Mwîto kîrî bara barî na bûûta
55
1 “Ncûûni bwinthe biû bûrî na bûûta,ncûûni bûnyue rûûyî
wana wegua ûtirî na mbia,
ncû ûgûre na ûrîe.
Ncû ûgûre ndibei na îria,
gûtarî na mbia kana ngarama.
2 I mbi îgaatûma ûtûmîra mbia na irio bitarî ara birî
na winyamaaria na gîntû gîtakûbaithia?
Thikîîria, nthikîîria ûrîe gîntû kîra kîega,
na nkoro yaku îgakeneera irio bira biega mûno.
3 Tega gûtû na ûûye kîrî niû,
mbîgua na nkoro yaku îgaatûûra mwoyo.
Nkaarûtha kîrîîkanîro gîa tene na tene naawe
ngakwenda na mma wa ta bûra ndeerîîre Ndaundi.
4 Raitha, i mûtuîkithîîtie mûnkûûyî kîrî antû,
mûtongoria na mûrûngamîîri wa antû.
5 Na mma ûkaathaga mîgongo îra ûtaiyî
na mîgongo îtakwiyî îgakuugagîria
n'ûntû bwa Mwathani Ngai waku,
Ûra Mûtheru wa Isiraeri,
n'ûntû n'atûmîîte wagîa na gîtîîyo na mwago.”
6 “Ceriani Mwathani rîra aûmba kwonekana,
na bûmwîte rîra arî aakubî.
7 Tiga bara bathûûku batigane na njîra ciao,
na bateyanîrie mathûgania ma kûrûtha ûthûûku.
I bagarûkîre Mwathani na akabeegîîrua kîao,
bagarûkîre Ngai n'ûntû akabarekera na wendo.
8 N'ûntû mathûgania maakwa ti mo mathûgania maaku,
na njîra ciakwa ti cio njîra ciaku,”
ûgu i bu Mwathani akuuga.
9 “Wa ta bûra îgûrû rîrî kûûraaya na nthîgûrû,
ûgu i bu njîra ciakwa irî îgûrû nkûrûki ya njîra ciaku,
na mathûgania maakwa nkûrûki ya mathûgania maaku.
10 Wa ta bûra mbura na mbaraabu,
biîndamaga kuuma îgûrû,
na biticookaga
bitaambîîte kûrinda nthî,
bitûma into biuma na bikûra
kaingo îciara irio kîrî mwandi na biakûrîa kîrî mûrîi,
11 ûgu i bu kiugo gîakwa kîra kiumaga kanyua gaakwa gîkari.
Gîtiincookera kîrî kîtheri.
Gîkaarûtha bûra nkwenda kîrûtha,
na kîûyûrie mûbango ûra ûtûmîîte ngîtûma.
12 Ûkaumagarûka na gîkeno
na ûtongoreerue na ûkiri.
Irîma na tûrîma
bikaina nyîmbo mbere yaku.
Na mîtî yonthe ya kîthaka
îkaaringa mpî ciayo.
13 Bantû a mîtî ya mîîgua, mîtarakwa îgaakûra.
Na bantû a thûngûûca, mîthithinda îgaakûra.
Mantû mama makaareetera Mwathani ûkumio,
marî rwano rwa tene na tene,
rûra rûtakîînyaangua.”