Mûruti ngûgî wa Ngai
42
1 “Ûyû i mûruti ngûgî wakwa,ûra mbîkîrîte Kîrundu wakwa na i nkenagua n'we.
I mûnenkerete inya yakwa,
na agaatûma mîgongo yonthe îgîa na ûkiri.
2 Atiugîîria na inya,
kana aûkîîria kayû gaake njîraani.
3 Atiitigithania rûthanje rûnyang'inyûku,
kana ooria rûtambi rûra rûkûrima,
n'ûntû bwa gwîtîgîka gwake ûmma bûkoonekana.
4 Atiinoga kana athiitara,
mwanka atuîkithie nthîgûrû bantû arî na ûkiri.
Na mîgongo ya kûraaya yeteereete na wîru,
ûrutani bwake.”
5 Mwathani Ngai n'we waûmbire îgûrû,
na arîtambûrûkia ta îrema.
Aacooka aarûtha nthîgûrû bûra îkari,
na bionthe bira yumaga.
N'anenkagîra antû ruuo rûra bakuuyagia
na agatûma bara barî mwoyo batûûra.
Ûûgû i bu Mwathani akwîra mûruti ngûgî wake.
6 “I niû Mwathani
nkûthuurîîte kaingo ûreeta ûmma
naani nkeegagua ndî amwe naawe.
I niû nkûthuurîîte na ndagûtûma,
kaingo ûreetera mîgongo werû.
7 Ûgaatûma ntûngi itua kwona,
na ûthaûre agwate baume nceera,
baume tûnyomba tûra baingîrîîtwe tûrî mwindu mûno.
8 Riîtwa rîakwa i Mwathani!
ntiîtîgîîria kûgaana ûkumio na mwago wakwa na antû.
9 Raithaani bwone mantû monthe mara ndaabwîrire magaakarîka i makarîkîîte,
na îîndî inkûbwîra mîbango îîngî yaimbia,
mbwîre mantû mbere matirakarîka.”
Rwîmbo rwa gûkumia Mwathani
10 Îraani nthîgûrû yonthe yiinîre Mwathani rwîmbo rwaimbia,
îraani bara bathiiyagîra îriani, na kinya bara batûûraga kûraaya,
beeringanîre amwe rwîmbooni rûrû rwa kûmûkumia.
11 Antû bara batûûraga taûni ira irî rwanda,
ibaûkîîrie tûyû twao bakumie Ngai.
Amwe na bara batûûraga Kendari,
na kinya bara batûûraga Sera bamwinîre nainya barî irîmaani kûra îgûrû.
12 I bakumie Mwathani,
na bamûkumie nthîgûrû cionthe cia makumbo ma maria.
13 Mwathani athiîte ndûani akari ta mûcikaarî,
ta mûcikaarî ûra aiyî kûrûa bwega.
Arîkurura nkururo cia ndûa,
ariithûkîra antû baake atarî na ûguaya.
Mwathani agaateethia antû baake
14 Mwathani ariuga,
“Gwa kagiita kaaraaya i nkarîîte nkiri,
na gûtarî ûntû nkûrûtha,
îndî îîndî nkauga mbu ta mûka akîgîa na mwana,
nkiie na mbeebe mûno.
15 Nkeenyangia irîma,
na gîntû kîonthe kîra gîkûraga ku,
Mbûûmie miuro yonthe na ithima,
na kinya mîrimba.
16 Ngatongoreeria ntûngi njîraani ira bataiyî,
njîraani ira bataakinya kaîrî.
Ntuîkithie mwindu werû
na njîra ira itarî mbega ncituîkithie i mbaranîru.
I bu nkaabarûtha ûgu,
na ntibatiganîria.
17 Muntû wonthe ûra eetîgagia ngai cia mûbuanaano
bara beeraga mîbuanaano, ‘Bûrî ngai cietû,’
akagîa îgi rîînene mûno.”
Antû ba Ngai batikûmwathîkîra
18 Mwathani ariuga,
“Biû itaigua, thikîîriani bwîgue,
naabi bûtoonaga cûûbaani bwega bwone.
19 N'ûû ûtakwona tatiga mûruti ngûgî wakwa?
Kana n'ûû gîtaigua ta mûtûmwa wakwa ûra ntûmaga?
Na n'ûû ntûngi ta ûra wîtîganîîtie naani?
Na n'ûû ntûngi ta mûruti ngûgî wa Mwathani?
20 Ûra we oonaga mûno,
na akeegua mûno,
îndî aticiûraga nwa mbi.
21 Mwathani n'akenagîîra wagîru bwake
n'ûntû n'atîîyaga na akaamenyeera mawatho maake.
22 Îndî antû baba n'antû baatuunyane na baatae,
bonthe i bathûngîrîîte marinyaani baagwatwa i mîtego.
Na baithwa nyomba ira ithaîkagwa antû,
I baatae na gûtirî wa kûbatuunyûkia
n'agwate na gûtirî we ûkuuga, bacookieni!
23 N'ûû gatîgatî keenu ûthikîîrîkia bwega akeegua mantû mama?
Ûra ûûmba kûthikîîria akeegua mantû mama îgiita rîkaaya?
24 N'ûû wanenkanîîre Njakubu kîrî bara baamûtuunyire into biake,
na Isiraeri kîrî bara baataire into biake?
Anga ti Mwathani?
i kîrî we twîyîîtie,
twarega kûthingata njîra ciake,
kana twathîkîra moorutani maake.
25 Nûntû bwa ûgu Mwathani n'onorereetie Isiraeri mûthûûro wake ûmûnene,
ûrî na inya ta njûûrî ya ndûa.
Mûthûûro ûyu wamûbîîthia ta mwanki,
îndî amwe na ûgu gûtirî bu aamenya kana bûmûgîa nkoro.”