Kînyamaara na ûteethio
33
1 Ûkoona thîîna woû wînyangagia ûtakwînyangua,woû ûrûthaga ûthûûku na ûtirûthagîrwa bu!
Rîra ûkaathiria kwînyangia, na woû nûkeenyangua.
Na wathiria kûrûtha ûthûûku na woû ûkaarûthîrwa bu.
2 Itû Mwathani twîgîîrue kîao,
i woû tweteereete ûtûteethia.
I woû njara yetû îra îrî inya ya kîra ntugû,
ûtûtuunyûkagie rîra thîîna yaaya.
3 Antû i bakuthûkaga beegua gîtuma gîaku
mîgongo îkaanyagaara wonania inya yaku îînene.
4 Wa ta bûra ngige ciîthîranaga kîmeraani,
nwa ta bu antû beethîranagia mataa baûmbana.
Wa ta bûra mûrumbî wa ngige ûûyaga,
nwa ta bu antû baumagîîra anthû baao.
5 Mwathani n'we ûrî îgûrû mûno,
na atûûraga îgûrû,
akaûyûria Sayuuni na mantû ma ûmma na wagîru.
6 Ûkeegua ûrî na kagiita ga gûkara bwega
na ûtonga bwenu bwîgue bûrî bûûkarie.
Ûûme, ûmenyo na gûkuthûka Mwathani
i bu ûtonga bûra eeyanaga.
7 Raitha wone,
ncamba ciao cia ndûa irîrîra irî ome,
atûmwa baao ba ûkiri,
barîrîra na ûrûrû mûno.
8 Njîra ira nene cionthe itirî muntû,
gûtirî athii.
Kana beetîgania na mookûûyî
batikûmakîra bara bangî.
9 Nthîgûrû ya Isiraeri n'îgwetwe i kîeba na yaûma.
Mîthithinda ya Rebanoni yaagîa îgi yaûma,
Kîbonde gîa Saroni gîakara ta rwanda,
na mîtî ya Mbasani na Karimeri yaûrûrûka mathangû.
10 Kwoogu, inkûrûtha ûntû wa îîndî,
i bu Mwathani akuuga.
Wa îîndî ingûûkîîra, na ndîîkumithie.
11 Mîbango yenu îkari ta nyaki îmbîthî
n'ûntû maumithio maayo i ta nyaki îmbûmo.
12 Antû bakaabîîthua ta nkangû
kana mîtî îrî mîîgua bûra îtemagwa îkabîîthua.
13 Biû bûrî kûraaya,
menyaani bûra ndararûthire.
Naabi biû bûrî akubî
kaathani inya yakwa.
14 Eeyia bara barî Sayuuni barî na ûguaya
antû bara batarî batheru i bakuinaina
bakîûranagia, n'ûû gatîgatî geetû ûtûûranîrîkia na mwanki wa Mwathani ûra ûthiranagia?
N'ûû kîrî tiû ûûmba gûkarania na mwanki ûra ûrûngûranagia tene na tene?
15 Nwa kana bara barî batheru,
bara baaragia ûmma,
bara bataceragia mpongeeri na njîra itarî mbega,
bara baregaga kûthûkia ngukumo.
Bara batathûngagîra bitinaani,
na bareganaga na ûthûûku.
16 Antû ta babu bagaatûûraga mayîîga gûntû kûra gûûkîîru,
kûra kwirigîîtwe na rûthiingo rwa maiga,
akeeyagwa biakûrîa na rûûyî rûtiîgua rûrî thîîna.
17 Meetho maaku makoona mûnene na ûkumio bwake
na wone nthîgûrû bûra îtambûrûkîîte gûntû kûûraaya.
18 Ûkaathûganîria imakania bira bia mbere,
nwa wîbûûrie, “Arîkû muntû ûra aataraga into?
Arîkû muntû ûra aathimaga into bionthe?
arîkû muntû ûra aataraga ibayo?”
19 Ûtikooro wona antû babu bathûûku ûgu kaîrî,
bara rwaria rwao rûûmo gûtarî we akîrumenya,
bara rwaria rwao rûtakûmenyeka,
kana gûtarî we akîrûciûra.
20 Raitha Sayuuni, taûni îra twîthîranaga gûkûngwîra biatho bietû,
wone Njerusaremu ta taûni ya ûkiri bwingî,
îkari ta îrema rîtakûûrîka,
rîra biango biayo bitainainîka,
kana mîkanda yarîo îtuîka.
21 Na mma, Mwathani gûkûrûkîîra inya yake, akeegua arî amwe naati.
Wa ta bantû ara arî na miuro îmînene ya rûûyî.
Na kîrî yo gûtirî îtarû rîa ndûa rîkaagenda ku,
kana îtarû rîa antû kana matarû mara manene.
22 Mwathani n'we ûtûgiitagîra magamba,
na n'we Mwathi wetû.
N'ûntû bwa ûgu n'we ûgatûtuunyûkia.
23 Mîkanda yaku nîmîregerie,
na gîtugî gîaku kîa bendeera ti giitu,
na bendeera yaku îtikûburutwa i ruuo bwega.
Ntugû îmwe bûkaagaana mataa,
wana kinya antû bara ithua bakaagwatanîra naabi bûkîgaana.
24 Gûtirî nwa ûmwe wenu akauga, “Ndî ûmwayie.”
N'ûntû bara batûûraga ku bonthe bakaarekerwa meeyia maao.