Isaya 20

Ûroria îgûrû rîa Miisiri na Kusi

1 Mwankaani ûra mûrûngamîîri ûra mûnene wa njûûrî, ûra aatûmîîtwe i mûnene Sarigoni wa Asîîria aakinyire taûni ya Asindondi amiithûkîra na amîthûkia, 2 îgiita rîru Mwathani n'aariirie gûkûrûkîîra Isaya Mwana wa Amoci. Amwîra, “Ruta mathango mwîrî waku na iraatû kuuma magûrû maaku.” Na Isaya aarûtha woogu, aathi kûriûnga arî ûtheri na arî mbayo i ntheri.

3 Rîru Mwathani amwîra, “Mûruti ngûgî wakwa Isaya aathiiyaga arî ûtheri na arî mbayo i ntheri kagiita ka mîanka îthatû, rûrî rwano rwa mantû maathûûku mara nkaarûthîra nthîgûrû ya Miisiri na ya Kusi. 4 Ûgu nwa ta bu mûnene wa Asîîria agaataa antû ba Miisiri na ba Kusi athi nabo barî ûtheri na barî mbayo i ntheri, aana baîthî na akûrû athi nabo matina marî nja kaingo antû ba Miisiri bagîa îgi. 5 Bara beegwetie Kusi na bara beekumagia na Miisiri bakaaguaya na bagîe îgi. 6 Ntugû înu, antû bara batwîre îkumbo bakauga ûûgû, ‘Ene bûra gwakarîka kîrî Miisiri, îra tûreegwetie îtûtuunyûkia kuuma kîrî mûnene wa Asîîria! Ndîûria n'ata tûgeeteethia?’ ”