Kîrîîkanîro kîa ûtheri gatîgatî ka Njunda na Miisiri
30
1 Mwathani ariuga ata rî,“Bûkoona thîîna biû aana bara ndemi.
Biû bûthiiyanagia na mîbango îra îtaumanîîtie naani.
Bûkîrûthaga irîîkanîro na antû bangî îndî ti na Kîrundu wakwa,
bûkarûthaga wîyia îgûrû ya bûra bûngî.
2 Biû bwîndamaga bûkathi Miisiri
bûtaambûûrîîtie,
bûgîceragia ûteethio kîrî Faraû,
bûkeendaga gûkaraga mûgunyeeni wa Miisiri.
3 Amwe na ûgu inya ya Faraû îgaatûma bûgîe îgi,
na mûgunye wa Miisiri ûtûme bûmenwa.
4 Na kinya ûkeegua atongoria ba Njunda barî taûni ya Soani,
na atûmwa baao nabo bagûkinya taûni ya Anesi.
5 Babu bonthe bakaagîa îgi,
n'ûntû bwa kwîgwatia antû bataûmba kûbateethia,
bara bataûmba kûbaretera baita ya mûthemba nwa ûrîkû,
nwa kana bakabaira îgi.”
6 Bûbû n'ûroria n'ûntû bwa nyamû cia Negebu.
Ndeeni ya nthîgûrû ya kînyamaara na thîîna îmbingî,
nthîgûrû ya cimba cia nka na cia ndûme,
nthî ya mpuua na njoka ira irî cûmû mûno,
i ku atûmwa bakûrûkagîîra bakamatîîte ûtonga bwao na mang'ooi,
na into biao bira birî gîtûmi bagakamata na nkamîîra
bairîrîîte nthîgûrû înu gûtarî bu yûûmba kûbateethia.
7 Gûtirî ûteethio Miisiri yûmba kweyana.
I kîo n'ûntû ndaamîtuîrîîre riîtwa ndamîîta,
Raabu ûra gûtarî bu aûmba kûrûtha.
8 Îndî îthi wandîke mantû mama mbaariûni antû bakîonaga
na kinya wandîke mabukuuni,
kaingo ntugû ikaaya bûkeegua bûrî ûkûûyî bûtakîthira
9 Nûntû baba n'antû bara baregaga kwathîka na aana ba ûrongo
bara bateendaga kûthikîîria watho bwa Mwathani.
10 Beeraga antû baba boonaga mantû na biongo ata rî,
“Tûtikwenda kwîrwa mantû ma bioneki bienu kaîrî.”
Na bakeera iroria nabio,
“Bûtigaatwîre ûmma kaîrî!
Twîreeni mantû mara magaatûkenia,
roriani mantû ma ûrongo.
11 Atî, tûûraani mûtûûrîre ûkari ûûgû,
menya bûthi na njîra ino,
na bûtige gûtwîra mantû
ma Ûra Mûtheru wa Isiraeri!”
12 Kwoogu ûûgû i bu Ûra Mûtheru wa Isiraeri akuuga,
“Nûntû i bûreganîîte na bûra nkûbwîra,
bwagwatana na ntheto cia kwinyanîîria na ûrongo.
13 Kwoogu meeyia mama maaku
magaakara ta rûthingo rûûraaya rûrî na nkuû,
rûra rûgwîyaga warîmwe nku rûtarî kîatho.
14 Bûkaarebûkanga ta nyûngû
îkanyanîîtue nthî i muntû atarî kîao
bûra gûtarî nwa karebûrû kara gagaatigara
kaûmba nwa kûrûma makara kuuma riiko kana gataa rûûyî kîthimaani.”
15 Ûûgû i bu Mwathani Mwene Inya Ûra Mûtheru wa Isiraeri akuuga,
Bwacooka kîrî niû na bwarîîkîîria bûkoonoka,
bwakirîîria na bwambîtîgia i rîo bûkaagîa inya.
16 Îndî bwaugire, “Arî, tûkaugia n'ûntû tûrî na mbaraathi.”
Kwoogu bûgaakuthûka!
Bwaugire, “Tûkaathi na mbaraathi ira irî rwîro mûno.”
Kwoogu bara bakeengana naabi bakeegua barî na rwîro nkûrûki yenu!
17 Antû ngiri îmwe beenu,
bagaakuthûka baagondokerwa i muntû ûmwe wao.
Bwagondokerwa n'antû baao bataano,
bwinthe bûgaakuthûka
mwanka bûkare ta mûtî wa bendeera ûtiganîrîtue kîrîmaani îgûrû.
Wîrane bwa Ngai kîrî antû baake
18 Amwe na ûgu Mwathani neteereete abwîgîîrua kîao
na abûteethia.
N'ûntû Mwathani i Ngai wa mma.
Kîthaarimo i kîrî bara beetagîîra kuuma kîrî we!
19 Yîî biû antû ba Sayuuni, biû bûtûûraga Njerusaremu bûtiirîra kaîrî. Akabwîgagua kîao rîra bwarîra! Na agaacookagia maromba meenu warîra rîongwa bwaromba. 20 Kinya ûkeegua Mwathani n'abwete mûgaate wa thîîna na rûûyî rwa kînyamaara, aarimû baaku batiithwa kaîrî ûkaboonaga na meetho maaku wengwa. 21 Wana kinya wagarûka bwa ûrîo kana bwa ûmotho nwa ûkeegagua kayû nyuma yaku gagîkwîra, “Njîra n'yo îno, thiyagaani n'yo.” 22 Na bûkaregana na ngai cienu cia mîbuanaano inu bûkaandîte na thaabu na fetha. Bûgaitiganîria bûgîciîraga, “Îthiini ûgu, tûtikûbwenda.”
23 Mwathani akabuurithîria mbura kaingo irio bira bwandîîte biuma na bûketha maketha maingî. Kagiita gaku ng'ombe cienu ikaarîîyaga bieniini biinene. 24 Ncamba na mang'ooi mara ûrîmaga namo makaarîîyaga nyaki îra nthongi îngitange na yekîrwa mwonyo. 25 Ntugû îra anthû baaku bakaûragwa na mînaara yao yomboranue bantû onthe aûkîîru na kinya irîma bira biraaya bikauma miuro ya ndûûyî. 26 Mweri ûkaathararia ta riûa, na werû bwa riûa nabu bûthararie ta werû bwa ntugû mûgwanja. Ûgu i bu gûgaakarîka rîra Mwathani akeegua akîoga antû bara bathuumûraange na akîbooragia maronda mara aabatûrire.
27 Ata rî, riîtwa rîa Mwathani rîîyîîte kuuma kûraaya,
agîakanaga mwanki na akiumaga karongorongo ga ntoogo n'ûntû bwa mûthûûro wake.
Kanyua gaake kaûyûri mûthûûro,
na rûrîmî rwake naru i mwanki ûra ûthiranagia.
28 Mîruke yake i ta mûgwû ûmûyiûu,
ûgûkinya mwanka nkingo.
Acunkaga mîgongo na gîcunki kaingo amîînyangia
ageekîra tûnyuani twa antû mîkang'i ya kûbabîtithia njîra.
29 Îndî antû ba Mwathani bakaina bakeneete,
ta ûtugû bûra bakûngûagîîra kîatho kîîtheru.
Nkoro cienu igaakena,
wa ta rîra antû beetagia bakîringaga mîtûûrirû kîrîmaani kîa Mwathani,
rwara rwa Isiraeri.
30 Mwathani agaatûma antû beegua kayû gaake,
na boona njara yake yîîndamîîte
îrî na mûthûûro ûmûnene na mwanki wa kûthirania.
Îrî na mbura înene ya ncûgû, kîbuubani na nkwa.
31 Kayû ka Mwathani gagaakiria Asîîria
na akabaringa na mûraagi wake.
32 Wa bûra Mwathani akeegua akîbaringa ibooko bia kûbakaanûkia,
nwabu tamburini na wandîndî ûkeegua bikîringwa.
Mwathani akaarûa nabo na njara yake wengwa.
33 Bantû a kûbîîthîrua n'athuuranîrîîtwe
n'ûntû bwa mûnene.
Tofethi, îrinya rîa mwanki, rîra rîînje i rîariî na irîîriku,
na rîrî na nkû na mwanki ûmûnene mûno,
mîruke ya Mwathani îkari ta kîthima kîa ûbiriti,
n'yo îkaamuntia mwanki ûyu.