Gûkûûrwa gwa Isiraeri
27
1 Ntugû înu,Mwathani agaakaanûkania na rûûyiû rwake rûra rûûgî,
agaakaanûkia nyamû îra nene ya îria îîtagwa Rebiathani îra njiûu.
Akaûraga njoka îra nene ya îria
Rebiathani Njoka îra yîîkûnjakûnjaga.
2 Kagiitaani gaku Mwathani akauga,
“Inîraani mûnda wa mîcabiibû na ndibei yayo îra mbega rwîmbo.
3 N'ûntû i niû Mwathani ncumenyagîîra
na ngacukundagia rûûyî rîonthe.
Ngîcukaragia ûtugû na mûthenya
kaingo gûtagîta we ûcuthûûkia.
4 Niû ntirî na marûrû.
Wana kinya naagu mbere yakwa
gûkeethîrwa i kîthaka kîrî mîîgua!
Nkaarûa n'yo
na mmibîîthie yonthe.
5 Kana beenda tûgwatanîra i baaye kîrî niû
bacerie ûkiri naani,
yîî, bacerie ûkiri naani.”
6 Ntugû ikaaya Njakubu akauma mîri,
Isiraeri n'yo îririme na îrae,
yûûyûrie nthîgûrû na matunda.
7 Ka Mwathani amûkaanûkîîtie
ta bûra wana we akaanûkîîtie anthû baake?
N'ûmûûrage
ta bûra bara baamûûragire baûragirwe?
8 Mwathani akaanûkîîtie antû baake
na njîra ya kûbanenkanîra nthîgûrû ciingî barî atae.
Aabairire na mpwî
ta kîbuubani kîra kiumaga bwa uumîîro bwa riûa.
9 Na njîra îno wîyia bwa Njakubu bûkaathirua,
na i mo maciaro monthe ma kûmûthirîria wîyia bwake.
Rîra maiga ma kîthînjîro kîa ngai cia ûrongo makaabebenjwa makare ta nkangû,
gûtirî gîcuncî nwa kîmwe kîa ngai cia mîbuanaano
kana kîthînjîro gîa kûbîîthîria macoco gîgaatigara.
10 Taûni îra îrairigîrîîtwe na nthingo cia inya îîndî n'îganjo,
ûtûûro bûûrûkîre bwakara ta rwanda.
Ng'ombe ciatua kûrîîyaga
na kûmaamaga ku.
11 Rîra mpoong'i ciûmaga, ciunîkangaga
eekûrû bakaaya bakauna nkû bakathi kûbua mwanki nacio.
Wa ta bûra bo barî antû batakwerewa
nwabu mûûmbi wao atakîbegîîrua kîao,
kana abendeera.
12 Ntugû înu wa ta bûra muntû eeraga ngano agaciathûrana na maûngû, nwa ta bu Mwathani akeethîrania antû baake ba Isiraeri ûmwe kwa ûmwe, kuuma rûteere rwa muuro wa Yufîrîti mwanka Miisiri. 13 Nako karumbeta karingwe, bara bonthe bakûnyamaarîra Asîîria na bara barî mîgwate Miisiri baaye bagongere Mwathani kîrîmaani kîîtheru kîra kîrî Njerusaremu.