Ngai cia Mbabironi i cia mana
46
1 Mwathani auga,“Ûyû nuu mûthia wa ngai cia Mbabironi,
Beria na Nebob kûrî rîo ciarombagwa.
Îndî îîndî n'imbogeere mûgongooni wa îng'ooi,
ciatuîka mûrigo mûgongooni wa nyamû înogu.
2 Ngai ino itiûmba gwîteethia,
igwetwe mîgwate,
ciakamatwa ciathiîgwa nacio.
Ûyû nuu mûthia
wa ngai cia Mbabironi.
3 Matigari ma Isiraeri,
thikîîriani Mwathani.
Mbîthîrîîtwe ndî amwe naabi,
kuuma rîra bwaciarirwe.
4 Wana kinya rîra bûgaakûra buume mbuî,
ntiigarûka,
nkabûmenyagîîra.
I niû ndaabûmbire,
nkaathiyanagia naabi,
na mbûtûûrie mayîîga.
5 Ga kûrî we aûmba kûbuanaanua naani?
Kana ga kûrî we aganaana naani?
6 Antû bamwe bathiiyaga kîrî mûturi,
bakamûnenkera fetha na thaabu,
abaturîra mîbuanaano
bagongaga.
7 Bageekîra mûbuanaano ûyu ituro biao
bagacukamata,
bakathi bagacurûngîkania,
îndî ûtiûmba kuuma ara ûrî.
8 Îîndî biû antû ba meeyia,
ndîenda bûmenya ûûgû,
na bûtikaariganîrue rî kana rî,
Mwathani wenka n'we Ngai.
9 Nwa niû ninka Mwathani,
gûtirî ngai ciingî,
gûtirî we akari ta niû.
Thûgaaniani bwone bûra gwakarîkire,
mîanka îmiingî îkûrûkîîte.
10 Kuuma kîambîrîriani kîongwa,
i ndaugire bûra gûgaakarîka,
kagiita karaaya mbere gûtirakarîka.
11 Kuuma uumîîro bwa riûa i ndeetire nyoni ira irîîyaga nyama,
na ndaareeta muntû kuuma nthîgûrû cia kûraaya,
arûtha bûra ndendeete.
Bûra mbugîîte i bu ngaatûma bûûyûra,
na ndûthe bûra mbangîîte.
12 Biû antû baûmo biongo,
na bûthûgaanagia atî ûûmbani bûrî kûraaya,
nthikîîriani îîndî.
13 Ntiikaraanga,
ntirî kûraaya,
kagiita gatarî kûraaya inkûûya kûbwonokia.
Ngeekumîria Isiraeri,
na nkoonokia Njerusaremu.”