Mwathani n'akanûkagia antû baake
48
1 “Thikîîriani, biû antû ba Isiraeri,bûrî ba mûciî wa Njakubu na mwîrîga wa Njunda.
Buugaga i bûûngongaga,
niû Mwathani Ngai wa Isiraeri,
îndî i bûrongoaga.
2 Buugaga Njerusaremu nuu mûciî wenu,
na bûkauga i niûgû Mwathani Mwene Inya Ngai wa Isiraeri
bwîgwatagia.
3 Îndamenyithanirie tene mûno bûra gûgakarîka,
na gûtarî kwaria kaîrî ndaatûma matuîkîka.
4 N'ûntû i ndaiyî ûrî ûmûûmo kîongo
na ûtiîrîkaga.
5 Ndabwîrire mantû mama mbere makinya,
kaingo rîra magaakarîka,
Bûtakiuga,
‘Ngai ira cietû tûgongaga i cio ciarûtha ûûgû.’
6 I bwegiirue bûra ndaugire,
na bwona bûgîkarîka.
Kuuma îîndî ûgu na kûthi mbere ngakwîra mantû maageni,
îgûrû rîa mantû ma witho mara bûtaaro bûmenya.
7 Îmunthî nkaarûtha ûntû bwaimbia,
bûtaaro bûbwîgua kaîrî,
ûntû bûra bûtaûmba kuuga
atî bûrabuîgua kaîrî.
8 Gûtirî rîo wegua ûrî na wîru,
bwa kûthikîîria bûra nkuuga.
N'ûntû imbiyî ûrî ûmûûmo kîongo,
kuuma rîra waciarirwe wetagwa ndemi.
9 Kaingo antû bakumia riîtwa rîakwa,
nkainyîkîria mûthûûro wakwa;
Ndîgwate buru,
ntigakwînyangie.
10 I ndakûgeriirie kagiita kara kaarî kaûmo,
wa ta bûra Fetha îtherûkagua na mwanki wa îturîro.
Na ndoona woû ûrî gîntû gîtarî gîtûmi.
11 Ndaarûthire ûûgû n'ûntû bwakwa ningwa,
ntiireka riîtwa rîakwa rîrega gûtîîywa.
Kana ngaana ûkumio bwakwa na muntû nwa ûrîkû,
bûbu bûbatîîrue bwîgua bûrî bwakwa ninka.”
Isiraeri yathaûrwa
12 “Antû baakwa bara nthuurîîte,
Isiraeri nthikîîriani.
Niû ninka i niû Mwathani,
i niû mwanjîîrio na mûthia.
13 Ndaûmbire nthîgûrû
na njara ciakwa ningwa,
na ndatambûrûkia îgûrû.
Na rîra mbaragia, bionthe
i bimbathîkagîra.
14 Ncûûni akubî naani,
bwîgue bûra nkuuga.
Kûrî nwa îmwe kîrî ngai inu cienu cia mîbuanaano,
yaaroria yuuga ûûgû gûgaakarîka?
Irauga kana mûcoore ûyû wakwa,
akaarûtha Mbabironi bûra nkwenda?
15 I niû ndaamûthuurire,
na i niû mmûkinyithîîtie agu akinyîîte,
na njîra ciake igaakara bwega.
16 Ncûûni akubî bwîgue bûra nkuuga,
kuuma kîambîrîria,
mbaragia ntakwitha mantû,
na ûntû bunthe ndaaria,
i bûûyûraga.
Mwathani Mwene Inya n'we antûmîîte na inya Kîrundu wake.
17 Ngai Ûra Mûtheru wa Isiraeri,
Mwathani ûra ûbwonokagia ariuga,
‘I niû Mwathani Ngai wenu,
ûra akwenda kûbûrutana kaingo bûtûûra bwega,
na abwerekeeria njîraani ira bûbatîîrue bûthi nacio.
18 Ûkeegua wathîkîîre maathana maakwa,
ithaarimo wîgua bikîthingatanaga naawe
ta rûûyî rwa muuro ûtabweyaga.
Ûûmbani gwîgua bûkari gwaku
ta makûmbî ma îria.
19 Nciarwa ciaku wîgua irî imbiingî
ta mûthanga wa îria.
Na nkîbamenyeera
batikeenyangue rî kana rî.’
20 Umaani Mbabironi,
îthiini bûrî bathaûre!
Kenaani na bûgwîrue,
bûmenyithanie gûntû kunthe,
Mwathani n'atunyûkîîtie mûruti ngûgî wake Isiraeri.
21 Natûtongoreetie twagiitîîra rwanda,
na aatûma tûnyua rûûyî,
kuuma rwaraani rwa iiga.
22 Îndî Mwathani augîîte,
‘Gûtirî mwîyia akeegua arî na ûkiri.’ ”