Njerusaremu îkoona thîîna
29
1 Ûkoona thîîna woû Arieri,aArieri taûni îra Ndaundi aatûûraga!
Mwanka nyuma ya ûra ûngî
biatho bienu bia gûkûngwîra nwa bikûthi mbere.
2 Amwe na ûgu nkaareetera Arieri kînyamaara,
gûkeegua kûrî na kîeba na kîrîro
na kîrî niû Arieri îkeegua îkari ta kîthînjîro kîûyûri nthakame
3 Ngagûcîgîîria mbarî cionthe,
nkûthiûrûkîîrie na ibayo mbarî cionthe.
4 Naawe ûkaanyiua ûringwe nthî mpu,
rwaria rwaku ûkaaragia ûrî nthî mûthetuuni.
Rwaria rwaku rûkeeguîkaga rûkiuma bwa nthî
rwaria rwaku rûkeeguîkaga rûrî nthî buru ta muntû ûkwaria na kîoye.
5 Îndî anthû baaku bara baingî bagaakara ta rûgûûnkû rûra rûgûrûkagua i ruuo,
na bara bathûûku mûno bakare ta maûngû bûra magûrûkagua i ruuo.
Mantû mama magaakarîka na mpwî mûno.
6 N'ûntû Mwathani Mwene Inya akaaya
na nkwa, kwinaina kwa nthîgûrû na gîtuma kîînene,
arî na ruuo na kîbuubani kîînene na ndîrîmbî cia mwanki ûra ûrûngûranagia.
7 Rîru i rîo mîgongo îra îrwaga na Arieri,
îra îmiithûkîrîîte na yamîcîgîîria,
îkaathira wa ta kîrooto
kana kîoneki gîa ûtugû.
8 Wa ta bûra muntû arî na yûûra amaami arootaga akîrîa,
îndî agîûkîîra akeethîra abûûti wa bûra.
Kana wa ta bûra muntû arî na bûûta arootaga akînyua rûûyî,
îndî agîûkîîra akeethîra arî na bûûta wa bûra.
Nwa ta bu gûgaakarîka kîrî mîgongo yonthe
îra îrûaga na kîrîma gîa Sayuuni.
9 Rigaraani na bwame,
bûtuîke ntûngi bûtige kwona,
bûtogoone îndî t'ûntû bwa ndibei,
bûtaratare îndî t'ûntû bwa ncoobi.
10 Mwathani n'abûreterete toro înene mûno,
ainga meetho meenu, ta mo iroria,
aarigicania biongo bienu, tabo antû bara boonaga mantû na biongo.
11 Kîrî biû, ûroria bûbû bunthe i bwa mana, i biugo tu birî kabukuuni gaakûûnje kaarûmîîrua na mûûra. Na bûkaaya gûkanenkera muntû wiyî kûthooma bûkamwîra, “Itû aba tûthoomere,” akabwîra, “Ntiûmba kûthooma n'ûntû kabuku gaka i kaarûmîîrie.” 12 Kana bûkanenkanîra kabuku gaku kîrî muntû ataiyî kûthooma bûkamwîra, “Itû aba tûthoomere,” akabûcookeria abwîre, “Ntiiyî kûthooma.”
13 Mwathani ariuga ata rî,
“Antû baba baugaga i baakwa
na bagantîîya na tûnyua twao,
îndî nkoro ciao irî kûraaya mûno naani.
Kûngonga kûra bangongaga
bathingataga mawatho mara barutanîtwe n'antû.
14 Nûntû bwa ûgu nkaarûtha ûntû bwa kûrigaria kîrî antû baba kaîrî,
nthingatanie ûntû bwa kûrigaria nyuma ya bûra bûngî.
Ma ûûme ma antû bara baûgî makaathira,
na ûmenyo bwa antû bara baiyî bûkaathira.”
15 Bûkoona thîîna biû antû bara bûthiiyaga gûntû kûra kworokeru
bûkathûgaania bûkaitha Mwathani mîbango yenu.
Bara bûrutagîra ngûgî cienu mwinduuni
bûkîûragia, “N'ûû ûtwona? N'ûû ûtwiyî?”
16 Biû bûgarûranagia mantû!
Mûûmbi wa nyûngû aûmba kûthûgaanîrua ta mûthetu wa kûûmba nyûngû?
Kîra kîûmbe kîaûmba kwîra ûra ûkîûmbîîte,
“Ti woû wambûûmbire?”
Kana nyûngû îîra ûra wamîûmbire,
“Gûtirî bu ûkûmenya?”
17 Anga nyuma ya kagiita gaakai Rebanoni itiengeerie gûtuîka mûnda ûmûnoru
na mînda îra mînoru îgarûke îkare ta mîthitû?
18 Ntugû înu itaigua bikeegua mara makaathomwa kuuma îbukuuni,
namo meetho ma ntûngi
moone mwinduuni ûra mûrumanu mûno.
19 Bara nabo beenyiiagia bagaakena n'ûntû bwa Mwathani,
na bara barî na ûbatu bakeneere Ûra Mûtheru wa Isiraeri.
20 Bara barî ûgîti bakaathirua
bara baguutanaga nabo barime,
na bara babaangaga mîbango ya ûthûûku bakaathirua.
21 Bara baaragia batûmaga antû batarî na mabîtia batuîka barî na mabîtia,
bara bategaga bara bangî kootiini,
na njîra ya ûkûûyî bwao bagatûma bara batarî na mabîtia batuîka barî na mabîtia.
22 Kwoogu ûûgû i bu Mwathani ûra wakûûrire Îburaîmu, akwîra nyomba ya Njakubu,
“Njakubu atikooro agîa îgi kaîrî,
kana moothiû maao mang'onyara kaîrî.
23 Rîra bakoonaga gatîgatî ka aana baao
ngûgî cia njara ciakwa,
bagaatîîyaga riîtwa rîakwa
na bagaakumia ûtheru bwa Ûra Mûtheru wa Isiraeri
na bakaagongaga Ngai wa Isiraeri.
24 Îgiita rîru i rîo bara bataku bagaatua gûtaûkîrwa i mantû,
na i rîo bara banung'unaga bageetîgîîria kûrutanwa.”