Atûmwa kuuma Mbabironi
(2Ane 20:12-19)
39
1 Kagiitaani gaakai nyuma ya ûgu, Merondaki-Barandani mûnene wa Mbabironi, mwana wa Barandaani, eegua Esekia n'aarî ûmwayie na aabua. Amûtûmîra baarûa na kîewa. 2 Esekia aathookia na aakeneera atûmwa babu na aboonia ûtonga bwake. Aboonia thaabu, na fetha, mîtaa na maguta mara mathongi, mathaga maake monthe ma ndûa na into bionthe bira aarî nabio nyomba yake. Gûtirî gîntû nwa kîmwe kia nyomba yake ya ûnene na nthîgûrû yake yonthe ataaboonia. 3 Rîru kîroria Isaya aathi kîrî mûnene Esekia amûûria, “Antû baba i bakuuma kû? Na n'ata bakwîra?” Esekia amûcookeria amwîra, “Baumîîte kûraaya mûno, i bakuuma Mbabironi.” 4 Isaya amûûria, “I mbi boonire nyomba yaku ya ûnene?” Mûnene amûcookeria amwîra, “I boonire into bionthe bira birî nyomba yakwa. Gûtirî gîntû nwa kîmwe kîrî bira birî nyomba ciakwa cia kwaiga into ntirareka boona.”5 Rîru Isaya eera Esekia, “Ta thikîîria, wîgue bûra Mwathani Mwene Inya akuuga, 6 ‘Kagiita i kaayîîte rîra into bionthe bira birî nyomba yaku ya ûnene, na into bionthe bira biûyûûyû bienu biaigire mwanka agu tûrî îmunthî, bikaathûkua bithiîwe nabio bwa Mbabironi nthîgûrû ya kûraaya. Mwathani ariuga gûtirî nwa kîmwe gîgaatigara. 7 Kaîrî, bamwe ba rûrîîyo rwaku, na i nthakame yaku yongwa, bakaagwatwa mîgwate na bathiîwe nabo, bakabwe kaingo barutaga ngûgî nyomba ya mûnene wa Mbabironi.’ ”
8 Riru Esekia eera Isaya, “Kiugo kîa Mwathani gîku waria i kîega,” n'ûntû aathûgaanagia “Gûkeegua kûrî na ûkiri na ûkaria ûtûûroni bwakwa bunthe?”