Gûkirakirua gwa antû ba Ngai
40
1 “Booreriani, yîî booreriani antû baakwa nkoro.”I bu Mwathani akuuga.
2 “Arîriani Njerusaremu na biugo bia kûmîbooreria, na ûmîîre
atî kagiita kaayo ga kûruta ngûgî na inya i kaathiru,
na atî meeyia maao imaarekere,
n'ûntû n'yoneete îkaanûkia maita maîrî,
kuuma kîrî Mwathani n'ûntû bwa meeyia maayo.”
3 Kûrî muntû akuugîîria arî rwanda akiugaga,
“Theriani njîra ya Mwathani, rûngariani kûra agaakûrûkîîra,
ikûrûkîîrîîte rwanda.
4 Kaguuru konthe gakaathikwa kaganaanîrie,
irîma na tûrîma bikaaganaanîrua.
Bwaranîrie kûra gûtarî kwaranîru,
na kûra kûrî na makuma gûtenderue.
5 Rîru i rîo mwago wa Ngai ûkoonekana
na antû bonthe bagacuona,
n'ûntû i Mwathani wengwa akuuga ûgu.”
6 Kayû ka muntû kambîîra, “Ugîîria!”
Ndamûûria, “Mbugîîrie mbuge ata?”
Uga ata rî, “Antû bonthe bakari ta nyaki,
na kûthongama kwao i ta kwa îrao rîra riumaga kîthakaani.
7 Nyaki yûûmaga,
na îrao rîkabûûya,
n'ûntû bwa mûruke wa Mwathani ûra ûbuutanaga îgûrû rîa bio.
I mma antû bakari ta nyaki.
8 Mîtî înyaaraga, marao namo makarigooya,
îndî kiugo kîa Ngai gîtûûraga tene na tene.”
9 Woû ûtûmagîîria ntheto îmbega Sayuuni,
îtwa kîrîmaani kîra kîraaya.
Naawe woû ûtûmagîîria ntheto îmbega Njerusaremu,
ûkîîria kayû gaaku nainya,
ugîîria nainya na ûtikeegue ûguaya,
wîre taûni ya Njunda ata rî,
“Ngai wenu arî aaga!”
10 Raithaani bwone Mwathani Mwene Inya aayîîte akari ta ncamba,
na akaathana na inya yake,
Raithaani bwone ari na mûcaara wake njaraani yake
na îrîi rîake rîrî mbere yake.
11 Akaarîîthagia ûrîîthi bwake ta bûra mûrîîthi arîîthagia,
eethîranie tûgondu amwe,
atugwate na njara ciake.
Atukamatîîte kîbaraani gîake
na ng'ondu ira igwonkia
aitongoreerie mpoora mpoora.
12 N'ûû athimîîte rûûyî na rwî rwake, kana atambûrûkia îgûrû na njara ciake, kana eekîra mûthetu uunthe wa nthîgûrû bantû amwe acuthima, kana athima irîma na tûrîma na kîthimi? 13 N'ûû aatongoriirie Kîrundu wa Mwathani na amûrutana arî mûmûnenkeri ûkûrû? 14 N'ûû aarombire ûkûrû, n'ûû aamûthoomithiirie na amûrutana njîra cia kûgambithia mîgongo kana amûrutana kûthûgaania na ûûme? 15 Raitha wone mîgongo ya antû îkari ta nthanta ya rûûyî îrî ndooni. Bakari ta rûgûûnkû kîthimiini, na bûcûûbe bwone bûra aûkagîîria icîgîîrio gatîgatî ka îria ta gantû gatarî inya. 16 Rebanoni îtirî na nkû ikûgana, na îtirî na nyamû inganu cia kûrutîra Mwathani kîgongwana. 17 Mîgongo yonthe îkari ta gîntû gûtarî mbere ya meetho maake. Kîrî we i nkûrûki ya gîntû gûtarî kana i ta ruuo.
18 Kwoogu îîndî ûûmba kûbuanaania Ngai na mbi? Ûûmba kûmûgerekania na mbi? 19 I mûbuanaano rîra mûcai arîîkia gûcucaa, na mûturi aatura thaabu ya gûcukunîkîra rîru agacuturîra mûnyoro wa fetha? 20 Wana muntû ûra nkîa cwe, ûra ataûmba kûruta kîgongwana kîa mûthemba ta ûyû, athuuraga mûtî ûmwega ûra ûtakîora. Agaceria mûbundi ûmwega wa kûmûrûthîra mûbuanaano ûtakiinainîka. 21 Bûtaamenya? Bûteegua? Bûteerwa kwanjîîria kîambîrîriani kîongwa? Bûtaamenya kuuma rîra nthîgûrû yaûmbirwe? 22 Mwathani n'we ûkaraga îgûrû rîa kîthiûrûûrî kîa nthîgûrû, na bara bakaraga ndeeni yaayo bagana mpandi kîrî we. We atambûrûkagia îgûrû ta ngoora na akarîkûnjûra ta îrema rîa gûkarîra. 23 Atuîkithagia aathani ba nthîgûrû îno gîntû gîtarî gîtûmi na atongoria akabatuîkithia ta gîntû gîtarî oogo. 24 Aathani baba bakari ta mîtî. Baandîîtwe wa ta ngano kana sayiri na batirî mîri îmîriku. Mwathani ababuaga na mîruke yake bakaûma, na kîbuubani gîkabakamata ta rûûa rûûmo. 25 “Bûkambuanaania naaû? N'ûû ûkari ta niû?” I bu Ûra Mûtheru akûûria. 26 “Raithaani îgûrû bwone, n'ûû aûmbîîte into bibi bûkwona bionthe? N'ûra ûtongoragîîria njûûrî cia îgûrû, n'ûntû n'aciiyî cionthe na n'aciîtaga na mariîtwa. N'ûntû bwa inya yake îînene gûtirî nwa îmwe yûraga.
27 “Antû ba Isiraeri, i kî n'ûntû bûkaraga bûkînung'unaga bûkiugaga, njîra yakwa n'îmbûru Mwathani atimîonaga, na îgamba rîakwa atirîraithaga bwega?”
28 Ka bûtaiyî?
Ka bûteegua atî Mwathani n'we Ngai wa tene na tene?
Nwe mûûmbi wa nthîgûrû yonthe. Atinogaga kana agiriira.
Gûtirî muntû ûmenyekia ûûme bwake.
29 Nwe eeyaga inya bonthe bara bagiriiru.
Na ageekîra inya bonthe bara bathirîrîîtwe n'yo.
30 Wana kinya aana baîthî i bathiraga inya na bakanoga
na antû bara baîthî bakagwa i mûnoga.
31 Îndî bara beetîgagia Mwathani n'abeeyaga inya înjerû.
Bakaabuurûûkîra îgûrû na mathabu ta nderi.
Bakaugia na batiinoga,
bakaathi na magûrû na batiithira inya kana bagiriira.