Ûroria îgûrû rîa kwînyangua kwa Mbabironi
21
1 Bûbû n'ûroria îgûrû rîa rwanda rwa naiti mbarî ya îria.Wa ta kîbuubani kiumîîte bwa iti,
nwa ta bu mûnthû akaaya aumîîte bwa rwanda,
aumîîte nthîgûrû îra îmakanagia.
2 I mboneetue kîoneki kîrî na mantû maûmo,
mûkunyanîri akunyanagîra, mwamba n'we akaiya.
Eramu îkaithûka! Mendia îgaacîgîîria!
Ngaakinyithia mûthia kînyamaara kîonthe kîra Mbabironi yaareetire.
3 Mwanka agu îndî mwîrî wakwa uunthe n'ûrûrû bûtheri,
ûrûrû ta bwa mwekûrû akîenda kûgîa na mwana.
Ndîankanwa mwanka nkaremwa i kwîgua,
nkanyamaara mwanka nkaremwa i kwona.
4 Nkoro yakwa n'îkûringa mûno
nkainaina n'ûguaya,
ûgoro bûra nkwîrîgîîrîîte
i bûgarûkire bwatuîka bwa kûnguayia akî.
5 Bathuuranagîra îruga,
bagatandîka mîgeka
bakarîa na bakanyua.
Nthûti îmwe bakeegua,
“Atongoria ba njûûrî thuuranîraani rong'o cienu!”
6 Ûûgû i bu Mwathani akûmbîîra,
“Îthi waige muntû wa gûkaria,
na mara akoona auge.
7 Rîra oona nkaarî cia ndûa
na kinya ikundi bia mbaraathi,
na njûûrî îrî mang'ooini
kana nkamîîraani,
abaraithe bwega mûno,
atarîîrîîtie.”
8 Mûkaria ûyu akaraga akiugagîîria,
“Mwathi wakwa, ntugû nyuma ya îra îîngî nkaraga aaga kîbayooni,
wana kinya ûtugû.
9 Cûûba wone kûrî muntû ûûyîîte athiithîîtie nkaarî ya ndûa
na gîkundi kîa mbaraathi.
Nwe acookia auga,
‘Mbabironi îkûgwa! Îkûgwa!
Ngai ciayo cia mîbuanaano cionthe,
inyagaarîîte naagu nthîgûrû.’ ”
10 Antû baakwa Isiraeri,
bûrabûrîîtwe ta ngano.
Îndî îîndî i mbûmenyithîîtie mantû meega mara mbîgîîtue
kuuma kîrî Mwathani wa Njûûrî,
Ngai wa Isiraeri.
Ûroria îgûrû rîa Endomu
11 Bûbû i bu ûroria îgûrû rîa Nduma.a
Kûrî muntû ûkûmbîta arî Seiri,
“Mûkaria! N'ata gûkarire ûtugû!
Mûkaria! N'ata gûkarire ûtugû!”
12 Mûkaria amûcookeria amwîra,
“Rûkîîrî i rûûyîîte na kinya ûgoro.
Bûkeenda kûûria ûriani,
na bûûye ûgoro kaîrî.”
Ûroria n'ûntû bwa Arîîbia
13 Bûbû i bu ûroria îgûrû rîa Arîbia.
Biû agendi ba kuuma taûni ya Ndendani,
biû bwambaga marema meenu rwanda rwa Arîîbia.
14 Reteraani bara barî na bûûta rûûyî,
biû bûtûûraga taûni ya Tema,
bûreetere bara bakuthûkîîte irio.
15 Bakuthûkîîte rûûyiû,
rûûyiû rûra rûkûûre,
baakuthûka ûta bûra bûtume
na ndûa îndito.