Mûruti ngûgî wa Mwathani
49
1 “Nthikîîriani, biû icîgîîrio,biû mîîrîga ya antû bara bûrî kûûraaya mûno.
Mwathani aambîtire kuuma wa ndî nda,
kuuma nda ya taata aambîta na riîtwa rîakwa.
2 Nwe aatuîkithia kanyua gaakwa gaakara ta rûûyiû rûûgî,
mûgunyeeni wa njara yake n'amenyeereete;
na aandûtha ndaakara ta mûgwî ûmûtenderie,
thiakaani yake ndeeni i ku ambithîîte.
3 Ambîîra, ‘Woû ûrî mûruti ngûgî wakwa,
Isiraeri, ûra ndeeni yake ngaakumua.’
4 Îndî ndauga, ‘Ndîîthîînîîtie ûtheri,
ndaatûmîra inya yaakwa ûtheri gûtarî baita.
Îndî mma îgamba rîakwa rîrî na Mwathani,
îkaanûkia rîakwa rîrî na Ngai wakwa.’
5 Îîndî Mwathani ariuga ûûgû,
ûra ambûûmbire ntuîka mûruti ngûgî wake,
ncookia Njakubu kîrî we,
na mmwîthîranîria antû ba Isiraeri,
n'ûntû Mwathani n'ampeete gîtîîyo,
na aatûma ngîa inya.
6 Yîî, ariuga ûûgû,
‘N'ûntû bûniini mûno woû kwîgua ûrî mûruti ngûgî wakwa
kaingo ûûkîîria mîîrîga ya Njakubu,
na ûcookanîria antû ba Isiraeri bara batigeere.
Nkûrûki ya ûgu, ngakûruta ûtuîke werû kîrî antû ba mîgongo,
wîgue ûrî wonokio bwakwa mwanka mîthia ya nthîgûrû.’ ”
7 Ûûgû i bu Mwathani akuuga,
Mûkûûri na Ûra Mûtheru wa Isiraeri,
kîrî ûra abûthagîîrua na ameneetwe i mûgongo ûyû,
ûra arî mûruti ngûgî wa bara baathanaga.
“Anene bagakwona, barûûngame,
atongoria bakwona bakwîndamîîre,
n'ûntû bwa Mwathani ûra mwîtîgua,
Mûtheru wa Isiraeri ûra akûthuurîîte.”
Wîrane bwa gûcookanîîrua gwa Isiraeri
8 Mwathani ariuga ûûgû,
“Îgiita rîa gwîtîgîîrîka ngagûcookeria maromba,
na ntugû ya wonokio ngagûteethia.
Naani ngakûmenyeera na ngagûtuîkithia
kîrîîkanîro gîa antû baba,
kaingo ûcookanîria nthîgûrû îno,
na gûtûma bagaa rûgai rûra rwarî rûkûûra.
9 Mbîîra bara bathaîke ûûgû, ‘Umaani,’
nabo bara barî mwinduuni, ‘Onaani.’
Bakaarîîra rûteere rwa njîra,
na îgûrû rîa maiga bakoona ndîîthia.
10 Batiîgua yûûra kana beegua bûûta,
mwathû ûtibariinga, kana riûa rîbabîîthia,
n'ûntû ûra abeegagîîrua kîao akeegua arî mbere yao.
Yîî, akubî na inyaka bia rûûyî i noo akaabatongoragîîria.
11 Naani ngaatûma irîma biakwa bionthe bituîka njîra,
bamwe kuuma na njîra ciakwa cionthe ira nene igaûkîîrua.
12 Raitha, baba bakaaya kuuma kûraaya na raitha,
bakauma bwegûrû, na kuuma ûthwîro bwa riûa,
na baume bwa nthîgûrû ya Siyene.a
13 Inaani biû îgûrû, ûkene Woû nthîgûrû,
Ûkîîriani tûyû twa kwina, biû irîma!
N'ûntû Mwathani n'akirakirîîtie antû baake,
n'we akeegîîrua antû baake kîao bara banyamaaragua.
14 Îndî Sayuuni augire, ‘Mwathani n'antiganîrîtie,
Mwathani n'ariganîrîtue i niû.’
15 Anga mwekûrû aûmba kûriganîrua i mwana wake ûra oonkagia,
mwanka atamwîgîîrue kîao mwana ûra aciere?
Yîî, baba baûmba kûriganîrua,
îndî niû ntiiriganîrua i woû.
16 Raitha, nkwandîkîîte biîni bia njara ciakwa,
nthingo ciaku irî mbere yaakwa rîonthe.
17 Aana baaku i baangwîte, nabo bara baakûthiragia,
na bara bagûtuîkithîîtie îganjo, bakauma gwaku.
18 Ûkîîria meetho maaku, ûraithe nteere cionthe.
Aana baaku bonthe bakwîbîthîrania na kûûya kîrî woû.
Mwathani ariuga, ‘Wa ta bûra ntûûraga mwoyo,
i mma ûgeekîra bo bonthe ta maûa,
naawe ûkeegemia nabo ta mwiki.’
19 Wana wegua n'wenyaangîîtue na watigwa ûrî îganjo,
na nthîgûrû yaku yatuîka ya mana,
îndî îkeegua îrî niini ûntû îtakîganîra antû baaku,
nabo bara baakûmereetie bakeegua barî kûûraaya.
20 Aana bara baaciarirwe rîra wakwithîîtie,
bakauga ûkîîgagua,
‘Bantû aaga n'aniini, atikûûngana,
mpa kaanya mbone a gûkara.’
21 Rîru uuge nkorooni yaku,
‘N'ûû ûnciarîrîte aana baba,
na niû i nkuîrîîtwe n'aana baakwa, na ndî nthaata,
ndî ûmûthaamie na ndaamenwa,
n'ûû ûbarereete?
ndaatigirwe ninka,
baba nabo î, bauma kû?’ ”
22 Mwathani Ngai ariuga ûûgû,
“Raitha, ngeeta mîgongo
mbûkîîrie bendeera yakwa kîrî antû,
nabo bakaareeta aana baaku na njara ciao,
na bakamate aarî baaku na ituro.
23 Anene bakeegua barî ba abaagu bara baakûrerire,
nabo anene ba aka baao i bo banyûkwe bara baagwonkiirie,
bakeendamîîria moothiû maao mbere yaku,
na bacûne tîîri ya magûrûûni maaku.
Naawe ûkaamenya i niû Mwathani,
bara bambîrîgagîîra batiigîa îgi.”
24 Anga kwaûmbîka acikaarî barî na inya bagatuunywa into bira bataîte,
kana mîgwate îgaatuunyûkua kuuma kîrî acikaarî ncamba?
25 Îndî ûûgû i bu Mwathani akuuga,
“Yîî, mîgwate îgaatuunyûkua kuuma kîrî acikaarî
na bira bitae bituunyanwe kuuma kîrî acikaarî ncamba.
Nkaarûa na bara barûaga naawe,
na mbonokie aana baaku.
26 Ngaatûma bara babwinyagîîria barîa nyama ciao bongwa,
na batogoone n'ûntû bwa kûnyua nthakame yao, ta ndibei.
Rîru antû bonthe bakaamenya
atî niû, Mwathani, i niû mwonokia waku,
Mûkûûri waku, Ûra Mwene Inya wa Njakubu.”