Ûroria îgûrû rîa Njerusaremu
22
1 Bûbû i bu ûroria n'ûntû bwa kîguuru gîa kîoneki.I mbi îgûkûnyamaaria îîndî,
mwanka ûgatwa rûûgûrû rwa nyomba?
2 Woû taûni yûûyûri gîtuma,
mûciî wa ûgîti,
mûciî wa gîkeno.
Antû baaku bara baakuire bataûragwa na rûûyiû
kana bakuîra ndûani.
3 Atongoria beenu bonthe baakuthûka barî amwe,
baagwatagwatwa mbere bagera mûgwî nwa ûmwe.
Bonthe bara baagwatirwe baathaîkanîîrue amwe,
amwe na kwîgua baakuthûkire mûnthû arî kûraaya.
4 N'ûntû bwa ûgu ndauga ata rî,
“Tiganaani naani ndîre,
na bûtikaagerie gûnkirakiria,
n'ûntû antû baakwa i bakûthirua.”
5 N'ûntû Mwathani wa Njûûrî n'we ûreteete ntugû înu ya kînyamaara
Kîguuruuni gîa Kîoneki,
ntugû ya kwomoranga nthingo
na ya gûkaya kwingî irîmaani bionthe.
6 Antû ba nthîgûrû ya Eramu i bo barî na thiaka.
Antû ba Aramea nabo baathiithia nkaarî cia ndûa
nabo antû ba Kiri baûkîîria rong'o.
7 Wana kinya ûkeegua iguuru biaku bira bithuure ibiûyûri nkaarî cia ndûa,
na athiithia ba mbaraathi beerekera mîîrîga ya taûni ciaku,
8 ûkaria bunthe bwa Njunda bûkûthirua.
N'ûntû ntugû înu wegwetie into bia ndûa,
bira birî nyomba ya ûnene îra îrî mûthitûûni.
9 Bûkûraitha bwona rûthingo rwa Taûni ya Ndaundia
i rwarî na nkuû inyingî mûno,
bwebaigîîre rûûyî
rwa kîthima kîa nthîgûrû.
10 Bwatara nyomba cia Njerusaremu,
naabi bwacitharia kaingo bwaka nthingo irî inya nacio.
11 Na gatîgatî ka nthingo irî ciîrî,
bwaka bantû a gwîkîra rûûyî rwa kîthima kîra gîa tene.
Îndî bûtaûndûkîra ûra wakîrûthîîte,
kana bûthûgaanîria ûra wakîbangire kuuma tene.
12 Mwathani wa Njûûrî
aabwîtire ntugû înu abwîra,
bûgwatwe i kîeba na bûrîre,
bwenje ntundu cienu na bwîkîre nguo cia nkunia.
13 Îndî naabi bantû a kûrûtha ûgu bwathekire na bwakeneera,
bûkîthînjaga ng'ombe na ng'ondu
bûkîrîîyaga nyama na bûkanyua ndibei!
bûkiugaga, “Ga tûrîeni na tûnyue,
n'ûntû rûû tûgaakua!”
14 I Mwathani wa Njûûrî wengwa aarîîtie ûûgû nkîîgagua na matû maakwa, “Mwanka ntugû îra bûgaakua meeyia mama matiirekerwa.” I bu Mwathani Mwene Inya akuuga.
15 Ûûgû i bu Mwathani wa Njûûrî akuuga,
“Îthi wîre mûgîîki,
ûra wîtagwa Sebuna ûra ûmenyagîîra nyomba ya mûnene yonthe ata rî,
16 N'ata ûkûrûtha aaga na n'ûû ûkwete rûûtha rûru
wîbînjîra nthiko wengwa aaga?
Webînjîra nthiko îndaaya
na werûthîra bantû a kûnogoka rwaraani?”
17 “Îîmenyeere, Mwathani arî akubî gûkûgwata
na akûgera na inya ta muntû ûrî inya.
18 Na mma agagûkûnjakûnja ta mûbiira
na agûte nthîgûrû ya kûraaya mûno
ûkuîre noo.
Na nkaarî inu ciaku cia ndûa nthongi ûgu i kare noo
n'ûntû woû n'ûkwira mûnene waku îgi.
19 Naani ngakwîngatia cwe
uume ngûgîîni înu yaku.
20 “Ntugû înu ngeeta mûruti ngûgî wakwa Eriakimu mwana wa Irikia bantû aaku. 21 Mmwîkîre nguo înu yaku ya ûnene na ûmwoge mûcibi ûyu gwaku, mmûnenkere ûnene bûbu bwaku. Agatuîke îthe wa bara batûûraga Njerusaremu na kinya kîrî mwîrîga wa Njunda. 22 Na mmûnenkere rûbungûro rwa nyomba ya Ndaundi, bûra akaarugûra gûtirî we akainga na bûra akainga gûtirî we akaarugûra. 23 Nkamûringîra ta rwambo bantû aûmo, na akeegua arî ûkumio kîrî mûciî wa îthe. 24 Ûkumio bwa mûciî wake bunthe bûkaumanagia n'we na nciarwa cionthe kuuma bara baniini na kinya bara banene.”
25 Mwathani Mwene Inya ariuga ata rî, “Ntugû înu, rwambo rûru rwînjîrîîtwe bantû aûmo rûkaarutarutwa oogo, rûgaatemwa na rûgwe na mîrigo îra îcuuri kîrî ru îgwe.” I bu Mwathani akuuga.