Mwathani agaatuunyûkia antû ba Isiraeri
43
1 Îîndî ûûgû i bu Mwathani akuuga,ûra aakûûmbire woû Njakubu,
ûra atûmire woû Isiraeri wîgua ûrî oogo,
“Ûtikaamake n'ûntû i ngûtûûnyûkîîtie,
na ndagwîtanîria na riîtwa rîakwa n'ûntû ûrî wakwa.
2 Rîra bûkaaringaga ndûûyî,
ûkeegagua ndî naabi.
Bwaringa miuro,
îtiûra naabi.
Bwakûrûkîîra mwankiini
bûtiibîa,
na ndîrîmbî itibûthûûkia.
3 Na mma i niû Mwathani Ngai waku,
Ûra Mûtheru wa Isiraeri, mwonokia waku.
Nkaanenkanîra Miisiri kaingo ngûkûûra,
na nenkanîre Kusi na Seba ngîgûkûûra.
4 N'ûntû ûrî gîntû kîa goro kîrî niû,
na inkwendeete.
I kîo n'ûntû nkûnenkanîra mîgongo îra îîngî,
na antû bara bangî kaingo ngûtuunyûkia.”
5 “Ûtikaamake ndî amwe naawe.
Nkaareeta antû baaku kuuma bwa uumîîro bwa riûa,
na mbwîthîranie kuuma bwa ûthwîro bwa rîo.
6 Mbathe mîgongo îra îrî neegûrû, ‘Barekeerie!’
na mbîîre îra îrî naiti, ‘Ûtikaabarigîîrie.’
Mbeere barekeerie nthaka ciakwa ciume nthîgûrû cia naiti,
na aarî baakwa baume nthîgûrû cia kûraaya.
7 Bonthe nantû bara beetanîrîîtue na riîtwa rîakwa
bara mbûûmbîîte n'ûntû bwa ûkumio bwakwa
n'ûntû i niû mbaûmbîîte.”
8 Îthîraniani antû baakwa amwe bara barî na meetho na batikwona
bara barî na matû na batikwîgua nwa mbi.
9 Mîgongo yonthe îkûûya amwe,
antû bonthe bakwîthîrana.
N'ûû gatîgatî kaao aaroria,
atwîra bûra gûgûkarîka îîndî?
Kana atwîra mantû mara maakarîkire mbere makinya?
Bareete akûûyî baao boonanie ûmma bwao.
Kaingo antû beegua na bauga, “N'ûmma.”
10 Mwathani ariuga,
“Antû baakwa bûrî akûûyî ba mantû mara ndûthîîte,
na ûrî mûruti ngûgî wakwa ûra nthuurîîte,
kwoogu n'ûmbiyî na n'ûmbîtîgîîtie
na n'wiyî i niû Ngai
na gûtarî niû gûtirî Ngai ûngî wa mma
na gûtirî we akooneka kinya ntugû ikaaya.
11 Ninka i niû Mwathani
gûtirî ûngî arî oogo ûra aûmba kûbûtuunyûkia.
12 I ndaigire wîrane bwa kûbûtuunyûkia,
na ndabuûyûria.
Na bûrî akûûyî baakwa
atî gûtirî Ngai ûngî aarûtha ûgu.”
13 Kuuma tene i niû Ngai wenu,
na gûtirî we aûmba kûbûruta Njaraani ciakwa.
N'ûntû ngûgî îra ndutaga,
gûtirî we aûmba kûngiria mîruta.
14 Mwathani mwonokia wenu,
Ûra Mûtheru wa Isiraeri ariuga ûûgû!
“Intûmîîte njûûrî Mbabironi n'ûntû bwenu,
beenyangia Ambabironi bonthe
kinya beenyangie matarû maao,
mara bathiiyaga namo bakeneete.
15 I niû Mwathani Ngai ûra mûtheru,
mûûmbi na mûnene wa Isiraeri.”
16 Ûûgû i bu Mwathani akuuga,
ûra atemaga njîra îriani,
na akarûtha bantû a gûkûrûkîîra rûûyîîni rûra rûrî inya.
17 Ûra arutaga nkaarî na mbaraathi,
na njûûrî îrî na inya.
Agaatûma yoora ta rûtambi.
18 Bûtikaathûgaanîrie mantû mara makûrû,
kana bûririkana mantû mara ma tene.
19 Raithaani bwone
inkûrûtha ûntû bwaimbia na bûkabuona.
Bûtikûbuona îîndî ûgu?
Ngaatema njîra rwanda,
na ntûre miuro ya rûûyî ng'arûûni.
20 Nyamû cia kîthaka igaankumia,
wana kinya mbwe na ntundu.
N'ûntû i nkûnenkanîra rûûyî rwanda,
na ngaatûra miuro ng'aarûûni.
Kaingo antû baakwa bara nthuurîîte,
boona rûûyî rwa kûnyua.
21 Kaingo antû bara ndaûmbire baatuîka baakwa,
baankumia nainya.
22 Îndî woû Isiraeri n'wanogire i niû,
ûtingongaga.
23 Bûtaandetera ng'ondu cia kûruta igongwana bia kûbîîthia,
kana bûntîîya na igongwana bienu.
Ntaabwaîkia mûrigo wa igongwana bia irio,
kana mbûnogia na kûbwîtia macoco
24 Bûtaangûrîra mîtaa
kana bûmbaithia mathuunya ma nyamû cienu.
Îndî i ka bwanogiirie na meeyia meenu
bwanogia na mabîtia mara bûrûthîîte.
25 “Amwe na ûgu ndî Ngai ûra abûrekagîra meeyia meenu,
na ndûthaga ûgu n'ûntû bwa bûra ndî Ngai,
ntibûtarîra meeyia mamu meenu.
26 Tathûgaanîria mantû mara makûrûkîîte,
tûkomane twaranîrie,
buuge mathîîna meenu.
27 Biûyûûyû bienu i bieyiirie,
atongoria beenu nabo baarûtha ûthûûku mbere yakwa.
Atongoria beenu beekîra kîthînjîro gîakwa mûgiro.
28 N'ûntû bwa ûgu ndaatûma antû baakwa beenyangua,
na ndaatûma antû baakwa bongwa barumwa.”