Ngai atûmîra Sairas kûthaûra antû ba Isiraeri
45
1 “Mwathani ariuga îgûrû ya mwîtûûrîrua maguta wake Sairas, atî,n'amûthuurîîte kaingo atura mîgongo,
na aruta anene ûneneeni,
na arugûre mîîrîga yonthe ya taûni kîrî we.
2 I niû ningwa nkabûtongoreeria,
nthi nkîganaanagîria irîma na tûrîma.
Na mbunange mîîrîga ya rûthuku,
na mbunange mîrîîgo yao ya cuuma.
3 Nkabûnenkera ûtonga
bûra bwithe gûntû kûra gûtaiyîîwe.
Rîru i rîo bûkamenya atî i niû Mwathani,
Ngai wa Isiraeri mbwîtîîte na riîtwa.
4 Sairas, wana kinya woû ûtiimbiyî,
îndî amwe na ûgu,
i ngwîtîîte na riîtwa rîaku,
N'ûntû bwa Isiraeri,
mûruti ngûgî wakwa ûra nthuurîîte.
5 I niû Mwathani na gûtirî Ngai ûngî.
I ngwîkîrîte inya wana kinya wegua ûtiimbiyî.
6 Îîndî antû bonthe,
kuuma umîîro bwa riûa mwanka ûthwîro bwa rîo,
bakamenya atî i niû Mwathani,
na gûtirî Ngai ûngî wa mma.
7 I niû mbûûmbaga werû na mwindu,
gîkeno na kîeba.
I niû Mwathani ndûthaga mantû mamu monthe.
8 Ngaatûma ûûmbani kuuma îgûrû ta mbura,
nthîgûrû n'îthuuranîre yambîîrie ûûmbani bûbu.
N'yo îkaaririma ûkiri na ûmma,
i niû Mwathani ngatûma ûgu bûkarîka.
9 Isiraeri ûtibatîîrue ûkararania na mûûmbi waku.
Woû ûrî yûmba ta rîra rîûmbaga nyûngû
rîûmbîîtwe i mûûmbi.
Yûûmba rîtiûmba kûûria mûûmbi,
‘I kî n'ûntû ûmbûûmbîte ûûgû?
Îrî kû mîgwati?’
10 Aana batirî na watho
bwa kûûria aciari baao,
‘N'ata bûtûrûthîrîte,
bwa gûtûkinyithia agu tûkinyîîte?’
11 I niû Mwathani mûûmbi,
Ngai Ûra Mûtheru wa Isiraeri.
N'ûû aûmba kûmbûûria kîûria n'ûntû bwa mûgongo ûyû wakwa,
kana aambûûria bûra ndûthîîte?
12 Ndaûmbire nthîgûrû,
na ndamîûyûria antû,
Ndatambûrûkia îgûrû,
na ndarîûyûria nthata.
13 I ndûthîîte ûntû bûra bwega,
gûtûma Sairas eegua arî mûnene,
na ngaatûma njîra ira agaakûrûkagîîra ciîgua îtarî na thîîna.
I niû Mwathani Mwene Inya,
Sairas akambakîra taûni yakwa kaîrî,
na arute antû baakwa ûkombooni atakûrîîwa nwa mbi,
i niû Mwathani Mwene Inya ndauga.”
14 Antû baakwa, Mwathani arîbwîra ata rî,
“Ûtonga bunthe bwa Miisiri na bwa Kusi
antû bara baraaya ba kuuma Seba,
bakaaya kîrî woû,
na batuîke baaku.
Bakaathi bakuumîîte nyuma
baaye kîrî woû barî na nyororo.
Bagakwîndamîîra,
bakûthaithe bakiugaga,
‘Na mma Ngai arî amwe naawe, na gûtirî ûngî,
gûtirî ngai îîngî.’ ”
15 Antû ba Isiraeri,
Ngai wenu i kîriga,
kinya wegua nwa we wenka aûmba kwonokania.
16 Muntû wonthe ûra arûthaga mûbuanaano,
n'ûmûrigicanu na akaagîa îgi rîînene mûno.
17 Îndî woû Isiraeri
niû Mwathani ngakûmenyagîîra
na ntireka ûgîa îgi.
18 Mwathani wenka n'we Ngai,
n'we aûmbire îgûrû na nthîgûrû
ara antû batûûraga
bantû a kûmîûmba îrî rwanda.
Mwathani wenka n'we Ngai
na gûtirî ûngî.
19 Mwathani ataaria ebithîîte
kana arî bantû atakwonegwa,
kana eera rûrîîyo rwa Njakubu,
“Nceriani bûtakûmbona.”
I niû Mwathani na mbaragia ûmma
na nkamenyithia antû bûra kûrî.
20 “Matigari monthe ma mîgongo yonthe,
Îthîranaani akubî naani,
bwîrutane bûra bûrî ûntû bwa mana
kûgonga ngai cia mîbuanaano cia mîtî,
kana kûgonga ngai itarî gîteethia.
21 I mbi îkûgiria bwîthîrana tûkomana îgambaani?
Anga ntaabwîrire wo tene bûra gûgakarîka?
I niû Ngai!
Na gûtirî ûngî i niû ndeetaga gûtwîrwa kwa îgamba kwa mma,
na ndî na inya ya kwonokia.
22 Nthîgûrû yonthe nîgarûke
îîye kîrî niû yonokue.
I niû Ngai!
Ngai ira iingî cionthe i cia ûrongo.
23 I nthiîtîîtie mûthiîtio
na ntiigarûka.
Muntû wonthe akambîndamîîra
angoonge.
24 Bagakûyîîra bauge atî,
‘I ninka akî mbûmba kûreeta îtuîro rîa îgamba rîa mma.’ ”
Muntû wonthe ûra athûûri i niû
akaagîa îgi rîînene mûno
îndî akaagarûka ancookeere.
25 I niû Mwathani nkeeyana ûûmbani
na gîtîîyo kîînene
kîrî antû ba Isiraeri.