53
1 N'ûû eetîgia ntûmwa yetû?Na n'ûû Mwathani aguûrîrîte njara yake?
2 Aakûrîîre mbere yake ta kamûtî koothe,
ta mûri ûkiuma nthî îmbûûmagaru.
Ataarî na ûthongi kana mwago wa gûtûkuuyia kîrî we,
mwonekere wake ûtaarî na gîntû gîgîtûma tûmwenda.
3 Aabûthîîrue na aaregwa n'antû,
muntû wa kîeba, ûra amenyeerie kînyamaara.
Ûra antû baûndûkagîria mûgongo na bakaraitha naara kûngî.
Aabûthîîrue na tûtaatindanîra n'we.
4 Namma n'we aakamatire mawonje meetû,
na aathûkia bieba bietû.
Îndî twathûkiirie thîîna ciake ciarî îkaanûkia kuuma kîrî Ngai,
îkanûkia n'ûntû bwa meeyia maake.
5 Îndî aamuntirwe n'ûntû bwa ûremu bwetû
aathontorua n'ûntû bwa meeyia meetû.
Aabûûrirwe kaingo tûgîa na ûkiri,
na n'ûntû bwa ibooko biake tworua.
6 Tiû twinthe, wa ta ng'ondu, i tûnyagaarîîte,
woora muntû athiingata njîra yake.
Îndî Mwathani amwaîkia,
mûrigo wa meeyia meetû twinthe.
7 Ainyîîrua na aanyamaarua,
îndî ataaria.
Aatongoreerue ta ng'ondu îthiîte kûthînjwa,
na wa ta bûra ng'ondu îkiraga mbere ya mûmîenji,
n'we ataatumûra kanyua gaake.
8 Aagiitîîrwe îgamba bûra gûtaabatîîrue
aarutwa oogo.
Na n'ûû aûmba kwaria îgûrû rîa nciarwa ciake?
N'ûntû aagiitîîrwe ûtûûro bwake kuuma nthîgûrû ya bara barî mwoyo.
Aûragirwe n'ûntû bwa meeyia ma antû baakwa.
9 Nthiko yake yarî gatîgatî ga antû baathûûku,
aathikanîrua na itonga.
Wana wegua ataacwîte ûgîti,
kana atûmîra ûrongo.
10 Îndî bwarî wendo bwa Mwathani kûmûthontoria na gûtûma anyamaara,
ûtûûro bwake i bûtuîkîîte kîgongwana n'ûntû bwa wîyia.
Akoona nciarwa ciake na oongeerwe ntugû ciake,
na wendo bwa Mwathani bûkaûyûra gûkûrûkîîra we.
11 Nyuma ya kûnyamaarua gwa nkoro yake,
akoona werû bwa ûtûûro na aganîrwe.
Gûkûrûkîîra ûmenyo bwake
mûruti ngûgî wakwa ûmwagîru agaatûma antû baingî
batarwa barî baagîru,
n'ûntû agaakamata meeyia maao.
12 Kwoogu nkamwa rûgai gatîgatî ga antû bara barî îgweta,
na akaagaa mataa na antû bara barî na inya,
n'ûntû n'anenkanîîre mwoyo wake aakua,
na aataranîrua amwe na eeyia.
N'akamatire meeyia ma baingî,
na aarombera aregi.