Mwathani akeenyangia nthîgûrû yonthe
24
1 Mwathani akeenyangia nthîgûrû yonthe,na amîtuîkithie gîntû gîtarî gîtûmi.
Akamîînyangia cwe,
na anyagaarie bara bakaraga ku.
2 Nwabu gûgaakara kinya kîrî athînjîri na kîrî antû,
kîrî nkombo na mwathi wayo,
kîrî mwendia na mûgûri,
kîrî mûrombi na kîrî mweyani.
Kîrî mûkoobi na kîrî mûkoobithania.
3 Nthîgûrû îkeenyangua cwe,
na îtuîkithue întheri.
I Mwathani aarîîtie kiugo gîkî.
4 Nthîgûrû n'îgîîte kîeba na yanyaara,
nthîgûrû yonthe yaaga inya na yaagirîka,
wana kinya îgûrû irîkûnyamaara.
5 Nthîgûrû yînyangîîtue n'antû bara bakaraga ku,
i baregeete kwathîkîra mawatho.
I batiganîîte na watho,
na beenyangia kîrîîkanîro gîa tene na tene.
6 Kwoogu nthîgûrû îkaathirua i kîrumi,
na mabîtia ûkeegua marî ma antû bara bakaraga ku.
Kwoogu bara bakaraga nthîgûrû bakaabîa,
bara bagaatigara i baakai.
7 Gûtioneka ndibei yaimbia kaîrî n'ûntû mîcabiibû ga îkûûma,
nabo antû bara bareethagîrwa bagîkaya
bagwatwe i kîeba.
8 Tûyû twa nkena na twa tamburini tûtiîguîka kaîrî,
gîtuma kîa bara bakeneete kîûre,
na kayû kaathongi ga kînanda gakire.
9 Îndî batiinyunyaga ndibei bakeneete kana bakiinaga,
Bara banyuunyaga ncoobi îtiinyuîka kaîrî i gana.
10 Taûni yomorangîîtwe nthingo yaakara ta îganjo,
na wa kîra nyomba yaingwa kûrigîîria antû batigaakûrûke ku.
11 Njîraani cionthe antû i bakûrîrîra ndibei,
n'ûntû kûgwîrua kwao i kûthirîîte,
na gîkeno kîonthe kîathira îgûrû ya nthîgûrû.
12 Taûni yatigwa îkari ta îganjo,
na mîrango ya mwîrîga wayo yaatûrangwa marebûrû marebûrû.
13 Kwoogu ûûgû i bu gûgaakarîka nthîgûrû,
na kinya kîrî mîgongo.
Wa ta bûra mîceituuni îkiraga îbooru yatuîgwa matunda,
kana mîcabiibû rîra ncabiibû ciarîîkia gûkethwa ciatigara ncabiibû inkai, nwabu gûgaakara.
14 Bara bagaatigara bakaina bakeneete.
Bara barî mbarî ya ûthwîro bwa riûa bakeerana bûra Mwathani arî ûmûnene.
15 Kwoogu biû bûrî mbarî ya uumîîro bwa riûa cookeriani Mwathani nkaatho,
kumiani riîtwa rîa Mwathani Ngai wa Isiraeri,
kinya icîgîîrioni bia îria.
16 Kuuma mîthia ya nthî itûkwîgua gûkiinwa ata rî,
“Ûkumio i kîrî ûra mûtheru.”
Îndî naani ndauga ata rî, “Nkûthira inya! Nkûthira inya!
Yîî kûrû niû!
Bara bankunyanagîra ibankunyanîrîîte!
Wabu akunyanîri ibankunyanîrîîte mûno!”
17 Imakania, marinya na mîtego i bibweteereete,
biû antû ba nthîgûrû.
18 Ûra agaakuthûka gîtuma kîa imakania,
ûyu akaagwa îrinyaani.
Na ûra akaabarata aume îrinyaani,
ûyu akaagwatwa i mûtego.
N'ûntû mîîrîga ya îgûrû ya rûûyî n'îmîrugûre,
na mîcingi ya nthîgûrû yainainua.
19 Nthîgûrû îkwomokanga,
nthîgûrû îgwatûkana cwe,
nthîgûrû îkwinainua mûno.
20 Nthîgûrû îrîtang'atang'a ta muntû ûmûtogoonu,
îriinaina ta nyomba îkiinainua i ruuo.
N'ûntû bwa bûra îritwîrîîtwe i meeyia,
wona yagwa îtiûkîîra kaîrî.
21 Ntugû înu Mwathani agakaanûkia
njûûrî ya îgûrû,
na kinya anene ba nthîgûrû.
22 Nabo bakeethîranua amwe
ta abungwa barî îrinyaani.
Akabaingîra nceera,
na abape îkanûkia nyuma ya ntugû inyingî.
23 Mweri ûkeegua nthoni, na riûa rîgîe îgi,
n'ûntû Mwathani Mwene Inya akaathana
arî kîrîmaani gîa Sayuuni na arî Njerusaremu,
na arî mbere ya akûrû baayo arî na ûkumio bûûnene.