Kûgambithua kwa mîgongo
34
1 Biû mîgongo, ncûûni akubî bwîgue,naabi antû, thikîîriani.
Nthîgûrû na gantû konthe karî ku n'ithikîîrie.
Nthîgûrû na gîntû kîonthe kîra kiumaga kîrî yo n'ithikîîrie.
2 N'ûntû Mwathani n'athûûri i mîgongo yonthe.
Mûthûûro wake ûra ûgwakana ta mwanki ûrî kîrî njûûrî cionthe.
Abangîîte nwa mwanka abathirie,
na n'abanenkanîrîte kîrî mwînyangania.
3 Biimba biao bigaateegwa naagu,
mîîrî yao yoore îtue kûnunka mûno.
Irîma nabio bithithirûkîre nthakameeni yao.
4 Nthata cionthe cia îgûrû ikoora ta gîntû gîtarî gîtûmi,
îgûrû rîgaakûnjakûnjwa ta îbuku,
kana mathangû maûmo ma mûcabiibû,
wa ta îtunda rîa mûkûyû rîûmîrîîte mûtîîni.
5 N'ûntû rûûyiû rwakwa rwa gûkaanûkania i rûrîîte na rwabaa rûkiuma îgûrû,
rûkeendama kwînyangia antû ba Endomu,
antû bara mbangîîte nwa mwanka bakue.
6 Rûûyiû rwa Mwathani i rûbaîte nthakame,
na rwanora i mathuunya,
i nthakame ya mbûri na ng'ondu,
na mathuunya ma mpigo cia ntûrûme.
Nûntû Mwathani n'akûruta kîgongwana naara Bosira,
îthînja rîînene rîra rîkeegua rîrî nthîgûrû ya Endomu.
7 Mbogo igaakuuyanîria amwe nabo,
ncamba cia kiumîri amwe na ncamba ira irî inya.
Nthîgûrû yao yonthe îkaûyûra nthakame,
na mûthetu wao ûkore maguta.
8 N'ûntû i ntugû ya Mwathani ya kwîrîîria
mwanka wa kûrîia kaingo Mwathani arîîria Sayuuni.
9 Miuro ya Endomu îgaakara ta miuro ya rami
mûthetu nau ûkare ta ûbiriti,
na nthîgûrû yonthe îkare ta rami îkûbîa.
10 Îgaakanaga mwanki mûthenya na ûtugû,
ntoogo îgîîtagia tene na tene.
Nthîgûrû îkeegua îrî îganjo kuuma nciarwa kûthi ira ingî
na gûtirî mûgendi ûgaakûrûkîîra nthîgûrû înu rî kana rî.
11 Njîgî na tûrianyûngû i cio igaatûûra ku.
Ntundu na nkûngûrû i cio igaatûûraga ku.
Mwathani akamîtuîkithia îganjo
na amîtuîkithie gîntû kîa ûtheri.
12 Gûtirî muntû ûrî gîtûmi ûthuurwa mûnene ûkeegua atigeere,
anene bonthe na atongoria ûkeegua bakûthira.
13 Nyomba cia ûnene ikauma matî marî mîîgua,
na nthingo ira icithiûrûkîrîîte nacio ciume mîîgua na mantuuyia.
Nthîgûrû înu îtuîke ûmaamo bwa mbwe
na ûkaro bwa ntundu.
14 Mbaka cia kîthaka na mbiti i ku igaatua kwîthîranaga,
mbûri cia kîthaka ikeethîranaga ku,
nkoma cia rwanda kinya cio ikeethirana aaga,
nyamû cionthe cione bantû a kûnogoka.
15 Ntundu îgaaka ntara na îciarîre makome maayo ku,
îguîkîre makomoke na îîmenyeere maunga maayo marî waagu.
Na kinya njîgî cia mîthemba yonthe ikeethîrana
wa îra îmwe na mûnyaanya wayo.
16 Ceriani na bûthoome îbukuuni rîa Mwathani,
atî gûtirî nwa ûmwe kîrî babu bonthe atakîîgua arî oogo.
Na gûtirî we akaaga mûnyaanya,
n'ûntû i kanyua ka Mwathani kaugîîte,
na Kîrundu wake akabeethîrania.
17 I Mwathani ûrûthîîte mûbango ûyû wa nyamû ino
na i Mwathani ûcigaanîrîîtie Endomu.
Îkamîthûkia tene na tene,
igaatûûraga ku kuuma nciarwa kûthi ira iingî.