari ta muntû ûra agongaga mûbuanaano.
Bathuurîîte njîra ciao bongwa,
na nkoro ciao ikenaga i mîgiro yao.
4 Kwoogu naani nkabathuurîra kînyamaara,
na nkabareetera ûguaya.
N'ûntû rîra ndeetanire, gûtirî we wambîtîga,
rîra ndaariirie, gûtirî we aathikîîria.
Baarûthire ûthûûku meethooni maakwa,
na baathuura kûnthûûria.”
5 Thikîîriani kiugo kîa Mwathani,
biû bara bwinainaga bwakîîgua.
“Aruanyûkwe bara babûthwîre,
na babûta n'ûntû bwa riîtwa rîakwa, baugîîte,
‘Ka Mwathani ûkumue,
kaingo twona gîkeno gîaku!’
Amwe na ûgu bakaagîa îgi.
6 Thikîîria gîtuma gîku gîkuuma taûni,
thikîîria gîtuma gîku gîkuuma Nyomba ya Ngai!
I kayû ka Mwathani,
akîrea anthû baake kîonthe kîra kîbabateerie.
7 Mbere agwatwa i rûgakaî rwa mwana,
aagîa na mwana.
Mbere agwatwa i rûgakaî,
aagîa na kaana ga kaîyî.
8 N'ûû aaro eegua ûntû ta bûbu?
N'ûû aaro oona mantû ta mamu?
Nthîgûrû nwa îciarwe na ntugû îmwe
kana mûgongo woneka nthûti îmwe?
Amwe na ûgu nthûti warîra Sayuuni yagwatirwe i mûrimo
nwarîo aaciarire aana baake.
9 Ga nkinyia kagiita ga gûciara
na nkarega gûciara?”
I bu Mwathani akûûria.
“Ga nkainga nda
na i niû nciarithagia?”
I bu Ngai wenu akûûria.
10 “Kena amwe na Njerusaremu na gwîrua n'ûntû bwake,
biû bwinthe bûmîendeete.
Kenaani nainya amwe n'we,
biû bwinthe bûmîrîragîra.
11 N'ûntû bûgoonka na bûbae,
nyontooni ciake cia kûbooreria,
ûkaanyua mûno,
na ûkeneere wingî bwa mwago wake.”
12 N'ûntû Mwathani ariuga ûûgû,
“Ngataambia ûkiri kîrî we ta muuro,
na ûtonga bwa mîgongo ta muuro ûtaûkanîîte.
Bûgoonka na bûkamatwe na rwaru,
na bûthathaîgwe bûrî bierooni.
13 Wa ta bûra mwekûrû abooragîria kaana gaake,
i bu nkaabûboreeria,
na bûkaaboreerua bûrî Njerusaremu.”
14 Rîra bûkoona ûûgû, nkoro cienu igaakena,
na bûkaaririma ta nyaki.
15 Ene, Mwathani n'aayîîte na mwanki,
na nkaarî ciake cia ndûa ikari ta kîbuubani.
Akeendamia mûthûûro gwake na ngoga,
na kûgondoka gwake kûrî na ndîrîmbî ta cia mwanki.
16 N'ûntû Mwathani akaagiitîra antû bonthe îgamba
na mwanki na rûûyiû rwake,
na bara bakaûragwa i Mwathani i baingî.
17 “Bara beebathûraga na bakeetheria bathi tûmîndaani, bathingatîîte ûra arî gatîgatî ga tûmîînda nyuma ya îmwe ya nyomba ciaku, na bara barîîyaga nyama cia ngûrwe na mbea na into bingî bira bigwatithanagia mûgiro, bakaathiranîria amwe, i bu Mwathani akuuga.
18 “Naani n'ûntû bwa ngûgî ciao na mathûgaania maao, ndî akubî kûûya na mbîthîranie mîgongo yonthe na ndwaria, na bakaaya boone mwago wakwa.”
19 “Nkaiga kîonanîîria gatîgatî kaao, na ngaatûma bara batigeere kîrî mîgongo, kîrî Tarisisi, kîrî Puri na Arundi (bara baiyîkeene n'ûntû bwa kûgera mîgwî), kîrî Tubari na Angiriki, na kîrî icîgîîria bia kûraaya bara bateegîîtue mantû ma nkuma yakwa kana boona mwago wakwa. Bakaugîîria ûkumio bwakwa gatîgatî ka mîgongo. 20 Na bakaareeta aruanyûkwe bonthe, kuuma mîgongooni yonthe, kîrîmaani gîakwa kîîtheru Njerusaremu kîrî kîewa kîrî Mwathani barî mbaraathiini, nkaarîîni cia ndûa na nyûmbû na nkamîîra,” i bu Mwathani akuuga. “Bakabareeta, Aisiraeri bakîreeta biewa bia irio, Nyomba ya Mwathani birî intooni biitheru. 21 Na kinya nkaathuura bamwe baao batuîke athînjîri ba Ngai na Arawi,” i bu Mwathani akuuga.
22 “Wa ta bûra îgûrû rîîyerû na nthî înjerû ira nkaarûtha igaatûûra mbere yakwa, nwabu riîtwa rîaku na nciarwa ciaku igaatûûra,” i bu Mwathani akuuga. 23 “Kuuma Kûyiûka kwa Mweri kûthi ûra ûngî, na kuuma Sabatû îmwe kûthi îra îîngî, antû bonthe bakaaya na beendamîîre mbere yakwa,” i bu Mwathani akuuga. 24 “Na bakaumagarûka baraithîîrie biimba bia antû bara bambûûmîîrie kîongo. Maginyo maao matiikua, kana mwanki wao wora, na bakaamenwa n'antû bonthe.”