Ndwari ya Esekia
(2Ane 20:1-11; 2Karaaya 32:24-26)
38
1 Ntugûûni inu Esekia aayua becû akua. Kîroria Isaya mwana wa Amoci aathi kîrî we amwîra, “Mwathani arîkwîra ûbanganie mantû ma mûciî waku, n'ûntû ûgaakua, ûtiibua.” 2 Esekia aagarûra ûthiû bwake eerekera rûthingo na aromba Mwathani, akiugaga, 3 “Îîndî ririkana, îî Mwathani, ndakwereka, bûra ndarakaraga mbere yaku na wîtîgîka na nkoro yakwa yonthe, na nkîrûthaga mantû meega mbere ya meetho maaku.” Na Esekia aarîra mûno.4 Na mûgambo wa Mwathani waya kîrî Isaya, 5 “Cooka kîrî Esekia ûmwîre, ûûgû i bu Mwathani akuuga, ‘Ngai wa kîûyûûyû gîaku Ndaundi i mbîgîîtue maromba maaku, na i mboneete meethori maaku. Nkwongeera ûtûûro bwaku mîanka îngî îkûmi na îtaano. 6 Ngakwonokia wou amwe na mûciî ûyû kuuma njaraani cia mûnene wa Asîîria, na ndigîîrie mûciî ûyû.
7 “ ‘Rûrû i ru rûkeethîrwa rûrî rwano rwaku kuuma kîrî Mwathani, atî Mwathani akaarûtha ûntû bûbû augîîte. 8 Raitha, ngacookia kîrundu gîaku nyuma kîthiûrûûrî kîa Aasi makinya îkûmi.’ ” Kwoogu riûa rîagarûka kîthiûrûrîîni makinya îkûmi mara rîacookeete.
9 Rîra Esekia mûnene wa Njunda aabuire, naandîkire rwîmbo rûrû:
10 Ndauga, “Gatîgatîîni ga ntugû cia ûtûûro bwakwa
nwa mwanka nthi nkathûngîre na mîrango ya mborokero
na ntuunywe mîanka yakwa îra îratigeere?”
11 Ndauga, “Ntiona Mwathani kaîrî
ndî nthî ya bara barî mwoyo.
Ntikooro mbona muntû nwa ûrîkû kaîrî,
kana bara batwîre nthîgûrû.
12 Gîkaro gîakwa gîgûkûûrwa kîauma kîrî niû,
ta îrema rîa mûrîîthi wa ng'ondu.
Ngûkûnjakûnja ûtûûro bwakwa, ta bûra mwokothi wa ndigi arûthaga
Mwathani akûngiita kuuma kîrî kîringa kîa mwokothi,
kuuma mûthenya mwanka ûtugû ûkûndeeta mûthia.
13 Ndeeteera ûtugû bunthe ngîceria ûteethio,
wata cimba n'aunangîîte mîîndî yakwa yonthe;
kuuma mûthenya mwanka ûtugû ûkûndeeta mûthia.
14 Ndaarîra ta nthûngûûrû, na ndaakaya ta îcea.
Meetho maakwa maanoga i gûcûûba îgûrû.
Îî Mwathani, ndî ûmwinyîîrie, ncû ûntuunyûkie!”
15 Îndî mbuge ata?
N'ûntû n'ambarîrîîtie, na n'we ûrûthîîte mo.
Toro yakwa yonthe yaûra,
n'ûntû bwa ûrûrû bwa nkoro yakwa.
16 Îî Mwathani, antû batûûraga n'ûntû bwa mantû mamu,
na ûtûûro bwa nkoro yakwa bûrî kîrî mo monthe.
Ûi, ncookeria ûgima bwa mwîrî,
na ûtûme ntûûra!
17 Nûmma n'ûntû bwa ûteethio bwakwa,
n'ûntû ndaraarî na ûrûrû.
Gûkûrûkîîra wendo bwaku n'ûmbonokeetie
kuuma îrinyaani rîa wînyangia,
n'ûcookeetie meeyia maakwa monthe
nyuma yaku.
18 Mborokero îtigûcookeria nkaatho,
na gîkuû gîtiûmba gûgûkumia.
Bara bathiiyaga nthî îrinyaani
batiûmba kwîrîgîîra wîtîgîka waku.
19 I bara barî mwoyo akî, bagûcookagîria nkaatho,
ta bûra nkûrûtha îmunthî.
Beethe ibamenyithagia aana
mantû ma wîtîgîka gwaku.
20 Mwathani akambonokia,
naati twine nyîmbo na inaanda,
ntugû cionthe cia ûtûûro bwetû,
ndeeni ya Nyomba ya Mwathani.
21 Nwe Isaya augîîte, “I bakime kîûmbwa kîa matî ma mûkûyû, na bamwîkîre yoteeni, na akaabua.”
22 Esekia n'we aûrîîtie, “I rwano rûrîkû rûkaamenyithia atî ngeetia Nyomba ya Mwathani?”