Mbabironi îkeenyangua
47
1 Mwathani ariuga,“Mbabironi mwarî ataamaama na muntû mûrûme,
Uma gîtîîni gîaku kîa ûnene,
ûkare nthî mûthetuuni.
Ûtigaakare gîtîîni kîa ûnene,
woû mwarî Mûkarindayo.
Ûkari ta taûni îtaataîgwa kaîrî,
îndî îîndî ûrî nkombo.
2 Ruta rwambambio rwaku,
wanjîîrie kûthia.
Kûma nguo ciaku na ûrute iraatû,
na ûringe miuro.
3 Ûtheri bwaku bûkaaguûrwa,
na îgi rîaku rîkoonekana.
Nkeerîîria,
na gûtirî we nkeegua kîao.
4 I niû Mwathani Mwene Inya,
Ûra Mûtheru wa Isiraeri.
I niû mwonokia wao.
5 Mbabironi kira,
na ûkare nthî mwinduuni.
N'ûntû gûtirî rîo mîgongo îgacooka gûgwîtîgîîria kaîrî,
ta mûnene wayo.
6 Rîra ndathûûri n'antû baakwa,
i ndaatûmire ûthûkia nthîgûrû yao,
na wabaira îgi.
Ûtaabeegua kîao,
na mûno mûno bara baarî bakûrû.
7 Waugire atî,
‘Nkaathi na mbere gûtuîka mûnene wao tene na tene!’
Ûtaamakaga i bûra warûthaga,
kana ûthûgaania ntugû îmwe nwa ûkinye mûthia.
8 Ta thikîîria woû wendete ikeno,
woû ûkaraga rîonthe ûkîthûgaanagia ûtirî ûgwatiini.
Woû wîbenagia ûkeebîîra atî,
‘Nwa niû na gûtirî ûngî tatiga niû.
Ntikooro ntuîka ntigwa,
kana nkuîrwa i mwana.’
9 Mainya maaku ma kûringa biama,
magakûringa nthî nthûti îmwe,
na ûtuîke ntigwa,
na ûûrîrwe n'aana.
10 Wîgwatîîtie ûthûûku bwaku,
na ûkaugaga, ‘Gûtirî we ambeene.’
Ûûme na ûmenyo bwaku bwagûta,
naawe webîîra nkorooni yaku,
‘Nwa niû na gûtirî ûngî tatiga niû.’
11 Kînyamaara gîgakûûyîîra,
kîra ûtakîûmba kwebera.
Thîîna îîye kîrî woû,
îra ûtaûmba gwîkûûra kuuma kîrî yoo.
Thîîna îra ûtaûmba kûthûgaanîria nîkûûyîîrîîte,
îgakûgwata nthûti îmwe.
12 Kara ûkîringaga biama biaku bibu bia ûrogi na ûgao,
wa ta bûra ûtwîre kûrûtha kuuma ûrî mûniini.
Kwaûmbîka bigagûteethia,
kana bikamakia mûnthû waku.
13 N'wînogeetie mûno kûromba ûkûrû!
Kuuma kîrî athoomi ba nthata,
na aringia mweri nyuma ya ûra ûngî.
Îthi îîndî ûbarombe ûkûrû,
bwa bûra ûkoonokanga kuuma kîrî bûra bûthiîte gûkarîka.
14 Antû bara beetîganagia na athoomi ba nthata,
i ba mana.
Bakari ta rûûa rûgwete mwanki,
n'ûntû gûtirî muntû aûmba gwota mwanki wa rûûa akî.
15 N'ûrutanîrîîtie ngûgî na antû bara boonaga mantû na biongo,
ûtûûrooni bwaku bunthe.
Îndî batiiyî bûra bathiîte,
na batiûmba gûkwonokia.”