Gîkeno kîa bara bakûûre
35
1 Ng'aarû na maganjo bikaagwîrua,rwanda rûgaakeneera na rûrute marao mara manuunkaga bwega.
2 Rûkaaraa marao maingî
rûgwîrue na rwine.
Rûkeewa ûkumio ta bwa Rebanoni,
na gûtîîywa gwa Karimeri kana Saroni.
Nabo bakoona mwago wa Mwathani
ûkumio bwa Ngai wetû.
3 Îkîraani njara ira mbonju inya,
na magûrû mara maregeru bûmarikie.
4 Îraani i guaya ata rî,
“Gîani inya na bûtikaaguaye!
N'ûntû Ngai wetû n'ayîîte
gûtûrîîria.
Aayîîte na îrîi rîînene na akîbwonokia.”
5 Rîru i rîo meetho ma ntûngi makaarugûka,
na itaigua bitue kwîgua.
6 Bara baraarî ithua bakaathûngûthanga ta nthia,
na bara baraarî maamu baine rwîmbo bakeneete.
Na mma Mwathani agaatûma ithima bia rûûyî bitûrîka rwanda,
na miuro ya rûûyî îkûrûkîîra ng'arûûni.
7 Nthîgûrû îra mbûmo mûno îgaatûrîka îria rîa rûûyî,
nthîgûrû îra nyaaru yume ithima bia rûûyî,
gûkauma nthanje na ngoka,
ara mbwe iratûûraga.
8 Na agu gûkeegua kûrî na njîra îînene,
n'yo îgeetagwa njîra întheru,
n'ûntû gûtirî muntû ûrî mûgiro akaathîîra ku.
N'ûntû îkeegua îrî ya antû ba Ngai.
Muntû wonthe ûra akaathîîra njîraani îno,
wana kinya wegua i kîa, atimîbîtia.
9 Gûtirî cimba kana nyamû ciingî ira nthûûku,
igaakinya kana cionekana njîraani înu.
Nwa bara boonokeetue bakaathiiyagîra njîraani înu.
10 Bara Mwathani agaatuunyûkia,
bagaacooka Sayuuni bakiinaga.
Bakaûyûrwa i gîkeno kiingî mûno,
n'ûntû kînyamaara na kîrîro bitiîgua birî oogo kaîrî.