Ngai mûteethia wa Isiraeri
41
1 Mwathani ariuga ata rî,“Kiraani kii na bûthikîîrie
biû îkumbo rîa îria.
Mîgongo yonthe n'yûmîîrie na îîyange akubî,
n'ûntû bwa kûgiitîrwa îgamba.
2 N'ûû aathuurire mûnene ûyû,
aumîîte bwa ûthwîro bwa riûa?
Ûyû ûturaga na akaatha
mîgongo na anene baayo?
Rûûyiû rwake rwatûma bakara ta tîîri,
mathaga maake ma ndûa mabarûtha ta rûûa rûûmo
bûra rûkamatagwa i ruuo.
3 Eenganaga nabo na mpwî mûno
magûrû maake makaraga ta matagûkinya nthî,
na gûtirî kîo kîmûguraragia.
4 N'ûû atûmaga mantû mama makarîka?
N'ûû waûmbire mîgongo yonthe kuuma kîambîrîria?
I Mwathani,
n'we aarî wa mbere,
na n'we akeegua arî wa mûthia
na i niû we.
5 Icîgîîrio bia îria ibioneete,
biaguaya.
Mîthia ya nthîgûrû yainaina,
na baaya akubî.
6 Beekanîra wîru muntû na ûra ûngî
bakîîranaga, ‘Ûmîîria.’
7 Mûbundi wa mbaaû ageekîra mûturi wa thaabu wîru,
na ûra arûngaragia na nyondo akaûmîîria ûra agwatithanagia into.
Agîkumagia ngûgî ya kûgwatithania into, akiugaga,
i ngûgî îmbega,
n'we amîgwatithanagia na mîcumaarî îtikeenyeenye.
8 Woû Isiraeri ûrî mûruti ngûgî wakwa,
naawe Njakubu i niû ndaakûthuurire
bûrî rûciaro rwa Îburaîmu,
mûcoore wakwa.
9 I niû ndaakûreetire kuuma mûthia wa nthi,
ndagwîta kuuma mîthia ya nthî
na ndakwîra, ‘Woû ûrî mûruti ngûgî wakwa,
i niû ndaakûthuurire na ntaagûta.’
10 Ûtikaamake! N'ûntû ndî amwe naawe,
ûtikaaguaye! n'ûntû i niû Ngai waku.
Ngakweyaga inya na ngagûteethia,
na inya yakwa întheru îgaatûmaga ûrûngama.
11 Muntû wonthe ûra agaakûthûûra
akaagîa îgi na eegue nthoni mûno.
Muntû ûra agaakwithûkîra,
akeenyangua na athirue buru.
12 Rîra ûkaathi ûgîceragia bara barûaga naawe,
ûtiboona.
N'ûntû ûkeegua bakûthirua na baûra cwe.
13 N'ûntû i niû Mwathani Ngai waku ngwîkagîra inya.
Na i niû nkwîraga ûtigaakuthûke,
n'ûntû ngagûteethia.
14 Ûtikaamake Njakubu wana wegua ûkari ta kîginyo,
na kinya biû antû arûme ba Isiraeri.
I niû nkaabûteethia,
i bu Mwathani mûkûûri Ûra Mûtheru wa Isiraeri akuuga.
15 Raitha wone ngagûtuîkithia ta iiga rîaimbia rîûgî rîa kûthia
ûthie irîma ûbituîkithie tîîri
na tûrîma tûkare ta rûgûûnkû.
16 Weere irîma na tûrîma,
nabio bithi na ruuo.
Binyagaarue mbarî cionthe.
Rîru i rîo ûgaakena n'ûntû bwakwa niû Mwathani,
Na ûnkumie niû Ûra Mûtheru wa Isiraeri.
17 Rîra nkîa na bara barî na ûbatu bagaaceria rûûyî bagîkua i bûûta,
niû Mwathani nkabeegua,
naani Ngai wa Isiraeri ntibatiganîria kinya rî.
18 Ngaatûma ruuma irîmaani
na ithima bitûrîka iboondeni;
Ngaatuîkithia rwanda îria rîa rûûyî,
na gûntû kûra kûrî ng'aarû ngûtuîkithie kaumo ka rûûyî.
19 Nkaanda mîtî ya mîthemba rwanda rûru,
mbaande mîgaa, mîthithinda na mîengo
mîarîki na mîtarakwa,
mîkame na mîkoro.
20 Rîra antû bonthe bakoona ûgu
bakaamenya atî i niû,
Ûra Mûtheru wa Isiraeri,
mbûûmbîîte into bibu bionthe.”
Mîbuanaano îtirî gîtûmi
21 “Reeteeni matheta meenu,” i bu Mwathani akuuga.
“Mbîîraani kîra bûkûnung'unîra,” i bu Mûnene wa Njakubu akuuga.
22 “Ngai inu cia mîbuanaano n'ireete mantû maao, na itwîre
bûra gûgaakarîka.
Batwîre mantû mara baaroriirie tene,
naati tûraithe twone
tûmenye bûra gûgaakarîka mûthiani,
kana kinya batûrorerie mantû mara makaaya.
23 Twîreeni bungwa bûra bûgaakarîka ntugû ikaaya,
naati tûmenye bwega wegua bûrî Ngai cia mma.
Rûthaani ûntû bûrî bwega kana bûûthûûku,
naati tûkaamenya bûrî ngai.
24 N'ûntû bûrî ba ûtheri,
na ngûgî yenu n'ya mana,
na muntû ûra abûthuuraga abûgonga n'wa mana.
25 I mbûkîîrîîtie muntû kuuma mbarî ya îgûrû,
ûra aumîîte mbarî ya uumîîro bwa riûa wa gûtîîya riîtwa rîakwa.
Agaakinyanga aathani ta muntû agîkinyanga ntaga
kana mûûmbi agîkinyanga yûûmba.
26 N'ûû agweta mantû mama mbere makinya, kaingo twîgua tûmaiyî?
N'ûû gatîgatî keenu auga ûntû bûbu? kaingo tûûmba kuuga ‘Yîî wabu n'araaragia ûmma?’
Gûtirî we aagweta ûntû ta bûbu,
gûtirî we aabugweta mbere bûkarîka
kana eguîka abugweteete.
27 I niû ndaarî wa mbere kwîra Sayuuni, ‘Ene i maama!’
Ndaatûma mûtûmwa wa ntheto imbega Njerusaremu.
28 Nkûraitha na gûtirî nwa ûmwe,
wa gatîgatî kaao wa kweyana ûkûrû,
Gûtirî nwa ûmwe wa gûcookia kîûria ndabaûria.
29 Raitha wone bonthe i ba mana!
Ngûgî ciao cionthe i cia mana,
mîbuanaano yao n'ya ûtheri wa ta ruuo na kîrigicano.”