Ithaarimo bira antû ba Ngai bagaigîrîtwe
51
1 “Nthikîîriani, biû bara bûthiingataga wagîru,biû bara bûceragia Mwathani.
Raithaani rwara rûra bwarutirwe na njîra ya gûcaîgwa,
na îrinyani rîra bwaukûrirwe.
2 Raitha Îburaîmu, abaagu
na Saara ûra aabûciarire.
Rîra ndaamwîtire aarî wenka,
rîru ndamûthaarima ndamûthagayia.
3 N'ûntû Mwathani agaakirakiria Sayuuni,
na araithe maganjo maayo monthe na kîao.
Agaatûma ng'aarû ciake ikara ta Endeni,
na matuumo maayo makara ta mûnda wa Mwathani.
Gîkeno na gûkûngwîra bikoonekana ndeeni yake,
amwe na nkaatho, na tûyû twa kwina.
4 Nthikîîriani, biû antû baakwa
nthikîîriani mûgongo wakwa.
Watho bûkauma wakwa,
na kûrûtha bûra kûbatîîrue wakwa gûtuîke werû bwa mîgongo.
5 Kûrûtha bûra kûbatîîrue wakwa kûrî akubî,
wonokio bûrî njîraani
njara ciakwa ikaagiitîra mîîrîga ya antû magamba,
icîgîîrio bikaambîrîgîîra,
nabio bikeerîgîîra na gweteera kuumania na njara yakwa.
6 Ûkîîriani meetho meenu îgûrû,
bûraithe nthîgûrû ruungu.
Îgûrû rîkaûra ta ntoogo,
Nthîgûrû îkaathira ta nguo
nabo bara batûûraga ndeeni yayo bakue ta ngi.
Îndî wonokio bwakwa bûkeegua bûrî bwa tene na tene,
na wîtîgîka wakwa gûtiithira rî kana rî.
7 Nthikîîriani, biû bara bwiyî bûra kûbatîîrue,
biû antû bara barî na watho bwakwa nkorooni cienu.
Bûtikaamake i gûcambua n'antû,
kana bûguaya n'ûntû bwa irumi biao.
8 N'ûntû ndugunye ikabarîa ta nguo,
na maginyo mabenje ta guaya.
Îndî wîtîgîka wakwa gûgaatûûra tene na tene,
na wonokio bwakwa i bwa nciarwa cionthe.”
9 Ûkîîra, ûkîîra, îgîa inya,
woû njara ya Mwathani.
Ûkîîra wa ta ntugûûni ira cia mbere,
ta ya nciarwaani ira cia tene.
Anga ti woû wagiitangire nyamû îra nene ya îria îîtagwa Raabu tûcuncî tûcuncî,
ûra aûragire njoka îra?
10 Ti woû wabwethiirie îria,
na rûûyî rwa ndia îînene,
Ûra aatûmire ndia ituîka njîra,
Kaingo antû bara baakûûrîîtwe bakûrûka?
11 Nabo bara bakûûrîîtwe i Mwathani bagaacooka,
bagaakinya Sayuuni, bakiinaga.
Gîkeno gîa tene na tene gîkeegua kîrî îgûrû rîa atongoria baao.
Bakoona gûkûngwîra na gîkeno.
Kîeba na gwankanwa bikaugia.
12 “Niû, yîî, niû, i niû ngûkirakiragia,
ka ûrî ûû woû n'ûntû ûgûkuthûka muntû ûra agaakua,
na muntû ûra agaakara ta nyaki?
13 Woû wariganîrua i Mwathani Mûûmbi waku,
ûra aûmbire îgûrû,
na aaka mîcingi ya nthîgûrû.
Ûtûûraga na ûguaya mûthenya unthe
n'ûntû bwa mûthûûro wake we ûra ainyanagîîria,
ûra eethuuranagîra kwînyangia.
Ûrî kû mûthûûro wake we ûra ainyanagîîria?
14 Ûra athaîkwa bara barî ûguaya bakarugûrîrwa na mpwî.
Na batiikuîra nceera yao,
na batiaga biakûrîa.
15 N'ûntû niû i niû Mwathani, Ngai wenu,
ûra aunjugûraga îria makûmbî marîo makagondoka.
Mwathani Mwene Inya i rîo riîtwa rîake.
16 Naani i mbîkîrîte mîgambo yakwa kanyuani gaaku,
na ndakûguîkîra na mûgunye wa njara yakwa.
Niû ûra aarûngîkire îgûrû kaanyaani kaayo,
ûra aigire mîcingi ya nthîgûrû,
na ûra eeraga Sayuuni, ‘Biû bûrî antû baakwa.’ ”
17 Ûkîîra, ûkîîra, rûngama, woû Njerusaremu,
woû ûnyuîte kuuma njaraani ya Mwathani,
gîkombe kîa mûthûûro wake.
Wanyua na wanyuûkîîria mbakûri ya gûtogoonia.
N'ûmînyuîrîîte na wamînyuûkîîria.
18 Gûtirî nwa ûmwe wa kûbûtongoreeria
gatîgatî ka aana bonthe bara aaciarire,
na gûtirî nwa ûmwe wa kûmûgwata njara
gatîgatî ka aana bonthe bara aarerire.
19 Mantû mama maîrî makûûyîîrîîte,
n'ûû ûûmba gûgûkirakiria?
Ûrî na kînyamaara na kwînyangua, yûûra na ndûa,
n'ata nkaûmba gûkûthathaa?
20 Aana baaku i baagirîku,
Bamaami koonaani cia njîra ira nene cionthe
ta nthia neetiini,
Baûyûri mûthûûro wa Mwathani,
kîrumi kîa Ngai waku.
21 Kwoogu, thikîîria kiugo gîkî, woû ûra wanyamaarîîtue,
watogoona, na t'ûntû bwa ncoobi.
22 Ûûgû i bu Mwathani Mwene Inya, Ngai waku akuuga,
Ngai waku ûra athetagîîra antû baake.
“Raitha, nkûrutaruta kuuma njaraani yaku
gîkombe kîra gîatûmire ûtaratara,
kuuma gîkombeeni gîku, na n'yo mbakûri înu ya mûthûûro wakwa,
ûtimînyuîra kaîrî.
23 Ngagîîkîra njaraani cia bara bakûnyamaaragia,
bara baakwîrire,
‘Maama nthî na nda tûthiîre îgûrû rîaku.’
Naawe watuîkithiirie mûgongo waku ta nthîgûrû,
kana njîra ya kûthiiyagîrwa.”