Ûroria îgûrû rîa taûni ya Turo
23
1 Bûbû i bu ûroria n'ûntû bwa taûni ya Turo,Kayaani biû meeri cia taûni ya Tarisisi,
n'ûntû taûni ya Turo n'înyangîîtue,
na yatigwa îtarî na bantû a kûrûngîka meeri.
Wa ta bûra bûregîîtue ntheto ikîarua
bûkiuma nthîgûrû ya Kitimu.a
2 Kiraani ki biû antû bara bûtwîre îkumbo rîa îria
na kinya biû abiacaara bara banene ba Sindoni,
biû bûtongeetue i bara baringaga îria.
3 Babûreetera irio bia kuuma Siori
na kinya bira bikethe kuuma muurooni wa Naero,
n'ûntû i biû thoko îra nene ya mîgongo.
4 Îgua nthoni woû Sindoni n'ûntû îria i rîarîîtie
na wîbitho bwa rio bûra bûnene bwauga,
“Ntaagwatwa i rûgakaî rwa mwana kana ngîa na mwana,
ntaarera nthaka kana nkûria aarî.”
5 Rîra antû ba Miisiri bakaamenya ntheto ino,
bakeegua bûûthûûku mûno n'ûntû bwa taûni ya Turo.
6 Biû bûtûûraga gacîgîîrioni ka îria,
ringanîriani rûteere rwa Tarisisi
na bûkaye mûno bûkîrîraga.
7 Îno i taûni îra yenu ya tene,
îra bûtûûraga na gîkeno,
ara bwaumaga
bûkîthi kwîgwatîra nthîgûrû ira ciingî?
8 N'ûû ûyû ûbangîrîîte Turo mûbango ta ûyû?
Ntûûra ya ûkumio na ûnene,
ntûûra îra abiacaara baayo bara banene baraarî anene,
na bara baniini baagûraga into bakîendagia baiyîkeene nthîgûrû yonthe?
9 I Mwathani Mwene Inya wengwa ûbangîîte ûntû bûbû,
kaingo athiria wîkumia bunthe,
na aira îgi babu baiyîkeene nthîgûrû yonthe.
10 Ungurukania nthîgûrû yaku ta muuro wa Naero,
woû mwarî wa Tarisisi,
n'ûntû gûtirî wa gûkûrigîîria.
11 Mwathani n'atambûrûkîîtie njara yake îgûrû rîa îria,
na aatûma moonene maarîo mainaina.
N'eyanîîte watho kinya îgûrû rîa Kanaani,b
atî nthingo ciake cia inya ciomorangwe.
12 Nwe augîîte ûûgû, “Woû bikira mwarî wa Sindoni,
ûtûûraga winyagîîrua ûtikaagwîrua kaîrî,
wana kinya ûkaringanîria ûkathi bwa Kitimu,
wana kinya noo, ûtiona a kûnogoka.”
13 Ta raithaani nthîgûrû ya Ambabironi bwone,
antû babu batirî oogo kaîrî!
Antû ba Asîîria baratûmire nthîgûrû înu,
îtuîka nthî ya nyamû cia rwanda.
Baraakire ibayo biao bimîthiûrûkîrîîte,
boomoranga nthingo ciayo cia inya,
bamîtuîkithia îganjo.
14 Îîkayîreeni biû antû ba Tarisisi,
n'ûntû kîrûngamo kîenu kîa meeri gîkwînyangua.
15 Kwoogu kuuma ntugû înu taûni ya Turo îkaariganîria gwa kagiita ka mîanka mîrongo mûgwanja wa ta bûra kagiita ka mûnene ûmwe kagana. Nyuma ya mîanka înu yathira Turo îkaina rwîmbo ta rwa mûka îrwaya.
16 “Thûkia kînanda, ûthiûrûûke taûni yonthe,
woû îrwaya rîra rîarî rîkûriganîria.
Riinga kînanda bwega,
na wine nyîmbo inyingî
kaingo ûririkanwa.”
17 Gûgaakara ata rî, mûthiani wa mîanka mîrongo mûgwanja yathira, Mwathani akaariûngîra nthîgûrû ya Turo. N'yo îgaakara wa ta îrwaya îringe biacaara ciayo na mîgongo îra îngî yonthe ya nthîgûrû. 18 Îndî baita yaayo îra îkoonaga îkeegua yathûrîrîtwe Mwathani. Bitiîgua birî bia gwîtongia, îndî bîkaathiiyaga kîrî bara batûûraga mbere ya Mwathani kaingo boonaga biakûrîa bia kûbagana na bageekagîra nguo imbega.