Bara beegwatagia Miisiri bakoona thîîna
31
1 Bûkoona thîînawona bwathi Miisiri gûceria ûteethio.
Kana bwegwatia njûûrî na nkaarî cia ndûa
n'ûntû n'imbiingî.
Bantû a ûgu bûbatîîrue bwîrîgîîra
na bwîtîgia Mwathani Ûra Mûtheru
wa Isiraeri.
2 Îndî Mwathani n'ûmûûgî,
n'eegagua akîmenya bûra akûrûtha,
n'akaanûkagia antû bara bathûûku
na kinya bara babateethagia.
3 Antû ba Miisiri n'antû tu
tika barî Ngai.
Mbaraathi ciao i nyamû tu,
itiûmba gûtûûra tene na tene.
Rîra Mwathani akoonania inya yake,
akeenyangia Amiisiri,
amwe na bonthe bara beegwatagia bo,
bonthe bathire.
4 Îndî Mwathani Mwene Inya
arîmbîîra ata rî,
“Nkaagondoka na mbithûke,
ta cimba îtarî na ûguaya,
îtakûmakua i gîtuma kîa arîîthi
bara bakarîîtie ng'ondu ciao.
Ûûgû i bu nkeendama nthîgûrû
ndwîrîîre kîrîma gîa Sayuuni.
5 I niû Mwathani Mwene Inya,
nkaarwîrîîra Njerusaremu,
wa ta bûra nyoni îrûagîîra
ntara yaayo.”
6 Antû ba Isiraeri, cookaani kîrî Mwathani,
biû bara bûmûtiganîrîîtie!
7 Kagiita i kaayîîte
rîra bûgaata ngai cienu cia mîbuanaano ya thaabu na fetha,
ira irûthîîtwe na njara cienu ira irî na meeyia.
8 “Asîîria bakaûragwa
îndî ti na mpiû cia antû.
Nthaka ciao ikaageria gûkuthûka
îndî bakaagwatwa
batuîkithue mîgwate na taka.
9 Kinya ncamba ciao cia ndûa ikaagwa nthî n'ûguaya.
Atongoria baao ba njûûrî bakainaina n'ûguaya boona ibendeera bia ndûa.”
Ûûgû i bu Mwathani augîîte
ûra kwîthîrwa gwake gûkari ta mwanki Sayuuni,
kana mwanki ûmûnene Njerusaremu.