Mûnene ûmwagîru
32
1 Gûkaagia na mûnene na akaathana na wagîru,na atongoria baake bakaathana na ûmma.
2 Bakeegagua barî bantû a kwîbitha,
n'ûntû bwa nduuo na ibuubani biinene,
muuro wa rûûyî rwanda,
na rwara rwa gwota mûgunye
rîra riûa rîarîîte.
3 Rîru muntû wonthe ûra arî na meetho,
agaacûûba kûnûû na oone,
na bara barî na matû
nabo bathikîîrie bwega.
4 Bara nabo batarîîkagîîria,
bakaarîîkîîria na beegue barî na kaanya ga kûthûgaania.
Na muntû wonthe ûthantauraga
akaaria bwega.
5 Bia bititîîywa kaîrî,
kana nguru ciewa twanya twa gîtîîyo.
6 Bia biaragia waa bûtheri,
rionthe barûthaga mîbango
ya kûrûtha mantû matarî meega,
bikaaria ûrongo mantûûni ma Mwathani,
bagatûma bara barî na yûûra banyamaara,
na bakeeria bara barî na bûûta rûûyî.
7 Antû bara bathûûku baaragia ûrongo,
na babaangaga mîbango ya kûthûûkia nkîa,
na njîra ya gûkûûyîîra ûrongo
rîra nkîa igûceria ûmma.
8 Îndî antû bara beega babaangaga mîbango îmîega
na bagatua kûrûthaga mantû meega mara babangîîte.
Aka ba Njerusaremu baakaanua
9 Ûkîîraani, biû aka bûtakûmaka.
Thikîîriani kayû gaakwa,
biû aarî ba antû batamakaga,
thikîîriani bwîgue bûra nkuuga.
10 N'ûntû bûkaanyamaarua ntugû imbingî nkûrûki ya mwanka,
biû aka bara bwîbenagia.
N'ûntû maketha ma ncabiibû makaûra,
îgiita rîa gûketha into bia mînda rîtiikinya.
11 Inainaani, biû aka bûtakûmaka,
nyamaaraani, biû bûtamakaga,
rutaani nguo cienu kûrû,
îkîraani nguo cia nkunia tuuna twenu.
12 Bakaaringaringa i bara biao i kîeba n'ûntû bwa mînda îmîthongi,
na n'ûntû bwa mîcabiibû ira îciere.
13 Nthîgûrû ya antû baakwa îkauma mîîgua na ndamata.
Yîî, n'ûntû bwa nyomba ciao cia ikeno ira irî taûni.
14 N'ûntû nyomba ya ûnene îgaatigwa îrî îganjo,
taûni îra îraarî na antû baingî
ûkeegua îtarî muntû,
kîrîma na kîbayo
bigaatuîka ikaro bia nyamû tene na tene,
gûtuîke bantû a kûthekanîria mang'ooi ma kîthaka,
na rûriî rwa kûrîîthia ng'ondu.
15 Mwanka rîra tûgeetûûrîrua Kîrundu kuuma îgûrû,
i rîo rwanda rûgaatuîka mûnda ûgûciara mûno,
nau mûnda ûra ûgûciara mûno
ûtarwe ûrî mûthitû.
16 Rîru i rîo ûmma bûkoonekanaga rwanda,
na wagîru nabu bûkare mûndaani ûra ûgûciara mûno.
17 Na ngûgî ya wagîru îkeegua îrî ûkiri,
namo maciaro ma wagîru,
makeegua marî ûkiri
na wîrîgîîro rîonthe.
18 Nabo antû baakwa bagaatûûra ikarooni bia ûkiri,
na kinya ikarooni bira birî mayîîga,
na kinya bantû a kûnogoka arî na ûkiri.
19 Na kinya mbura ya maiga îkaura,
îkenyangia mîtî ya mûthitû,
taûni înu îtiînyangua.
20 Kîthaarimo i kîrî biû bwandaga mbeû rûteere rwa rûûyî,
na gûtiganîria ng'ombe na mang'ooi ikaangaga kunthe.