Ûkumio bwa Sayuuni bûra bûkaaya
54
1 Ûûgû i bu Mwathani akuuga, “Ina, îî woû mwekûrû nthaata,woû ûra ataaro agîa na mwana.
Anjîîria kwina na uugîîrie i gîkeno,
wou ûra atooro aayua mûrimo wa mwana,
n'ûntû aana ba mûka ûra aatiganîîrue bakaingîa,
nkûrûki ya ba ûra akaraga na mûkûrû wake.
2 Aramangia îrema rîaku,
ûtaambûrûkie itambaa bia îrema rîaku,
na ûtikeegwate,
raayîithia mîkanda yarîo,
na ûneneithie nyambo cia rîo.
3 N'ûntû ûkaarama bwa njara ya ûrîo na njara ya kîmotho,
nciarwa ciaku igaatuunya antû gûntû kwao
itûûre taûni ciao ira itarî na antû îîndî.
4 Ûtigaakuthûke, ûtiigîa îgi.
Ûtigaakuthûke i nthoni, ûtiirwa îgi.
Ûkaariganîrua n'îgi rîra wagîîre ûrî mwana mûnyi,
na ûtiiririkana îgi rîa îgiita rîra warî ntigwa.
5 N'ûntû Mûûmbi waku n'we mûkûrû waku,
Mwathani Mwene Inya i rîo riîtwa rîake.
Ûra Mûtheru wa Isiraeri n'we mwonokia waku,
eetagwa Ngai wa nthîgûrû yonthe.
6 Mwathani agagwîta ûcooke
ta mûka ûra aarî ûmûtiganîrie na ainyîîrîka mathûgania,
ta mûka ûra agûrirwe arî ûmûniini
aacooka aatiganîrua naagu,”
i bu Ngai waku akuuga.
7 “Gwa kagiita gaakai,
indaagûtiganîîrie,
îndî ndagûcookia na wendo bûûnene mûno.
8 Ndî na mûthûûro ûmûnene,
indaakwithire ûthiû bwakwa gwa kagiita gaakai,
îndî n'ûntû bwa kîao gîa tene na tene
ngakwîgîîrua kîao na nkwende,”
ûûgû i bu Mwathani Mwonokia waku akuuga.
9 “Kîrî niû ino i ta ntugû cia Nuu,
rîra ndaathiîtiirie atî rûûyî rûra rwa kagiita ka Nuu,
rûtiikunîka nthîgûrû kaîrî.
Kwoogu îîndî nkûthiîtia ndauga ntikûthûûrîra kaîrî,
na ntikûgondokera kaîrî.
10 Kinya irîma bikainainua
na tûrîma tûkaathiiyangua
wendo bwakwa bûra bûtathiraga kîrî woû bûtienyeenyua
kana kîrîîkanîro gîakwa kîa ûkiri kîrutarutwa oogo,”
ûgu i bu Mwathani ûra akwendeete akuuga.
11 “Îî woû taûni îra înyamaarîîtue,
îra îriingaangîîtwe n'ibuubani na îtiganîrîîtue,
ngagwaka na maiga mara meetagwa takwici,
mûcingi waku ûgaakwa na cabire.
12 Ngaaka ibayo biaku na maiga ma goro,
mîrango ya mîîrîga yaku na maiga mathongi
na nthingo ciaku na maiga mathongi ma goro.
13 Aana baaku bonthe bakaarutanwa i Mwathani
na ûkiri bwa aana baaku bûkeegua bûrî bûûnene.
14 Ûkaandwa wagîruuni
Kwinyanîîria gûkeegua kûrî aaraaya naawe.
Ûtiîgua ûrî na gîa gûkuthûka,
kîmako gîkeegua kîrî aaraaya naawe,
gîtiîya akubî naawe.
15 Wana muntû ûûya gûkwithûkîra, ti niû nkeegua mûtûmîîte,
ûra wonthe agaakwithûkîra ûkamûcinda.
16 I niû mbûûmbîîte mûturi,
ûra abuagîîra makara makaûmbûka rûrîrîîmbî,
na agatura mathaga ma ngûgî yake.
Wana i niû mbûmbîîte mûcikaarî,
ûra atûmagîra mathaga kûûragana.
17 Gûtirî îthaga rîgaatûmîrwa gûkûthûûkia rîkaûmbana
na ûgaakiria tûnyua tunthe tûra tûgaagûûkîîra.
Rûrû i rûgai rwa aruti ngûgî ba Mwathani,
na ûûgû i bu nkaabarwagîîra,”
ûgu i bu Mwathani akuuga.