Rwîmbo rwa gûkumia Mwathani
25
1 Woû Mwathani, ûrî Ngai wakwa,ngagûkumia na nkaathe riîtwa rîaku.
N'ûntû bwa gwîtîgîka gwaku,
n'ûrûthîîte mantû maanene,
mara maabangirwe woo tene.
2 Womorangîîte taûni ira mbirigîre na nthingo,
wacituîkithia maganjo.
Taûni îra îrakaraga ageni îîndî îtirî oogo
na îtiakwa kaîrî.
3 Kwoogu bara barî inya bagagûkumia,
na taûni cia mîgongo îra îrî inya nacio igûtîîye.
4 N'ûntû woû n'ûtuîkîîte bantû a kwîbitha nkîa
na bara barî na ûbatu,
bantû a kuugagia rîra barî na thîîna
na mûgunye wa kwîyûûa mwathû.
N'ûntû antû bara bathûûku babaithûkagîra
bakari ta kîbuubani kîînene gîkûbuutana gîkîringaga nthingo.
5 Bakari ta mwathû wa rwanda.
I woû ûkiragia gîtuma kîa ageni,
wa ta bûra mwathû ûruraga waguîkwa i matu,
nwabu gîkeno kîa bara bathûûku gîkaathirua.
6 Kîrîmaani wa gîkî noo Mwathani Mwene Inya akaathuuranîra
antû baake bonthe îruga rîînene,
îruga rîrî na ndibei îra nkûrû,
nyama ira nthongi mûno na kinya ndibei îra mbega kîrî cionthe.
7 Arî kîrîmaani wa gîkî, akaathiria rûûî rûra rûguîkagîra
ûthiû bwa antû bonthe,
rûûî rûra rûguîkîrîte mîgongo yonthe.
8 Akaathiria gîkuû tene na tene.
Mwathani Mwene Inya akaagiria antû baake bonthe meethori
kuuma moothiûni maao.
Na athirîrie antû baake bonthe
bara barî nthîgûrû yonthe îgi.
I bu Mwathani akuuga.
9 Ntugû înu antû bonthe bakauga,
“Na mma ûyû n'we Ngai wetû,
tûramwîtîgiirie n'we atwonokia.
Ûyû n'we Mwathani ûra tûreetîgîîtie,
tûkeneeni na tûkeneere wonokio bûbû bwake.”
10 Inya ya Mwathani îgaatûûraga Njerusaremu,
Moabu îgaakinyangwa îthire cwe,
wa ta bûra rûûa rûkinyangagîrwa nthî.
11 Bagaatambûrûkia njara ciao
wa ta bûra muntû atambûrûkagia njara akîbutîra.
Ngai akaathiria wîkumia bwao,
amwe na ngûgî cia njara ciao.
12 Akoomoranga nthingo inu ciao cia inya na indaaya,
mwanka ithire cwe.
Agaciomoranga kûrû,
acithirie cwe.