Wîrane bwa Mwathani kîrî Isiraeri
44
1 “Antû ba Isiraeri,I mbûthuurîîte bûrî aruti ngûgî baakwa.
2 Ûûgû i bu Mwathani akuuga,
Ngai ûra aakûûmbîîre nda ya nyûkwe akuuga:
Ûtikaamake, Njakubu mûruti ngûgî wakwa
i niû nkûthuurîîte Isiraeri.a
3 Nûntû nkaathaarima nthîgûrû îra îtarî na rûûyî
mmîtûrîre miuro ya rûûyî.
Nkaathaarima nciarwa ciaku,
mbae Kîrundu wakwa.
4 Nabo bakaaririma ta mîtî îra înyunyaga rûûyî îkabaa,
kana nyaki îra yuumaga muurooni wa rûûyî rûkûthi.
5 Nabo bakaangonga,
na batuîke antû baakwa.
Na baandîke riîtwa rîakwa
njaraani ciao na beebîte antû ba Ngai.”
6 Ûûgû i bu Mwathani Mwene Inya, mûnene na mûkûûri wa Isiraeri akuuga,
“I niû wa mbere na wa mûthia,
na tatiga niû gûtirî Ngai ûngî.
7 N'ûû ûngî akari ta niû?
Aumîîre aarie na eebonania mbere yakwa.
N'ûû aaroria mantû mbere makarîka,
kana aagweta mantû kagiita gakûrûkîîte magaakarîka kagiita gakaaya,
ta i batwîre mantû mara maayîîte gûtuîkîka.
8 Antû baakwa menyaani bwinaina kana bûmaka.
I bwiyî kuuma tene mwanka îmunthî tûrî,
ntwîre mbwîraga mantû mara magaakarîka,
na bûrî akûûyî baakwa.
Ga kûrî Ngai ûngî?
Ga kûrî Ngai ûngî arî inya ntaamwîgua?”
9 Antû bonthe bara bacaaga mîbuanaano
i ngûgî ya ûtheri barutaga.
Mîbuanaano înu bwîgwatagia,
n'ya mana.
Bara bagoongaga mîbuanaano i ntûngi,
i nguru na i biaa.
10 Kûrî na kîguni kîrîkû kûrûtha mûbuanaano,
gîntû gîtaûmba kûrûtha nwa ata!
11 Bonthe bara barûthaga ngai cia mîbuanaano
na kinya bara baigongaga, n'antû ba mana,
mûthiani bakaarigania na kûgîa îgi.
I baaye barûngame mbere yakwa,
bakainaina bonthe amwe na mîbuanaano na mîtî yao.
12 Mûturi atûmagîra kîria na mwanki wa mîgua,
agatura mûbuanaano.
Agwataga kîria na njara yake îra îrî inya,
akaringa cuuma akarûtha mûbuanaano bûra ûbatîîrue gûkara,
îndî amwe na ûgu,
agwatagwa i bûûta na yûûra,
akathira inya.
13 Mûtea wa gûcaa mîtî athimaga kînuku kîa mûtî,
rîru agacoora mbica ya mûbuanaano ûra akwenda gûcaa.
Agacaa mûbuanaano ûyu na waara bûûnene mûno,
na mûthiani ûgakara ta muntû na ûkaigwa kîromberooni.
14 Mîthithinda, mîtarakwa na mîpuru,
kana mûtî uunthe wa mûthitû, nwa ûthuurwe,
kana kinya mûthithinda ûra wandîîtwe i mûcai ûyu
na waurîrwa i mbura gwakûra.
15 Igucî bimwe bia mûtî ûyu,
bitûmagîrwa kûbua mwanki wa gwota
kana wa kûruga.
Igucî bira biingî bigatûmîrwa kûrûtha mûbuanaano
na mûcai ûyu wengwa akeendamîîria ûthiû bwake agacugonga.
16 Icuncî bimwe akabua nabio mwanki wa gwota,
na bira biingî akabua nabio mwanki agookia nyama akarîa akabaa.
17 Gîcuncî gîku kîngî agacaa ngai ya mûbuanaano,
akamîndamîîra akamîgonga akamîîra,
“I woû ngai wakwa, mbonokia.”
18 Gûtirî bu na gûtirî kîo baciûkagîrwa i kîo,
meetho maao i maakande kwoogu batiûmba kwona,
na mathûgaania maao i maguîkîre kwoogu batiûmba gûciûkîrwa.
19 Gûtirî we akiragîîria athûgaania,
gûtirî we arî na ûmenyo kana gûciûkîrwa auga,
“Mbwire mwanki na nucu ya mûtî
na ndaaruga mûgaate na makara maau,
ndookia nau nyama na ndaarîa.
Rîru ndaarûtha gîntû kîrî na njici na kînucu kîra kîngî,
aabu îîndî i kî n'ûntû nkaagonga nduungu ya mûtî?”
20 N'ata muntû wonthe aûmba kwîthîrwa atakîîte bûgana agîîtîgia muu.
Atiûmba kwîbonokia, kana auga, “I mma gîntû gîkî ndî nakîo n'ûrongo bûtheri.”
Mwathani atiiriganîrua n'antû baake
21 “Isiraeri ririkana ûûgû,
ririkana ûrî mûruti ngûgî wakwa.
I niû ndaakûûmbire,
na ntiriganîrua i woû.
22 Cookaani kîrî niû
n'ûntû i mbûtuunyûkîîtie.
Na ndabûthirîria ûthûûku bwenu,
Bûra bûrabûguîkîrîîte ta matu.
23 Îraani îgûrû na nthîgûrû,
bianjîîrie kwina,
bwîre irîma na mîtî yonthe îthûngîre rwîmbooni,
n'ûntû Mwathani n'atunyûkîîtie antû baake,
kwoogu îîndî bakamûgongaga.
24 Isiraeri, i niû Mwathani waku,
i niû kaumo ga ûtûûro bwaku,
na i niû ngûtuunyûkîîtie.
I niû ndaûmbire into bionthe,
nthîgûrû na îgûrû na kinya mborokerooni.
25 Nthûkagia arongo na iroria bia ûrongo
na bara boonaga mantû na biongo
na magûûme ma antû,
nkabituîkithia gîntû kîa ûtheri.
26 Ngatûma mantû mara iroria biakwa biaragia matuîka ma mma.
Baugaga ata rî îgûrû rîa Njerusaremu, ‘Îgaatûûrwa n'antû.’
Na îgûrû ya taûni cia Njunda, ‘Îgaakwa kaîrî,’
na îgûrû ya maganjo maayo, ‘Magaacookanîîrua.’
27 I niû ûra eeraga îria rînyaare
na nkaanyaaria tuuro.
28 Na nwa niû mbîîraga Sairas, ‘I mûrîîthi wakwa,
na akaarûtha bunthe bûra nkwenda,’
na nkauga îgûrû rîa Njerusaremu, ‘Ûgaakwa kaîrî,’
na Nyomba ya Ngai, ‘Ka mîcingi yaayo îînjwe kaîrî.’ ”