Ûroria bwa kwonokua gwa Isiraeri
(2Ane 19:1-7)
37
1 Rîra mûnene Esekia eegiirue mantû mamu, aatembûranga nguo ciake, eekîra nguo cia nkunia aathi Nyomba ya Mwathani. 2 Kagiitaani wa gaku aatûma Eriakimu ûra aarî mûmenyeeri wa nyomba ya mûnene, Sebuna ûra aarî karani amwe na athînjîri ba Ngai bara banene kîrî Isaya mwana wa Amoci. Bonthe baathiire beekîrîîte nguo cia nkunia. 3 Bamwîra, “Ûûgû i bu Esekia akuuga, ‘Gaka i kagiita ga kînyamaara, îgi na kûrumangwa. Mwanka agu îîndî tûkari ta tûcui tûkwenda gûkomorua na tûtirî na inya ya gûtukomoria. 4 Kwaûmbîka Mwathani Ngai waku akeegua bûra mûtûmwa ûra agûtûmîîtwe i mûnene wa Asîîria augire na akamûgondokera n'ûntû bwa ûgu augire Ngai akîîgagua. Mûtûmwa ûyu arîtûmîîtwe i mûnene wa Asîîria aruma Ngai ûra atûûraga mwoyo. Kwoogu romba n'ûntû bwa bara batigarîîte.’ ” 5 Rîra atongoria baba baathiire kîrî Isaya, 6 Isaya abeera, “Îraani mûnene wenu Mwathani ariuga ûûgû, ‘Menya bûmakua i bûra bwîgiirue aruti ngûgî ba mûnene wa Asîîria bakiuga rîra bakûûndumaga. 7 Thikîîriani! Nkamwîkîra kîrundu ndeeni yake na rîra akeegua mantû mana acooke bwa nthîgûrû yake, i rîo nkaamûûragîra noogo na rûûyiû.’ ” 8 Rabasanke aacooka aakomana na mûnene wa Asîîria naara aarûaga na taûni ya Ribuna n'ûntû naarî akwîgua n'araumire taûni ya Rakisi.9 Îndî mûnene wa Asîîria eegua atî Tiriaka mûnene wa Kusi n'aumîîte aayîîte kûrûa n'we, Senakeribu aatûma atûmwa kîrî Esekia abeera, 10 “Îthiini bwîre Esekia mûnene wa Njunda ûûgû, ‘Ûtikaareke Ngai ûyu waku wîgwetie akweneeria, wîtîgia atî Njerusaremu îtiigwa njaraani ciakwa. 11 Wana woû wengwa nwîgîîtue bûra mûnene wa Asîîria arûthîîte taûni inu iingî cionthe, aciînyangia cwe. Î nwa woû ûkaarema? 12 Rîra biûyûûyû bietû biaithûkîîre taûni cia Ngosani, Arani na Resebu kinya antû ba Endeni bara baarî Terasari, ngai cia taûni inu itaûmba kûbateethia. 13 Îîndî arîkû mûnene wa Amathi, mûnene wa Aripandi, mûnene wa taûni ya Sefaribaimu, kana wa Ena kana wa Iba?’ ”
Îromba rîa Esekia
14 Atûmwa babu bairîra Esekia baarûa înu amîthooma. Rîru aathûngîra n'yo Nyomba ya Mwathani na amîtaambûrûkia agu mbere ya Mwathani. 15 Esekia aaromba Mwathani akiugaga, 16 “Yîî Mwathani Mwene Inya, Ngai wa Isiraeri, woû gîtî gîaku kîa ûnene kîrî îgûrû ya akerubi, nwa woû wenka Ngai wa moonene monthe ma nthîgûrû îno. I woû waûmbire nthîgûrû na îgûrû. 17 Mwathani raitha wone na ûkunûre matû maaku wîgue bûra Senakeribu araugire akîruma Ngai ûra atûûraga mwoyo. 18 I mma, Mwathani mûnene wa Asîîria n'enyangîîtie nthîgûrû cionthe na mînda yao. 19 I baagerire ngai ciao mwankiini, n'ûntû itaarî Ngai. Yaarî ngûgî ya njara cia antû, îraarî mîtî na maiga i kîo n'ûntû baramîînyangiirie. 20 Îîndî, Mwathani Ngai wetû, tûtuunyûkie kuuma njaraani ciao, kaingo mîgongo yonthe ya nthîgûrû îmenya i woû wenka, Mwathani, ûrî Ngai.”
Ntûmwa ya Isaya kîrî Mûnene
(2Ane 19:20-37)
21 Rîru Isaya mwana wa Amoci aathi kîrî Esekia amwîra, “Mwathani Ngai wa Isiraeri ariuga ûûgû: N'ûntû bwa bûra ûndombeete n'ûntû bwa Senakeribu mûnene wa Asîîria, 22 Mwathani augîîte ûûgû îgûrû rîake,
‘Mwarî bikira wa Sayuuni,
n'akûbûthîîtie na akûguuta.
Mwarî wa Njerusaremu
ainainia kîongo gîake akwomba arî nyuma yaku.
23 N'ûû we ûyu ûrumîîte na waaria mantû maathûûku îgûrû rîake?
N'ûû ûyu ûkururîrîîte nainya ûgu,
n'ûû ûyu ûraithîîte na wîkumia?
N'Ûra Mûtheru wa Isiraeri!
24 Ûtûmîrîte aruti ngûgî baaku
kûûnduma niû Mwathani.
Ûkiugaga,
“I nthiithîtie nkaarî inyiingî cia ndûa,
ndaciîtithia irîma,
mwanka tûthûmbîri twa Rebanoni.
Ndaatema mîthithinda yaayo îra mîraaya,
na mîtarakwa îra mîthongi,
ndeetia bantû ara araaya mûno
mûthitûûni ûra mûthongi.
25 Ndeenjire ithima nthîgûrû i ngeni,
na ndanyua rûûyî kuuma ku.
Na mbayo ciakwa,
ndaabwethia miuro yonthe ya Miisiri.”
26 Senakeribu, ga ûtaîgua?
I niû Mwathani ndaabangire mûbango ûyu tene mûno.
Ntugû cia karaaya mûno ikûrûkîîte i ndaabangire.
Îîndî i ka ntûmîîte ûntû bûbû bwonekana,
atî waabu nwînyangîîtie taûni imbiingî ira mbirigîre na nthingo ciatuîka maganjo.
27 I kîo gîtûmi eene cio baatuîka batirî na inya,
na kûguaya, na kûnyamaara.
Baakara ta nyaki ya mînda,
kana ta îria rîra rîkuuma,
ta nyaki îrî rûûgûrû,
ta mûnda wa ngano mbere itiraûma.
28 Îndî imbiyî ara ûkaraga,
na rîra ûûyaga na rîra uumagarûkaga,
na bûra ûnthûûragîra.
29 Na n'ûntû n'ûnthûûrîrîte,
na n'ûntû i mboneete wîkumia bwaku,
ngagwîkîra ndwano nyiûrû yaku,
na gacuuma kaniini gaakwa kanyua gaaku,
na ngaatûma ûcooka,
na njîra wa îra wayire n'yo.’ ”
30 “Rûrû i ru rûkeegua rûrî rwano kîrî woû, woû Esekia,
Mwanka ûyû ûkaarîa into bira bikûraga biongwa
na mwanka wa îîrî ûrîe bira bikauma kîrî bio.
Îndî mwanka wa îthatû ûkaanda na ûkethe,
ûkaanda mînda ya mîcabiibû na ûrîe maciaro maayo.
31 Matigari ma nyomba ya Njunda
makaagîa na mîri kaîrî na magîe na maciaro.
32 N'ûntû kuuma Njerusaremu gûkauma matigari,
na kuuma kîrîmaani gîa Sayuuni gîkundi kîa bara bagaatigara.
Kwîrutanîria kwa Mwathani Mwene Inya
i ku gûgaatûma mantû mamu makarîka.
33 “Kwoogu ûûgû i bu Mwathani akuuga îgûrû rîa mûnene wa Asîîria,
‘Njûûrî yake itiithûûngîra taûni îno
kana îgera mûguî aaga.
Atimîthengeera na ngao,
kana arûtha ithûmba bia gûtûmîra bakîmiithûkîra.
34 Agaacooka na njîra îra aayire n'yo,
atiithûngîra taûni îno.’ ”
Ûgu i bu Mwathani akuuga.
35 “Nkaarigîîria taûni îno na mîonokie,
n'ûntû bwakwa na n'ûntû bwa mûruti ngûgî wakwa Ndaundi!”
36 Rîru Mûraîka wa Mwathani aumagara na aûraga antû ngiri îgana rîmwe rîa mîrongo înaana na itaano kambîîni ya Asîîria. Na gûkwererûka kwethîrwa bonthe baarî biimba. 37 Kwoogu Senakeribu mûnene wa Asîîria aambûra marema eenûka. Acooka Ninebe gûtûûra noo.
38 Ntugû îmwe, akîrombaga arî nyomba ya ngai wake Nisiroki, nthaka ciake Andiramereki na Sareseri bamûûraga na rûûyiû, na baakuthûkîra nthî ya Ararati. Nthaka yake Esarandoni aathûkia ûnene.