Ûteethio bwa Mwathani
50
1 Mwathani ariuga ûûgû,“Îrî kû baarûa ya kwonania incookeetie nyûkwe,
îra ndaamûcookiirie n'yo?
Kana i kîrî ûû
ndaabwendiirie.
N'ûntû bwa meeyia meenu, ibwendiirue,
na n'ûntû bwa meeyia meenu banyûkwe beengatua.
2 Rîra ndaayire i kî n'ûntû gûtaarî na muntû?
Rîra ndeetanire i kî n'ûntû gûtaarî na wa kûmbîtîga?
I ka njara yakwa yarî înkubî mûno ya kûbûkûûra?
Kana i ntarî na inya ya kûbûtuunyûkia?
Rîra ngondokaga îria irîbweyaga,
na ngaatuîkithia miuro ng'aarû.
Makûyû maayo makoora i kwaga rûûyî
na magakua i bûûta.
3 Nguîkagîra îgûrû na mwindu,
na nkarîîkîra mathango irî nguo cia rîo.”
4 Mwathani Mwene Inya n'ampeete rûrîme rûûrutane,
kaingo mmenya bûra ngaateethia ûra mûnogu na mîgambo.
Aambûkagia wa kîra rûkîîrî,
agatûma gûtû gwakwa kûthikîîria ta kwa muntû akûrutanwa.
5 Mwathani Mwene Inya n'ankunûrîîte matû maakwa
na nteegua ndî ûmûûmo kîongo,
na ntaacooka nyuma.
6 Ndaanenkanîîre mûgongo wakwa kîrî bara baandiingaga,
na mpou ciakwa kîrî bara bankûûraga kîreru.
Ntaitha ûthiû bwakwa
ntîkaanyûrûntwe kana ntuîrwa mata.
7 N'ûntû Mwathani Mwene Inya n'anteethagia,
ntiigîa îgi.
Kwoogu imbûmîîtie ûthiû bwakwa ta iiga,
na imbiyî ntiigîa îgi.
8 Ûra aandûthagîra bûra kûbatîîrue arî akubî,
aabu n'ûû akaanthitaanga?
I tûrîîkane tûrî baîrî!
N'ûû akûnthitaanga?
Nanthengeere ingî!
9 I Mwathani Mwene Inya anteethagia,
n'ûû akaangiitîra îgamba kwîgua ndî na mabîtia?
Bonthe bakaathira ta nguo,
i ndugunye i kaabarîa.
10 N'ûû gatîgatî keenu atîîyaga Mwathani,
aathîkagîra kayû ka mûruti ngûgî wake?
Ûra athiiyaga mwinduuni,
ûra atarî werû,
eetîgagie ndeeni ya riîtwa rîa Mwathani,
na eerîgîîre Ngai wake.
11 Îndî îîndî biû bwinthe bwankanagia mwanki,
biû bwîmuntagîria iciinka,
thiîrani werûûni bwa mîanki yenu,
na bwa icinka bira bwamuntiirie.
Gîkî i kîo bûkoona kuuma njaraani yakwa,
mûthia wenu ûkeegua ûrî wa kînyamaara.