I Ngai agaatûma antû baake baûmbana
26
1 Ntugû înu nthîgûrû ya Njunda îkaina rwîmbo rûrû yuuge:Tûrî na taûni îrî na inya
Mwathani n'we akaragia taûni yetû,
akari ta rûthingo rûmîthiûrûkîrîîtie.
2 Rugûraani mîîrîga,
kaingo mûgongo ûra mwega,
ûra ûrî wa mma ûthûngîra ndeeni.
3 Ûkaamenyagîîra muntû ûra mathûgaania maake makaraga kîrî woû,
akarage na ûkiri rîonthe n'ûntû bwa bûra akwîgwatagia.
4 Îtîgia Mwathani tene na tene,
n'ûntû Mwathani Ngai n'we rwara rwa iiga rwa gûtûûra.
5 N'ûntû we n'agwîthagia bara beebûkagîîria,
akagwîthia taûni îra îreebûkîîrîtie.
Taûni îra îîkumagia,
amîaraganagia îkathira cwe.
6 Îgakinyangîrwa nthî na magûrû,
îgakinyangwa i bara barainyagîîrua,
na kinya nkîa.
7 Mwathani n'atûmaga njîra cia antû bara beega ibua.
Woû Mwathani i woû ûthongamagia njîra cia bara beega.
8 Yîî Mwathani tûrîthiingata maathana maaku,
na tûkaiga wîrîgîîro bwetû kîrî woû.
Riîtwa rîaku rîa ntwîre,
i rîo nkoro cietû ciîgwatagia.
9 I nkwîrîgagîîra ûtugû na nkoro yakwa yonthe,
ngagûceria kinya rûkîîrî na mwoyo wakwa unthe.
N'ûntû rîra ûgûtuîra nthîgûrû na antû baayo îgamba,
kîrîndî kîa nthîgûrû i kîîrutanaga mantû ma wagîru.
10 Kinya ûkeegua n'wîgagîîrua bara beeyagia kîao,
batiîrutanaga ûtheru.
Kinya barî nthîgûrû ya bara batheru,
bo bakaraga bakîrûthaga mara mathûûku,
bakarega gûtarana na ûkumio bwa Mwathani.
11 Mwathani njara yaku n'îûkîîrîîte îgûrû
îndî batimîonaga.
Tiga boone wîru bwaku bwa gûteethia antû baaku bagîe îgi,
ka anthû baaku bathirue i mwanki.
12 Mwathani ûtûme ûkiri bûkarage naati,
n'ûntû bionthe bîra tûrî nabio i woû ûtûnenkereete.
13 Mwathani, kûrî na aathani bangî baingî batwathîîte,
îndî riîtwa rîaku i rîo tûkaathaga.
14 Bo i baakuû batirî mwoyo,
i barîîkîîtie gûkua na batiiriûka.
Waabakaanûkiirie na wabathiria cwe,
na watûma bariganîria.
15 Mwathani i woû ûthagayîîtie mûgongo ûyû,
watûma mûgongo ûyû wingîa.
Wecereria ûkumio wengwa,
na waaramia mîanka ya mbarî cionthe cia nthîgûrû îno.
16 Mwathani, rîra antû baarî na thîîna
baayire kîrî woû naawe wabakaanûkia,
nabo bagakûromba.a
17 Wa ta bûra mwekûrû arî ûmûrito,
rîra arî akubî kûgîa na mwana
anyamaaraga na kûrîra i rûgakaî
nwabu tûkari mbere yaku Mwathani.
18 Tûraarî baarito na twanyamaara i rûgakaî
îndî gûtirî kîo tûraciara.
Tûtirareetera nthîgûrû wonokio,
kana twongeera antû baayo.
19 Îndî bara bakuîte bakaariûka,
mîîrî yao yuume nthikooni.
Ûkîîraani bwine bûkeneete,
biû bûtûûraga nthikooni,
n'ûntû werû bwa Mwathani bûrîgwa ta maame ma rûkîîrî,
n'yo nthîgûrû îkaarekeeria bara bakuîte.
20 Antû baakwa, înûkaani bûthûûngîre
nyomba bwinge mîrango,
bwîbithe kagiita gaakai,
mwanka kînyamaara gîkî gîkûrûke.
21 Raithaani bwone Mwathani n'ayîîte aumîîte bantû aake ara atûûraga
aayîîte gûkaanûkia antû ba nthîgûrû n'ûntû bwa meeyia maao,
nthîgûrû îkaumbûra bara nthakame ciao cietîgire,
na îtiitha bara baûragirwe.