Senakeribu aamakia Njerusaremu
(2Ane 18:13-27; 2Karaaya 32:1-19)
36
1 Mwankaani wa îkûmi na îna wathaniini bwa mûnene Esekia mûnene wa Njunda, mûnene Senakeribu wa Asîîria n'aithûkîîre taûni cionthe cia njunda ira ciirigîrîîtwe na nthingo acitura na acigwata mîgwate. 2 Rîru mûnene ûyu wa Asîîria aatûma mûtûmwa kuuma taûni ya Rakisi kîrî mûnene Esekia Njerusaremu. Aathi na njûûrî îînene mûno ya acikaarî aarûngama mbarî ya îgûrû akubî na kauro ka rûûyî njîraani îra îthiiyaga bwa kîeni kîa mûbûûri wa Nguo. 3 Rîru Eriakimu mwana wa Irikia ûra aarî mûmenyeeri wa nyomba ya mûnene, barî na Sebuna karani wa mûnene, na Njoa mwana wa Asabu mwandîki wa mûnene bauma kûmûthagaana. 4 Mûtûmwa ûyu abeera ata rî,“Ta ûriani mûnene Esekia, ‘Mûnene ûra mûnene wa Asîîria arîmûûria, i mbi îtûmîîte aûmîîria ûû? 5 Nûkûthûgaania mawîrane maaku ma ûtheri magakwaa inya ya kûrûa? N'ûntû nûregeete kûmbathîkîra rî, n'ûû ûkeegwatia agûteethia? 6 Wîgwetie Miisiri, mûraagi ûmuunîku, îîkinyîîrie nau wone kana ûtikûmuunta njara. Ûgu i bu gûkarîkaga kîrî bonthe bara beegwatagia anene ba Miisiri. 7 Îndî biû atongoria ba Njunda nwa bûmbîîre, “Tiû twîgwatagia Mwathani Ngai wetû.” Anga twa we ûra mûnene Esekia eenyangiirie ithînjîro biake na eera antû ba Njunda bonthe bakagongage na kûrutîra igongwana biao Njerusaremu? 8 Kwoogu tumaani ûnyaanya na mwathi wakwa mûnene wa Asîîria! Naati tûkabwaa mbaraathi ngiri ciîrî cia ndûa wegua bûkoona athiithia baacio. 9 I bûkwona bûûmba kûrûa kinya na mûtongoria ûmwe ûra mûniini wa njûûrî ya Asîîria bwîgwetie Miisiri îbwa Mbaraathi na nkaarî cia ndûa? 10 Aarîo î, ka bûkûthûgaania mbithûkîrîîte nthîgûrû îno mîînyangia n'ûntû bwa wendi bwakwa ningwa? I Mwathani n'we antûmîîte ambîîra nthi mbithûkîre na mbînyangie nthîgûrû înu!’ ”
11 Rîru Eriakimu, Sebuna na Njoa beenyiîtie mûno beera mûtûmwa ûyu ata rî, “Mûnene, itû tiga gûtwarîria na Kîîyaundi, n'ûntû antû baba barî nthingooni cia taûni gûkû i bakwîgua, twarîrie na rwaria rwa Kîaramu.” 12 Îndî Rabasanke abacookeria abeera, “Mûnene wakwa i kîrî biû bwinka agûntûmîîte mbuga ntûmwa îno? Ga îtagûkonia antû babu barî nthingooni cia taûni? Biû na kinya bo bakaarea mai maao na banyue maumago maao.” 13 Rîru Rabasanke aarûngama aaria nainya na Kîîyaundi eera antû bonthe, “Thikîîriani ntûmwa îno ya kuuma kîrî mûnene ûra mûnene wa Asîîria! 14 Mûnene wa Asîîria arîbwîra, bûtikaareke mûnene wenu Esekia abweneeria n'ûntû atiûmba kûbûteethia. 15 Menyaani bûreka abweneeria akîbwîraga, Mwathani akabûteethia na atineenkanîra taûni yenu kîrî mûnene wa Asîîria.
16 “Bûtikaathikîîrie Esekia. Ûûgû i bu mûnene wa Asîîria akuuga: Rûthaani ngwatanîro ya ûkiri naani, bwînenkanîre kîrî niû, wona bwarûtha ûgu wa kîra ûmwe wacienu akaarîa maciaro ma mîcabiibû na ma mîkûyû yenu bwingwa, na bûnyue rûûyî kuuma ithimaani bienu bwingwa. 17 Mwanka rîra nkaaya mbûthûkie mbwire nthîgûrû yîîngî îkari wa ta înu yenu. Nthîgûrû îrî irio, mîgaate na mînda ya mîcabiibû.
18 “Îîmenyeereni mûno Esekia atikaabweneerie abûta akîbwîraga, ‘Mwathani agatûteethia.’ Ta îbûûrieni î, ‘Kûrî ngai ya mûgongo ûngî aateethia nthîgûrû yao îtikaathûkue i njara cia mûnene wa Asîîria?’ Arî! 19 Ngai cia taûni cia Amathi na Aripandi itirabateethia! Kana ngai cia Sefaribaimu imîteethia! Ngai cia Samaria itiraûmba kûmîteethia kuuma njaraani ciakwa! 20 Ûkeegua gûtirî ngai nwa îmwe kîrî ino cia mîgongo îno îraûmba kûbarigîîria bagwa njaraani ciakwa, wana kinya Mwathani atiûmba kûrigîîria Njerusaremu îtikaagwe njaraani ciakwa!”
21 Atongoria babu ba Njunda bataaria baakira ki, n'ûntû watho bwa mûnene Esekia bwarî, “Bûtikaamûcookerie.”
22 Rîru Eriakimu mwana wa Irikia, ûra aarî mûmenyeeri wa nyomba ya mûnene, Sebuna, karani wa mûnene, na Njoa mwana wa Asabu, mwandîki wa mûnene, baathi kîrî mûnene Esekia bamwîra mantû monthe mara mûtûmwa ûyu auga. I baarî bagûtembûranga nguo ciao n'ûntû bwa kîeba.