Njerusaremu yakaanua
28
1 Ûnene bwa Isiraeri bûrî thîînaani!Ûkumio bwa bu bûrîthira ta yûûa rîkûnyaara,
rîrî kîongo kîa mûnene ûmûtogoonu. Biongo bibu biao biûyûri wîkumia
amwe na biakwa maguta bamaamaga ta antû baakuû
n'ûntû bwa ncoobi.
2 Raithaani bwone Mwathani arî na ûmwe ûra ûrî inya na i ncamba.
Akari ta kîbuubani kîînene kîra kîînyangagia,
ta mbura îînene ya îkondoria,
nwabu akaamîgera nainya nthîgûrû.
3 Wîkumia bûbu bwa ntogoona bwa Eburaimu,
bûgaakinyangîrwa nthî na makinya.
4 Yûûa rîru rîkûnyaara,
rîru rîthongi rîkumagua,
rîrî kîongo gîa kîbonde kîînoru,
rîgaakara ta nkûyû ira ciîragua mbere ya maketha
warîra muntû amîona akamîtua
akamîrîa.
5 Ntugû înu Mwathani Mwene Inya
akeegua arî nthûmbî ya ûkumio,
wega na kûgwîrua
kwa matigari ma antû baake.
6 Nwe akaanenkera bara bagambithanagia kîrundu wa mma
na atuîke inya kîrî bara bakaragia mîîrîga ya taûni.
7 Baba nabo i babîtîîtie n'ûntû bwa ndibei
na baûrîra ncoobiini.
Athînjîri ba Ngai na iroria ibabîtithîîtue i ncoobi
na baamerua i ndibei.
Baticiûkagîrwa bwega i mantû mara bagwûrîrîîtwe,
na kinya magamba batigiitaga bwega.
8 Meetha ciao ara bakaraga cionthe ciûyûri mataîka
na gûtirî nwa bantû atheru atigeere.
9 Nabo barîûria ata rî, “N'ûû we Mwathani akaarutana ûûme?
N'ûû we akaarutana gûciûra mantû?
I twana twa nyonto,
kana i tûra tûtigithîîtue gwonka?
10 N'ûntû i watho îgûrû ya bûra bûngî
rûtha ûûgû, kana rûtha ûgu.”
11 Yîî, Mwathani akaarîria antû baake na tûnyua twa ageni,
mûgambo na tûyû twa kûûngî.
12 Wa bara eerire,
“Aaga i bantû eega a kûnogoka, bara banogu i banogoke.
Gîkî i kîo kînogoko.”
Îndî bateenda kwîgua.
13 Kwoogu îîndî kiugo kîa Mwathani kîrî bo kaîrî gîkabeera ûûgû,
Rûtha ûûgû na ûûgû,
watho îgûrû ya bûra bûngî
ûntû bûniini aaga, ûntû bûniini aara.
Kaingo bacooka bwa nyuma bagwa,
bagurarua na bagwatwa i mûtego.
14 Kwoogu thikîîriani kiugo kîa Mwathani biû biaa,
biû bwathaga antû ba Njerusaremu.
15 N'ûntû i bwîkumîîtie bûkiugaga ata rî,
itûrûthîîte kîrîîkanîro na gîkuû
na kinya twagwatanîra na nthiko,
twarîîkania bwega atî rîra kînyamaara gîkaaya,
gîtitûûria n'ûntû tûtuîkithîîtie ûrongo wîbitho bwetû,
na twebitha kwenanîîriani.
16 Nûntû bwa ûgu, ûûgû i bu Mwathani Mwene Inya akuuga,
“Raithaani bwone nkaiga iiga Sayuuni
mbînjîre mûcingî ûmûriku
wa iiga rîra rîgereetue, iiga rîa koona rîa goro rîa mûcingi ûgwîtîgîka.
Muntû ûra ûmbîtîgîîtie atiigîa mpwî.
17 Ngaatuîkithia ûmma rûrigi rwa kûthima,
na ûtheru nabu mbûtuîkithie kabirû.
Mbura ya ncûgû îkenyangia wîbitho bwenu ta bu ûrongo
na rûûyî rwarage wîbithooni bwenu.
18 Rîru i rîo kîrîîkanîro kîenu kîra bwarîîkanîîre na gîkuû gîkaathira.
Na ngwatanîro yenu îra bwagwatanîîre na nthiko îkaathira gîtûmi.
Rîra kînyamaara kîînene gîkaaya
gîkabûciata cwe.
19 Wa magiita monthe mara gîkaayaga nwaka gîkaabûnyamaaragia.
Wa kîra rûkîîrî, na kinya mûthenya na ûtugû,
nwaka gîkaabûnyamaaragia.”
Wa îra ntûmwa îkaumaga kîrî Mwathani,
nwaka îgaatûmaga bûkamaka.
20 Bûgaakara ta muntû ûra amaamaga ûrîrî bûûkubî ataûmbe gwîtambûrûkia,
kana ûra eguîkaga kaguo kaniini gatamûkomane.
21 Mwathani akeebûkîîria kaîrî ta bûra aarûthire kîrîmaani gîa Perasimu,
akeegua athûûri ta bûra aathûûri kîbondeeni kîa Ngibeoni.
22 Mwathani Mwene Inya n'aamenyithîîtie
îgûrû rîa kwînyangua kûra kûûyîîte nthîgûrû yonthe.
Kwoogu tiganaani na nguutû,
giria nyororo cienu ciitaitua.
23 Thikîîriani bwega bwîgue kayû gakwa
thikîîriani bwîgue bûra nkuuga.
24 Rîo rîra mûrîmi athuuranagîra mûnda kaingo aanda,
ga akaraga rîonthe akîrîmaga?
25 Rîra aathuuranîra mûnda na aarîîkia,
aandaga ngano na sayiri na akaminca mbeû ya tûmera tûra tûniini tûnunkagia irio bwega.
Akaanda ngano rûteere rwayo,
na akaanda mbarî rûteere rwayo rûra amîgiitîrîîte.
26 Ngai wake n'we ûmwathaga,
na akamûrutana njîra îra mbega.
27 Tûmera tûtu tûniini tûtibûûragwa na gîntû kîîrito
kana kûgûrû gwa nkaarî kwingiritua îgûrû rîa tûnyamû tûra tûnuunkagia irio bwega.
Tûbûûragwa na mûbûûro ûmûûthû,
natu tûnyamû tûra tûnuunkagia irio bwega tûkabûûrwa na kamûtî gaacege.
28 Ngano nwa mwanka ithiîgwe kaingo irugwa mîgaate.
Kwoogu muntû atikaraga akîbûûraga rîonthe.
Kinya wegua n'akûrûkagîîria magûrû ma nkaarî ciake cia kûbûûra ngano îgûrû rîa ngano,
mbaraathi ciake tika ithiaga.
29 Mantû mama monthe maumaga kîrî Mwathani Mwene Inya,
ûra ûrî kîrîra gîa kûrigaria na ûûme bwingî mûno.