Sayuuni îkene
52
1 Ûkîîra, ûkîîra, îgîa inya yaku, Woû Sayuuni,Îkîra nguo ciaku ira nthongi,
woû Njerusaremu, taûni întheru.
N'ûntû kuuma îîndî gûtirî we akaathûûngîra ndeeni yaku.
Muntû atarî mûtaane,
kana ûra arî na mûgiro.
2 Îîturature tîîri ûthi,
Ûkare nthî, Woû Njerusaremu,
îîtharie ithaîko bia nkingo yaku,
woû Njerusaremu, mwarî wa Sayuuni ûra aathaîkîîtwe.
3 N'ûntû Mwathani ariuga ûûgû,
bwendiirue ûtheri,
naabi bûgaakûûrwa gûtarî mbia.
4 N'ûntû Mwathani Ngai ariuga ûûgû,
antû baakwa rîa mbere bathiire Miisiri, kaingo batûûra noogo ta ageni,
na Asîîria babainyîîria gûtarî gîtûmi.
5 Mwathani ariuga,
“Kwoogu îîndî, nkaarûtha ata aaga,
ûkeegua antû baakwa bataîtwe mana?
Bara baabaathaga i bakûriinga gîtuma.
Na riîtwa rîakwa i rîgûcaambua rîonthe mûthenya unthe.
6 Kwoogu antû baakwa bakaamenya riîtwa rîakwa,
na kwoogu ntugû înu bakaamenya,
i niû ndaaroriirie,
yîî i niû.”
7 Ka marî mathongi ata îgûrû rîa irîma,
magûrû ma antû bara bareetaga ntheto îmbega.
Bara batûmagîîria ûkiri,
bara bareetaga ntheto îmbega ya mantû meega,
bara batûmagîîria wonokio,
bara beeraga Sayuuni, Ngai waku arî wathaniini!
8 Tûyû twa akaria baaku!
I bagûûkîîria tûyû twao, i bakwina barî amwe.
N'ûntû bakoona na meetho maao,
bûra Mwathani agaacooka Sayuuni.
9 Ringaani gîtuma gîa gîkeno, inaani amwe,
biû gûntû kwa Njerusaremu kûra kwarî maganjo,
N'ûntû Mwathani n'akirakirîîtie antû baake,
n'akûûrîîte Njerusaremu.
10 Mwathani aigîîte bûûrîîni njara yake întheru
Meetho ma mîgongo yonthe.
Na mîthia yonthe ya nthîgûrû,
îkoona wonokio bwa Ngai wetû.
11 Îthi, îthi umagara ûthi uume aaga,
ûtigaatonge gintû kîrî mûgiro!
Umaani kîrî yoo na wîgue ûrî mûtheru,
biû bara bûkamataga into biitheru bia Mwathani.
12 Îndî ûtiithi na mpwî
kana uugia ûkuthûkîîte.
N'ûntû akaathi arî mbere yaku,
na Ngai wa Isiraeri akeegua akûrigîîrîîtie,
nyuma yaku.
Mûruti ngûgî wa Mwathani
13 Raitha, mantû ma mûruti ngûgî wakwa makaathi bwega,
agaûkîîrua îgûrû na aneneithue mûno.
14 Na wa ta bûra kwarî na baingî baarigaragua n'we,
n'ûntû mwonekere wake n'warî ûmwînyangie nkûrûki ya antû bonthe,
na mûûmbîre wake weenyangua wakara ta ûtarî wa muntû.
15 Akaamakia mîgongo imiingî,
anene bakaaga bwa kuuga mbere yake.
N'ûntû bûra bateerwa, bakeebonera,
na bûra bateegua, bagaaciûkîrwa.